Read Guyeiti 88

Guyeiti88tod_pbt

Nui nii é saa yeɠei la, naa ná-GALA falii

¹Kolé mavofodaiti ta-wuyei. Guye loo ɠundiɠii nɔnɔi ʋe. Nii é loozu koolei bu. Ezela nui Ɠeman ná-kidafaawui.

²Ɠɔoɠɔ GALAGI, nà-kizo GALAGI!Nà kpeei loozu foloi ta kpidii è ɠaazu.³Nà-maanɛɛnɛ wooi lɛ, é zeeli è ma.Woilo nà-kpee wooi ma.⁴Ungo, maanɔɠɔi kula ɠɛa ga ze,gè maaɓuɠa saai ʋa gola.

⁵Nɔ̀un gàalugɛ niina naati saama, niiti ti yeizu kabayeɠei zu,gè ɠɛa eɠɛ zunui, nii zɛbɛ nɔpɛ ge la mɔ ba.⁶Nà niina laani gɔvɛiti saama, eɠɛ poomaiti ti laani kabayeɠei zu.È yeemaai ti ma, è-ɠi ge la mɔ ti zu, è la mɔ faa nɔpɛ kɛɛzu ti ʋɛ.⁷È dɔ̀a zeɠei ɓomaʋɛ,saai ɓomaʋɛ ma ɓidii zu.⁸Ɗa-yiiɠulagi zeelia mà,ɗa-yiiɠaawanai zeelia mà eɠɛ ziɛ lakpatakpagiti.Lo!⁹È màaɠooza sìɛɲɔɠɔiti ba, gè ɠɛa ti ʋɛ eɠɛ maalua ani,nà-maanɔɠɔi daaɠuluga mà, gè la zooga gè ʋa ɠula su.¹⁰Gàazuɠɛzɛi ɓɔiɗa su ga ziizoolɛi.Ee, Ɠɔoɠɔ GALAGI, nà wooɠulazu è ma, yeenɔpɛ!Nà zèeiti tɛɛzu è ma.¹¹Gɔvɛiti ka ɗa laavɔɔ vaiti kɛ ti ʋɛ?Gɔvɛiti ka ta wuzeɠe, ti ɗa è lɛbi?Lo!¹²Ɗa-nuɓɔɠɔlai ɠa wo nɛi kabayeɠei zu,ta ɗa-wooɠɛɠiladai undaaʋili zeɠezaɠai zu?¹³Ɗa-laavɔɔ vaiti kwɛɛgɛ nɛi kpidii zu,ta ɗa-lelebodai zooi zu, ʋɛ zeemai wogai ná ma?

¹⁴Nɔ̀un nà, ee, Ɠɔoɠɔ GALAGI, ɗa ɠa gè è lolisu ga è ɓɔ bà.Nà nà-maanɛɛnɛ wooi laazeelizu è ma, sobu-o-sobu.¹⁵Leeni vaa zu, ee, Ɠɔoɠɔ GALAGI, è pìlisu ya?Leeni vaa zu è ɠaazulɔɔɠuzu ga è mina kà?¹⁶Mazɔlɔɔ màawɔinʋɛ, nà niina saai ɠoba,é tɔɔzei nà-doungo ziɛgi zu ma, eyɛsu niizu,nà lɔɔzu maalua vai zu, nii è seizu mà,sàsuɓalia gola.¹⁷Ɗa-yiiɠaawana abui soga nɔ̀un ba,gè ɠoloɠologa ga ziizoolɛi, nii é zeelizu mà, é zeɠe è ʋɔ bɛ.¹⁸Eɠɛ ziɛiti ti màaɓɔlesu folo-o-folo,ta latisu mà mini-o-mini.¹⁹È gàazuɠwɛɛgiti ta bɔ̀ɔlaiti maaɠooza bà.Kpidii ɠila kpe nɔ ɠa é ga sìɛpoluɲɔɠɔi niina.

Guyeiti 88 / tod_pbt

Nui nii é saa yeɠei la, naa ná-GALA falii

Guyeiti88tod_pbt