Guyeiti72tod_pbt
GALA maanɛɛnɛi é wosu masagi ʋɛ
1Salomɔn ná-guyei.Ee, GALA, fe masagi ʋɛ, é tukpɔi ɠaaleʋe ga è ɠɛʋele,ɗa-lelebodai ma ɠigi ve masagi tɛi zea.2Toɠa ɗa-nuɓusɛiti tukpɔɠaaleʋe ga telebodai,ta sɔledai maanɔɠɔ nuiti tetema.3Ziilɛigi yei é zeɠe gizeiti ma,ta telebodai gize goiti ma,ti ɠɛ ga nuɓusɛiti pɛ tɔnɔ.4É sɔle fai ɠɛ maanɔɠɔ nuiti bɛ,é bala nuiti ti-lointi kizo,é naati kpɔlɔ nui wolowolo!5Ni nɔ foloi ɠa dɛ toozu, toɠa yɛ vulua,ni nɔ alugi ɠa dɛ volozu,eyɛsu yeeɠɛɠalaiti ti ɓe.6Masagi ɠa ɠɛ eɠɛ tonai é ʋuuzu wozawoliai zu,eɠɛ duɓui é zooi yɛɓɛzu.7Ná-foloiti su, telebodai ɠaa ɠa wɔɔlɔ,ziilɛigi zu ɠa wɔɔlɔ, ni nɔ dɛ alugi ɠa volozu.8Toɠa masadai ɠɛ é zo kpoloɗɛi ʋa, é zei kpoloɗɛi ʋa,é zo ziɛ wolai Efelate ma, é li zou ɓela ga.9Nuiti ti zeini teʋebai zu, naati ta ʋilɛ ɲiibiɠa, ti nɔkɔ bu,sili nuiti ta fufiligi ɠɔmɔ.10Taalasise masagiti ta ziɛ zaama yooiti ma masagiti ta ʋa pɔ bɛ ga maazoloo ganiiti,Saɓa yooi ta Seɓa yooi ma masagiti ta ʋa pɔ bɛ ga ta-vebɛaniiti.11Masagiti kpein ta nɔkɔ bu, ti dɛbi,ziiti kpein ta ɠɛ ga ná-botiɠɛ nuiti.12Mazɔlɔɔ toɠa bala nui unmɔɔ, nii é kpɔba ɠaiziɛzu,ta maanɔɠɔ nui, nii kpɔba nu la bɛ.13Toɠa zɛbɛsulala nuiti maawɔinɠa ta bala nuiti,toɠa bala nuiti zɛnvui ɠizo.14Toɠa ti unmɔɔ, é ti ɠula toomai ta maanɔɠɔi zu,mazɔlɔɔ ti-yɛnvui ɠa vizɔ gaazu gola.15Masagi yɛnvui zuɠooza!Toɠa zanugi zɔlɔɔ, nii é ga Saɓa yooi zu gelei.Nuiti ti GALA maanɛɛnɛ bɛ yeenɔpɛ,ti ɗa tuyai lo bɛ yeenɔpɛ su.16Moloi ɠa ʋooʋa zooi zu,moloi ɠa ʋɛɛ mɛɛ gizeiti ma,su ɠa wɔɔlɔ eɠɛ Liɓan ɠizeiti ma,nuiti ta mɔin eɠɛ zooi zu lufaiti.17Daaseigi ɠa yɛ ná ɠɔ!Ni nɔ dɛ foloi ɠa toozu, tɔɠɔi ɠa ɠula, maawoo ziɛ adaʋɛ pɛ!Siɛgi zu nuiti ti tuya loozu la ɓɔɠɔ ʋɛ ti ɠilagilagi, ta daaseigi wo.Ziiti kpein eteai zu ta ɠɛ ma undaanɛ nui!18Mamagi ɠa Ɠɔoɠɔ GALAGI ʋɛ,Izilayɛle ná-GALAGI,tɔ ɠila kpe ka a ɗa laavɔɔ vaiti kɛ!19Eyɛsu ɠɔ, mamagi ɠa GALAGI ʋɛ,é volozu, ná-lɛbiyai ma voloi eteai kpein sulaave!Amina! Amina!20Ʋɛ ɠa Izayi ná-doun zunui, Davide ná-maanɛɛnɛiti kwɛgai ná.