Read Guyeiti 71

Guyeiti71tod_pbt

Mina yeeɓe nɔ̀un ba pɔlɔzaɠa siɛgi zu

¹Ee, Ɠɔoɠɔ GALAGI, ɗa ɠa gè lɔɔɠuzu è ʋoluʋɛ,màkɛ eyɛsu pɛ, gè mina lɔ unfegi zu.²Ɗa-lelebodai zu, ùnmɔɔ, è fìe!Woilo gòoi ma, è kìzo!³Ɠɛ bɛ̀ ga fasai, nii é bɛ̀ ga dɔ̀ɔɠuzuʋɛ,è devei veeni zèa, ga gè ʋa ná yeenɔpɛ, nii a kɛ gè ɠizo,mazɔlɔɔ ɗa ɠa è ga nà-fasai ta nà-siɠigi.⁴Ee, nà-GALAGI, kìzo nu ɲɔi yeei ma,ta telebotala nui, nii zii ɲɔuɗai.⁵Mazɔlɔɔ Màliɠii, Ɠɔoɠɔ GALAGI, ɗa ɠa è ga nà-kitogi!Nà-kitogi ɠa ga ɗe, é zo nà-doungo ziɛgi zu ma,⁶kaite dèe ɠoozu gè ʋoluzeini è ʋa,kaipa gè zɔlɔɔni, ɗa makɛsu mà,yeenɔpɛ nà-maamusɛi ma ungi ɠa ga ɗe.⁷Nà nui ma mɔinmɔin gaazu ga laavɔɔ anii,dɔɔɠuzu ɠitei ɠa é ga ɗe.⁸Dàaʋɛ laave ga ɗa-maamusɛi,folo-o-folo é ɗa ɗa-lɛbiyai ɠula kɛlɛma.

⁹Mina pìli ya pɔ̀lɔzaɠa siɛgi zu,siɛgi zu sɛ̀bɛiti ti ɠulazu la zèa, mina ɠɛlɛ bà!¹⁰Mazɔlɔɔ nɔ̀un sili nuiti ta sùɠulazu,ta nɔ̀un gaaʋɛɛnɛsu zɛ̀nvui vaa zu, ta ɓɔɠɔ ɠaazu,¹¹ti ɠɛ ma: «GALA ge ɠɛlɛa ba,à ʋilɛ polu, à so!Nu nɔpɛ ge la fiega.»¹²Ee, GALA, mina maaɠooza nɔ̀un ba!Nà-GALAGI, ʋa ga suvilɛ, è ɓɔ bà!¹³Ti unfe, ti zuwuɠaaleʋe,niiti ti pèelalazu!Ɓaaɠulamai ta unfegi ti maaɓɔle,tɛiti ti wɔinɗai ga nà-maanɔɠɔ vai!¹⁴Nɔ̀un nà, kìgi logɛ è ʋa yeenɔpɛ.Nà yɛ è lɛbizu yeenɔpɛ nɔ.¹⁵Dàaʋɛ ɠa ɗa-lelebo fai wo,ta ɗa-ɠizo fai folo-o-folo,mazɔlɔɔ gè la ti-liegɔ ɠwɛɛ.¹⁶Nà liizu ga luɠɔʋelei, ɗa-vɔnifaamai ʋɔ,Màliɠii, Ɠɔoɠɔ GALAGI!Nà ɗa-lelebodai ɠila kpe nɔ ɠula kɛlɛma.

¹⁷Ee, GALA, è kàlani, é zo nà-doungo ziɛgi zu ma,eyɛsu niizu, nà ɗa-vaa maanɛɛnɛgiti bosu.¹⁸Anɛɛ ɓalaa gè wɔlɔzaɠa pa, nɔ̀ungi ɠole,ee, GALA, mina ɠɛlɛ bà,naa ɠa a kɛ gè è-zɛbɛi ma vaiti bo niima ziɛgi zu nuɓusɛiti ma,gè ɗa-ɠaaɓaai lɛ ga naati kpein, niiti ti ʋaazu.¹⁹Ee, GALA, ɗa-lelebogi ɠwɛ ge la ba,è faa ʋagɔ wolaiti kɛɛni!Ee, GALA, ɓɛ ɠa é ga è ɠɛʋele?²⁰È ʋoluɠulai zeiʋɛ gi ma, ga kidaaʋiligiti ta maanɔɠɔiti.Kɛlɛ ɗa zɛnvui veezu gi ya ʋolu,ɗa mɛ̀ɛn, è kùla zeɠezaɠai ɓomaʋɛ.²¹Ɗa nà-unfemai ve zèa mɔnɔ,è gàanɛɛnɛ mɔnɔ.²²Nɔ̀un, nà lati niina, gè è maamusɛ ga kɔnigi wooi,ɗa-wooɠɛɠiladai maaʋele ma, nà-GALAGI.Nà ɗa-lɛbiyai maamusɛ ga papai,Izilayɛle ná-GALA Ɲadegai!²³Dàkɔlɔgiti ta è maamusɛ,siɛgi zu gè guyei loozu la è lɛbi vai zu,ga zìimaʋɛ pɛ, nɛi è ùnmɔɔgai.²⁴Folo-o-folo, nɛ̀gi ɠa ɠɛ ɗa-lelebo fai wosu,mazɔlɔɔ ti-ɠigi zupua, ti maaɓɔle ga unfegi, tɛiti wɔin ɠɛni ti ma ga ti màanɔɠɔ.

Guyeiti 71 / tod_pbt

Mina yeeɓe nɔ̀un ba pɔlɔzaɠa siɛgi zu

Guyeiti71tod_pbt