Read Guyeiti 89

Guyeiti89tod_pbt

Minazeɠegiti ta mini,niiti ti ɠɛɛni Davide ʋɛ?

¹Ezela nui Etan ná-kidafaawui.

²Nà Ɠɔoɠɔ GALAGI ná-nuɓɔɠɔlai maawuyezu,dàaʋɛ ɠa ɗa-wooɠɛɠiladai ɠula kɛlɛma yeeɠɛɠalaiti pɛ su nuiti bɛ.³Nà zoo gè bo, gè ɠɛ ma:«Ɗa-nuɓɔɠɔlai ɠa loni eyɛsu ɠɔ.È ɗa-wooɠɛɠiladai zeiʋɛ kpaan geeɠɔlɔgi zu.»⁴È boni, è ɠɛ ma: «Gè minazeɠegi woni nà-nui ʋɛ, gè yiimazeɠeai la,Davide ʋɛ, nii é ga nà-botiɠɛ nui, gè niima minazeɠegi woni ga:⁵‹Nà yɛ è-mavofodai zeizu masadai zu eyɛsu ɠɔ, ɗa zeɠena ná,gè ɓaa ɗa-masa kpɔkpɔgi maazu, yeeɠɛɠalai pɛ su nuiti saama.› »Lo!

⁶Geeɠɔlɔgiti su aniiti kpein ta ɗa-ɠɛɛwoti maayikiaiti dɛbizu, Ɠɔoɠɔ GALAGI!Ɗa-nu ɲadegaiti ta-maaɓɔgi ɠa ɗa-wooɠɛɠiladai maamusɛzu.⁷Ɓɛ ɠa é ga è ɠɛʋele, geeɠɔlɔgi zu, ee, Ɠɔoɠɔ GALAGI?Ɓɛ ɠa é ga è ɠɛʋele, geezu aniiti saama?⁸GALA maayikiʋɛ gola, nu ɲadegaiti ta-maaɓɔgi zu,maayikiʋɛ naati kpein gaazu, niiti ti maaɠoolii zu.⁹Ɠɔoɠɔ GALAGI, Fai-Pɛ-Maliɠii!Ɓɛ ɠa zobogi bɛ ga ɗɔun è ɠɛʋele, Ɠɔoɠɔ GALAGI?Ɗa-wooɠɛɠiladai è maaɠooliʋɛ.¹⁰Ungo, ɗa ɠila kpe ka ɗa ɗa kpoloɗɛi ná-wasogi ɠaayei.Siɛgi zu é wuzeɠezu la ɲiikpigi ma, ɗa ɠa ɗa ɗa gaayei.¹¹Ɗa ɠa è ziɛ wu zua ɲɔi Laɠaɓe lɛɛvɛni, é za,è è zili nuiti suvazani ga ɗa-zɛbɛsu yeei.¹²Geeɠɔlɔgi ɠa ga ɗɔnɔ, zooi ɓalaagi ɠa ga ɗɔnɔ,ta eteai, é ɓɔ su aniiti kpein ba, ɗa ɠa è ti ɓɛtɛni.¹³Ɗa ɠa è lɛkpɛmaʋɛti kpɛtɛa, nu ɠɔʋɛzu ʋelei, ta nu yeezazu ʋelei,Taɓɔɔl gizei ta Ɠɛɛlɛmɔn gizei, ta wooɠula ga koozunɛɛi è-laaseigi ʋɛ.¹⁴È-yeei maaɠiliʋɛ ga zɛbɛi,è yeezuɓaaʋɛ,è-yeezai wuzeɠeʋɛ.¹⁵Ɗa-masa kpɔkpɔgi ma wuulaagi ɠa ga telebodai ta sɔledai.Wooɠɛɠiladai ta gaamai, ta ziɛzu è ɠakalaʋɛ.

¹⁶Ee, undaanɛ nuɓusɛ ɠa ga naati, niiti ti zoogai è maamusɛzu!Ɠɔoɠɔ GALAGI, ta ziɛ ɗa-wozakalagi ɠa è ɠaazu.¹⁷Ta ɠoozunɛ yeenɔpɛ, tɔɔzei ɗa ga ta-ƓALAGI.Ɗa-lelebodai zaɓui zu ɠa ta wuzeɠe la.¹⁸Mazɔlɔɔ ɗa ɠa è ti-zɛbɛi ɠulazu kɛlɛma, é volo,è-zaalai zu ɠa gi pilɛ sɔlɔɔsu da.¹⁹Gi makɛ nui ɠa Ɠɔoɠɔ GALAGI yeezu,gá-masagi ɠa Izilayɛle ná-GALA Ɲadegai yeezu.

²⁰Mɔungi, è ɓɔɛni kulakɛlɛmai zu, è ɠɛ ɗa-wooɠɛɠila nuiti ma:«Gè kpɔba veeni kɔɔɠuluɓai taɠila bɛ,gè zunu loungoi ta wuzeɠeni nuɓusɛiti saama,²¹gè Davide ɠaani, gè ɠɛ é ɠɛ ga nà-botiɠɛ nui,gè nà-gulɔ ɲadegai ziɛni ma.²²Nà yeeyɛ ba,nà iɲɔdɔ.²³Sili nuiti ti la ɠula filiba eyɛsu pɛ,faa ɲɔu ɠɛ nui la zeiɗa unda.²⁴Nà sili nuiti kpein dɛɛvɛ tuɠɔ,gè maayoseɠe nuiti koloɠolo.²⁵Nà-wooɠɛɠiladai ta nà-nuɓɔɠɔlaiti ta ɠɛ tɔun ba,ná-zobogi zu ɠa wɔɔlɔ, dàaseigi ʋɔ.²⁶Nà kpoloɗɛi lɔ zeezu, é zei unda,toɠa masadai ɠɛ ziɛ wolaiti unda.²⁷Toɠa wooɠula mà, é ɠɛ mà:‹Ɗa ɠa è ga Kɛ̀ɛ, nà-GALAGI, nà-kizo fasai!›²⁸Nɔ̀un nà, nà tɔun kɛ ga dòun zunu mɔungi,nii bɔɔlɔai é leʋe masagiti kpein ba eteai zu ná pɛ.²⁹Nà nà-wooɠɛɠiladai makɛ bɛ eyɛsu ɠɔ,nà-minazeɠegi gè boni tɔun bɛ, naa la valiboga eyɛsu ɠɔ.³⁰Nà mavofodai makɛ eyɛsu ɠɔ,ná-masa kpɔkpɔgi ɠa lɛbi, eɠɛ geeɠɔlɔgi.

³¹«Ni tanisu mavofodaiti ta ɠɛlɛna nà-tɔgi ʋa,ti la ziɛni ga nà-deveiti,³²ti nà-deveiti koloɠolo,ti la ɠoloni nà-tɔgiti bɛ,³³nà tukpɔi zeɠe, gè ta-lɔ koloɠologi maaɠolo,nà ta-vaaɠaaza golai zale ga doɠai.³⁴Kɛlɛ gè la ɓega nà-nuɓɔɠɔlai ʋa tɔun bɛ.Gè la zeɠea nà-wooɠɛɠiladai ʋolu, eyɛsu ɠɔ.³⁵Gè la nà-minazeɠegi ɠoloɠologa,gè la ɓalaa naa maavaliboga ɲɛgɛlɛin, nii kulaai dàaʋɛ.³⁶Gè ɠonani, ná ɠɛ ɠila nà-ɲadedai ma,ɓa-o, gè la zɛɛ woga Davide ma.³⁷Mavofodai ɠa yɛ ná ɠɔ,ná-masa kpɔkpɔgi ɠa yɛ gàazu eɠɛ foloi,³⁸toɠa zei eyɛsu ɠɔ eɠɛ alugi,nii é ga wooɠɛɠila zeelei tonaɓiingi ʋolu.»Lo!

³⁹Anɛɛ naa ʋe, è masagi yɛni na, è ɠɛlɛ ba,nii è gulɔ ɲadegai ziɛni ma, è yiiɠaawanani ma!⁴⁰È ɗa-minazeɠegi ɠoloɠologa, nii è seɠeni ɗa-wotiɠɛ nui ʋɛ,è ná-masa bɔɔlɔgi ɠɔzɔa, è pili zooi ma.⁴¹È zeɠei wɔa ná-siɠigiti kpein ba,è ná-siɠigiti koloɠologa.⁴²Teʋe nuiti kpein ti loa su,seiɲɔɠɔiti ti ɗa ɲɛɛɠula su.⁴³È sili nuiti iɲɔdɔɔni,è wɔinzeɠe nuiti daave ga koozunɛɛi.⁴⁴È ná-boɠa zɔkpɔi zeɠeni pelei ʋa, pilisuʋɛ,è la loni polu kɔɔɠɔ ziɛgi zu.⁴⁵Ʋelei é ɠɛa volozu la, è naa ɠaaʋa,è ná-masa kpɔkpɔgi ʋiliga ya zooi ma.⁴⁶È ná-nu niinɛlai ma voloiti suɓuɠaa,è maaɓɔlega ga unfegi.Lo!

⁴⁷Ɠɔoɠɔ GALAGI, ɗa yɛsu dɔɔɠui zu, eyɛsu yeelɛ,ɗa-yiiɠaawanai ɗa so, eɠɛ abui?⁴⁸Ɠizɛ su ga nà-eteai zu la ɠoozani,è nuɓusɛiti kpɛtɛʋɛ wafuun ɓaa?⁴⁹Nui ɓɛgele ɠa a zoo é zɛnvui wo, é la saai ɠaa?Ɓɛ ɠa a zɛnvui ɠula gɔvɛalaazu ná-zobogi ya?Lo!⁵⁰Maliɠii, mini ɠa ɗa-nuɓɔɠɔlai ná, è ti ɠɛɛni mɔungi zu?Ɗa-wooɠɛɠiladai zu, è ma minazeɠegi woni è ɠona Davide ʋɛ.⁵¹Maliɠii, ɠizɛ ɗa-wotiɠɛ nuiti ta-unfegi zu,ɠizɛ nuɓusɛ mɔinmɔingiti su, ti-ma ɠasɔi laani ùnma.⁵²Ɠɔoɠɔ GALAGI, ɠizɛ su ga è zili nuiti ta ɓaaɠulamai ɠɛɛzu,ta ɓaaɠulazu zunui naa ma, nii è gulɔ ɲadegai ziaai ma!

⁵³Mamagi ɠa Ɠɔoɠɔ GALAGI ʋɛ eyɛsu ɠɔ!Amina! Amina!

Guyeiti 89 / tod_pbt

Minazeɠegiti ta mini,niiti ti ɠɛɛni Davide ʋɛ?

Guyeiti89tod_pbt