1Guyei. Azafe ná-guyei.2Ee, GALA, mina yɛ maaɠɛkpɔgi zu!Mina maaɠɛ kpɔ, mina zei kpɛ, ee, GALA!3Mazɔlɔɔ è zili nuiti ti ɓakaga,niiti ti è wɔinzeɠezu, ti tɔungiti buzeɠea.4Ta ɓɔɠɔ ɠaazu ɗa-nuɓusɛiti daalɔɠɔma,ti ɗa yaavai ɓɛtɛ ɗɔnɔiti daalɔɠɔma, niiti è ti makɛsu.5Ti ɗa ɠɛ ma: «Ade ti-ma zuwu ɠaaleʋe, ti-ma zii ɲɛɛlɛ,naa ɠa a kɛ, Izilayɛle laaseigi loo ya, zeemai wo ma eyɛsu ɠɔ!»6Ta unpilɛsu, ti zoloo ma ɠi gilagi zu,ti minazeɠegi wo è laalɔɠɔma.7Tiya ɠa ti ga, Edɔme nuiti, ta Isemayɛle nuiti,ta Ɠagaal nuiti, ta Moaɓe nuiti,8ta Geɓale nuiti, ta Amɔn nuiti, ta Amalɛke nuiti,Filisiti nuiti, ta Tiil nuiti,9Asiili nuiti ɓalaa ti ɓɔni ti ʋa,ti yeeveeni Lote mavofodai ʋɛ.Lo!10Ee, GALA, ti zo, eɠɛʋelei è Madiyan nuiti soni da,ta Sisela, ta Yaɓin, Kison kɔtuɗɛi ʋɔ bɛ!11Ti ɠoloɠoloni En-Dɔɔl,ti ɠɛni ga kpoɠa pɔlɔi zooi ʋɛ.12Ta-zeizumaanɛgiti so, eɠɛʋelei è Wolɛɓe ta Zeebeni soni da.Ta-ɠundiɠiiti so, eɠɛʋelei è Zeɓa ta Salamunani soni da,13tɛiti ti ɠɛni ɠɛɛzu ma: «Ade GALA ná-zooiti so, ti ɠɛ ga adɔnɔ!»14Nà-GALAGI, ti ɠɛ ga tɔngɔlɔ fiilɛi ɠɛʋele,ti ɠɛ ga daazaɠagi, nii fiilɛi liizu la.15Pelei abui dɔɓɔi ɠalazu la,pelei abuzogi sosu da gizei ʋa,16ʋilɛ ti ʋolu ɠana ga ɗa-viilɛ wolai,ɗa-viilɛ wolai ti maalua ɠana!17Ee, Ɠɔoɠɔ GALAGI, unfegi lɔ ti-ɠaazuʋɛ,naa ɠa a kɛ, ti è ɠaiziɛ.18Unfegi lɔ ti-ɠaazuʋɛ, ti zasuɓali eyɛsu ɠɔ,ti undaaʋili ɓaaɠula ti ma.19Ti ɠɛ kwɛɛ ga, ɗa ɠila kpe, ɗɛi è-laaseigi ga Ɠɔoɠɔ GALAGI,ɗa ɠa è Anii-Pɛ-Unda, eteai zu ná pɛ!