1Guye loo ɠundiɠii nɔnɔi ʋe. Davide ná-guyei. Guyei.2GALA ge wuzeɠe, sili nuiti ti vaza,niiti ti maayoseɠezu, naati ti ʋela ba.3Ʋelei abu luului a ɗa ɲɛɛlɛ la, ɗa ti ɲɛɛlɛ ɠana,eɠɛʋelei kedoi ɠaa a ɗa wuun da abui ɠa,ʋele ɠana faa ɲɔu ɠɛ nuiti undaaʋilisu da GALA gaazu.4Naazu telebo nuiti ta ɠoozunɛ,ti wola ɠoozunɛ gola GALA gaazu,ta kpeei loozu ga koozunɛɛi.5À guyei loo GALA bɛ! À maamusɛ ga wa-wuye wooiti!À pelei la naa ʋɛ, nii é zeini tonaɓiingi ɠɔma eɠɛ sooi, é ɗa ziɛ la!Daasei ka ga «Ɠɔoɠɔ GALAGI». À ɠoozunɛ tɔun gaazu!6Tɔ ɠa é ga podointi ti-ɠɛɛ, poanzaiti maalobo nui,tɔ ɠa é ga GALA, ná-ada ɲadegai.7GALA ka ɗa pɛlɛyeɠei ve gilɛ nuiti bɛ,é ɓɔɠɔyeemalai ma ɠoozunɛɛi ve kasoɠa nuiti zea.Kɛlɛ kololala nuiti nɔ ɠa, ta ɗa yɛ ada vɔɔiti.8GALA, siɛgi zu è ɠɛni losu da ɗa-nuɓusɛiti untuɠɔ,siɛgi zu è ɠɛni ziɛzu la teʋebai zu,Lo!9zooi ɓalini, geeɠɔlɔgi ɠaawuunni, é ɠɛ ga ziɛi, GALA gaazu,Sinayi gizei ná-GALAGI, GALAGI ɠakala, Izilayɛle ná-GALAGI.10Ee, GALA, è ɗa-vaanɛɛ lonai ʋuuni.Ɗa-yooi nii gaaʋalani ba, è naa ɠɛʋele ɓɛtɛ ʋolu.11Ɗa-nuɓusɛiti ta zeini ná, ʋɛ è ti zeini ná ɗa-nuɓɔɠɔlai ʋɔ,ee, GALA, è naa ɓɛtɛni maanɔɠɔ nui ʋɛ.12Maliɠii woo ɠila boni,gaamago nɔ, woo niinɛ ʋagɔi ma ɠeelaiti ti ɠɛni ga kɔɔʋɛbɛ wolai,13kɔɔʋɛbɛiti ta-masagiti ti ʋela, ti ʋela,anzanuiti ti yɛni taazuʋɛ, naati ka ti aniiti gaaɠwɛɛni, niiti ti zogai kɔɔi zu.14Wa yɛsu nɔ laani togani ɠotai wu, wo ɗa looɠo?Poopogi ɠoʋegiti ti ɠolea ga walii,maaleɠai é ga bazii, naa ɠɛa ga zanugi.15Siɛgi zu GALA Zɛbɛi-Pɛ-Maliɠii masagiti suvazani da,kɔɔlɛ vukɔi ʋɛɛni Salamon gizei ma.16Ɓasan ɠizei, ɠa ga maaɲɛɛba ɠizei.Gizei nii nɔungi mɔinɗai, Ɓasan ɠizei,17leeni vaa zu, gizei, ɗɛi ɗɔungiti mɔinɗai, è toloi ɠulazu ga gizei,nii nɛai GALA bɛ ga é zei ma?Ɠɔoɠɔ GALAGI ɠa kɛɛzu ga seizuʋɛ, eyɛsu ɠɔ.18GALA ná-kɔɔɠɔ wotoloiti ta ga waa mɔinmɔingiti, nu la zooga é ʋa ti ɠaalu,Maliɠii ɠa ti zaama.Sinayi ƓALAGI ɠa seizu ɲadegai.19È lɛɛni naa maazuʋɛ,è ʋa ná ɠɛ ga è-zeizuʋɛ, Ɠɔoɠɔ GALAGI!È liini ga kɔɔ luɔiti,è vebɛaniiti seɠe nuɓusɛiti saama,anɛɛ kololala nuiti saama.20Mamagi ɠa Maliɠii ʋɛ,toɠa gi zeɠezu ga ɠasɔ, folo-o-folo.Naama ƓALAGI tɔna ka é ga gá-ɠizogi.Lo!21Naama ƓALAGI ɠa é gi ʋɛ ga kizo GALAGI,mazɔlɔɔ Ɠɔoɠɔ GALAGI, Maliɠii, toɠa zobogi bɛ é gi ɠizo saai ma.22GALA ka sili nuiti tɔungi wolowolo,zɔi siɛ ʋelei ɲɔuɗai, toɠa naa nɔundeɠai yɛ nɔunkalagi ma é golowolo.23Maliɠii ɠɛni ma: «Nà ʋaazu ga tiye, gè zeɠe ga tiye Ɓasan,gè ʋa ga tiye ti zeɠe kpoloɗɛi wuʋɛ,24naa ɠa a kɛ, è è-ɠɔɠɔi maagba ɲamai zu,ɗa-ɠilɛiti ta tɔnɔ zɔlɔɔ, è zili nuiti ma ɲamai zu.»25Nuiti ta ɗa-ʋɛbɛi ziɛzuʋɛ ɠaazu, ee, GALA,nà-GALAGI, ɗa-ʋɛbɛi ziɛzuʋɛ, nà-masagi, ɗa-ʋɛbɛi ɗa ziɛ, é ɗa li seizu ɲadegai.26Guye loo nuiti ta loni ti untuɠɔ, naa ʋolu, niiti ti gɛingɛin ganigiti gɛinsu,zaamazuʋɛ ɠa anzalopoiti ti loni ná, tamadegiti ti ti ya, ti ɗa gɛin.27Ti ɗa ɠɛ ma: «À GALA mama wa-ɠaalɛbaiti su,à Ɠɔoɠɔ GALAGI mama, wɔiti wo ɠulaai Izilayɛle ma zuwui zu!»28Wɛlɛ Ɓɛnzamɛn ʋa, nii dɔiɗai ti zaama, é loni ti untuɠɔ,naa ʋoluma Zuda wolodamai ma ɠundiɠiiti, ti maaɠiliai ta-zeɠe zuʋuaiti su,naa ʋoluma Zaɓulɔn nɔnɔ ma ɠundiɠiiti, é ɓɔ Nɛfɛtali nɔnɔiti ba.29Ɗa-ƓALAGI devea ga é zobogi ve è ʋɛ.È zɛbɛi naa wɔɔlɔ, nii è kɛa gi ʋɛ, ee, GALA!30È zei ʋɛlɛi nii é zɛlɛni Zeluzalɛme maazu,masagiti ta ʋa miná ga vebɛaniiti è ʋɔ.31Zelii lo seeligi zu zuai ma,ta nikɛ zinɛ ɓulugi, é ɓɔ nuɓusɛiti ta-nikɛ yiʋoiti ba.Ta ʋaazu ti nɔkɔ è wu ga ta-wali ɠaeiti.Ʋa è niima nuɓusɛiti suvaza, tɛiti kpein kɔɔ vai nɛai ti ʋɛ!32Nu wolaiti ta ʋaazu, ti zeɠe Ezipete yooi zu,Etiyopi nuiti ta ɓizɛzu, ti ʋa GALA pɔ bɛ, ti yeemaale tɔun ma.33Etea masadai zu nuɓusɛiti kpein, à guyei loo GALA bɛ,à guyei loo Maliɠii wɔɔlɔ vaa ma.Lo!34À guyei loo naa ʋɛ, nii é zeini geeɠɔlɔgi ɠɔma eɠɛ sooi, é ɗa ziɛ geeɠɔlɔ pɔlɔmai maazuʋɛ!Wɛlɛ, toɠa wooɠulazu, gooi ɠaaɓaingai.35À GALA ná-zobodai zuɠwɛɛ!Ná-bɔɔlɔlai ɠa volozu Izilayɛle maazu,ná-zobogi ɠa ɠulazu kɛlɛma tonaɓiingi zu.36Ee, GALA, è maayikiʋɛ è-zeizu ɲadegai.Tɔ ɠa é ga Izilayɛle ná-GALAGI,é zɛbɛi ta zobogi veezu nuɓusɛiti zea.Mamagi ɠa GALA bɛ!