Read Guyeiti 77

Guyeiti77tod_pbt

GALA ge valiboga ɓaa?

¹Guye loo ɠundiɠii nɔnɔi ʋe. Eɠɛʋelei Yedutun la. Azafe ná-guyei.

²Nà ɓainsu, gè wooɠula GALA ma,GALA ka gè wooɠulazu ma, goilogɛ pɔ̀ pelei.³Nà ɠɛna kidaaʋiligi zu, nà ɗa wooɠula Màliɠii ma.Kpidii laawu ɲɛgɛlɛin, zèe lɛɛʋɛ tɔun pɔ pelei,nà ɗa ɠɛlɛ gaanɛɛnɛ vai ʋa.⁴Nà ɠisiɛna GALA su feya, nà ɗa tɔɔzei ga kpalagi woga.Siɛgi zu nà ɠigaiziɛna la, ìɲɔ ka ɗa leʋe.Lo!⁵Ɗa gàazu ɓaazu, gè la pɛa ma mɛɛ.Zìiɓɔlɔni, gè la ɠɛni kwɛɛ, nii nà bo.⁶Nà ɠisiɛzu wɔlɔwɔlɔi ma voloiti su,ta konagiti su ti leʋegai na kaite.⁷Kìgi loo nà-guyei zu kpidii,gè ɠisiɛ zìimaʋɛ, zìi gaazaɠagi wo ga:⁸«Maliɠii ɠa ɠɛlɛ bà eyɛsu ɠɔ ɓaa?É la mɔ yeezeiɗa bù eyɛsu pɛ ɓaa?⁹Ná-wooɠɛɠiladai ɓela kana ɓaa?Nii é bosu, naa ɠoloɠologa eyɛsu ɠɔ ɓaa?¹⁰GALA ge yeema gi maawɔinɠaa vai ma ɓaa?Ná-ziiɠaawanai zu, é yiilaaɠuluga gi luɠɔ?»Lo!

¹¹Wɛlɛ, nii gè bosu: «Nii ɠa é ga nà-kpɔlɔi ma ungi:GALA nii é Anii-Pɛ-Unda, é la mɔ faiti kɛɛzu ga mɔungi ɠɛʋele.»¹²Nà ɠitoo Ɠɔoɠɔ GALAGI ɠɛɛ vaiti su.Ungo, gè ɗa ɠizɛ laavɔɔ vaiti su, ti leʋegai.¹³Nà ɠisiɛzu ɗa-ɠɛɛwotiiti su.Gè ɠida ɗa-vaa wolaiti bu.¹⁴Ee, GALA, ɗa-vaiti ɲadegɛ!Galagi ɓɛgele ɠa bɔɔlɔai ga GALA kɛʋele?¹⁵Ɗa ɠa è ga GALAGI nii é laavɔɔ vaiti kɛɛzu.È ɗa-zobogi ɠulani kɛlɛma zii ɠiligiti saama.¹⁶È yeelokoi ɠa è ɗa-nuɓusɛiti unmɔɔni da,Zakɔɓe mavofodai ta Zozɛfe mavofodai.Lo!

¹⁷Ee, GALA, ziɛiti ti è ɠaani!Ziɛiti ti è ɠaani, ti zasuɓali.Ungo, paliiti ti ɲiikpini.¹⁸Tonaɓiingiti ti tonai ʋuuni,tonai kpunɛni, tona togai ma viilɛi zu,ɗa-mɛɛinti ti ɠɛni ɠoʋesu mini-o-mini geezuʋɛ.¹⁹Ɗa-lona ɓunɛ tugi ʋɔ, tɔngɔlɔ fiilɛi zu,mainmainti ti eteai zu ɠɛɛni kala,eteai ɲiikpini, é ɓali.²⁰Ɗa-ʋelei ɠɛni kpoloɗɛi wu,ɗa-ʋele goiti ti ɠɛ ziɛ wolaiti bu,nu nɔpɛ ge la è-ɠɔɠɔ ʋogiti kaani.²¹È loni ɗa-nuɓusɛiti untuɠɔ eɠɛ baala kpulugi,ga Moize ta Aalɔn maaʋele.

Guyeiti 77 / tod_pbt

GALA ge valiboga ɓaa?

Guyeiti77tod_pbt