Read Guyeiti 7

Guyeiti7tod_pbt

Ɠɔoɠɔ GALAGI potokulai wo bɛ̀

¹Davide ná-maawɔin wuyei, é tooni Ɠɔoɠɔ GALAGI ʋɛ, é ʋilɛ Kuse ʋa, Ɓɛnzamɛn nui.

²Ɠɔoɠɔ GALAGI, nà-GALAGI, nà lɔɔɠuzu ɠaiziɛzu è ʋɔ bɛ,kìzo wɔ̀inzeɠe nuiti kpein ma, ùnmɔɔ,³nii a kɛ ti mina bàli ga eɠɛ zalai,nii a ɗa li ga anii, nu la kula zea.

⁴Ee, Ɠɔoɠɔ GALAGI, ná-GALAGI, ni gè naa ɠɛɛʋɛ,eɠɛʋelei ti pèelalazu la, ni gè ɲamaba vaa ɠɛɛʋɛ,⁵ni gè ɓaaɠogɛ bɔ̀ɔlai ta ma,ni gè sìli nui ta maavoogɛ, un ge la ba,⁶naazu sìli nui ʋilɛ pòlu, é sò,é ɠɔɠɔlo mà,é nà-lɛbiyai ɓokpo fufiligi zu.Lo!

⁷Wuzeɠe, Ɠɔoɠɔ GALAGI, ɗa-yiiɠulagi zu,wɔ̀inzeɠe nuiti ta-yiiɠulagi laalɔɠɔma, ɠaaɓa mà,ɗɛi è faa zɔle fai leveai!⁸Ziiti ti maaɓɔ è-maaɠoolii zu,ɗɔun ɗa zei ti unda, è yɛ zeini naa maazuʋɛ, ɗa-masa kpɔkpɔgi ɠa.⁹Ee, Ɠɔoɠɔ GALAGI, ɗɛi è ga ziiti pɛ tukpɔɠaaleʋe nui,tukpɔi lo bɛ̀, kɛ eɠɛʋelei nà-sɔledai la.É ɠɛ bɛ̀ eɠɛʋelei nà-sɔbalalai la.

¹⁰Pele ɓesa faa ɲɔu ɠɛ nuiti ta-vaa ɲɔi luɠɔ,telebo nui ɠɔɠɔ losu ɓɛtɛ,ɗɛi è nuiti ziimaʋɛ ʋɛtɛsu, ta ta-ɠisiɛi,telebo GALAGI.¹¹GALA ka é ga nà-kɔɔɠɔ zɛpɛgi.Nii zii zɔlegai, toɠa naa ɠizo.¹²GALA ka ga tukpɔɠaaleʋe nui nii sɔlegai,nii a ɗa ná-ziiɠaawanai ɠula kɛlɛma voloi faaɠaazagi a ɠɛ la,¹³nui naa laalɔɠɔma, nii é la ʋaazu pɔ.GALA ka ɗa ná-boɠa zɔkpɔi ɠaali,é ná-mɛɛin zumɛɛn, é kɛʋele ɓɛtɛ.¹⁴Toɠa kɔɔɠɔ zɔɔlaiti kpɛtɛzu nu ʋaa vai ma,é mɛɛinti kpɛtɛ niiti abui ti ʋa.

¹⁵Wɛlɛ, faa ɲɔu ɠɛ nui ɠa telebotalai ɠɛʋele ɓɛtɛzu,toɠa kogi zeɠezu ga faa ɲɔi, é sɔlɔɔ ga zɛɛ vai.¹⁶Toɠa zeɠei wɔɔzu, é bɔ,é loo zeɠei zu, nii é bɔai.¹⁷Ná-faa ɲɔi ɠa loozu tɔ ɓɔɠɔi unma.Ná-suɲɔulai ɠa loozu toʋalaʋɛ.

¹⁸Nà Ɠɔoɠɔ GALAGI maamusɛ ná-telebodai maaʋele ma,nà guyei loo Ɠɔoɠɔ GALAGI laaseigi lɛbi vai ma,GALAGI nii é Anii-Pɛ-Unda geezuʋɛ.

Guyeiti 7 / tod_pbt

Ɠɔoɠɔ GALAGI potokulai wo bɛ̀

Guyeiti7tod_pbt