Read Guyeiti 86

Guyeiti86tod_pbt

Nà-kidaaʋiligi zu, nà wooɠulazu è ma

¹Davide ná-GALA falii.
Woilo gòoi ma, Ɠɔoɠɔ GALAGI, è gòoɠaaʋote,mazɔlɔɔ màawɔinɗa, gè ɠɛ ga bala nu.²Ʋa è zɛ̀nvui makɛ, mazɔlɔɔ gìliʋɛ è ʋa.Ɗɔun ɗa ga nà-GALAGI, nà ga ɗa-wotiɠɛ nui, é ɠalivaazu è ma, ʋa è kìzo.³Ee, Màliɠii, zaalai la mà,yeenɔpɛ nà wooɠulazu è ma.⁴Ɗa-wotiɠɛ nui ɠoozunɛ,mazɔlɔɔ è ʋɔ pelei ɠa, Màliɠii, gè ɠaaʋotegai ná.⁵Ungo, Màliɠii, è ʋagɛ, ɗa ɗa maavaayɛgi wo fala,è ɓɛtɛʋɛ wooɠɛɠiladai zu naati kpein tetema, niiti ti wooɠulazu è ma.⁶Woilo nà-maanɛɛnɛ wooi ma, ee, Ɠɔoɠɔ GALAGI!Woilo, siɛgi zu gè è valizu la!⁷Nà-kidaaʋili foloi zu, ɗa ɠa nà ɗa wooɠula è ma,mazɔlɔɔ ɗa ɠa ɗa gòoɠaaʋote.⁸Màliɠii, galagi tanɔpɛ ge la ga è ɠɛʋele,tanɔpɛ ge la zooga, é ʋa naa ɠɛ, nii è kɛa.⁹Ɗa ɠa è ziiti kpein kpɛtɛai, ta ʋa, ti nɔkɔ è ɠɔɠɔwu, Màliɠii,ti lɛbiyai ve è ʋɛ.¹⁰Mazɔlɔɔ è wɔɔlɔʋɛ, ɗa laavɔɔ vaiti kɛɛzu,ɗa ɠa è ga GALA kite ɠila kpegi.

¹¹Ee, Ɠɔoɠɔ GALAGI, pelei lɛ ga ze, nii è pɔ ga gè ziɛ la!Nà ziɛ ɗa-ɠaamai zu.Naama ɠi gila kpegi ve bɛ̀, gè ɠolo ɗa-zobogi ʋɛ.¹²Nà è maamusɛzu ga zìimaʋɛ pɛ, Màliɠii, nà-GALAGI!Nà è-laaseigi lɛbi yeenɔpɛ.¹³Mazɔlɔɔ ɗa-wooɠɛɠiladai zuwɔɔlɔʋɛ nɔ̀un tetema,ɗa zɛ̀nvui unmɔɔsu, è kula gɔvɛalaazu ɓomaʋɛ.

¹⁴Ee, GALA, waso nuiti ti wuzeɠea dàalɔɠɔma,zunu ɓulugiti ta gaiziɛzu ga ti pàa.Ti la seizu veezu è ʋɛ ta-ɠisiɛiti su.¹⁵Kɛlɛ, ɗɔun Màliɠii, ɗa ga maawɔinɠa ƓALAGI, nii é zaalai veezu,zii la ɠula fala, kpɛtɛai nuɓɔɠɔlai ta wooɠɛɠiladai zu.¹⁶Ɠaaʋote nɔ̀un ma, è zaalai la mà!È-zɛbɛi ve bɛ̀, nɛ̀i gè ga ɗa-wotiɠɛ nui.Ʋa è ɗa-wotiɠɛ anzanui ná-doun zunui ɠizo.¹⁷Ɗa-nuɓɔɠɔlai ma ʋoogi ta ve bɛ̀,niiti ti wɔ̀inzeɠezu, ti ka, ti lɔ unfegi zu.Mazɔlɔɔ ɗa ɠa Ɠɔoɠɔ GALAGI, è ɓɔsu bà, è gàanɛɛnɛ.

Guyeiti 86 / tod_pbt

Nà-kidaaʋiligi zu, nà wooɠulazu è ma

Guyeiti86tod_pbt