1Guye loo ɠundiɠii nɔnɔi ʋe. Davide ná-guyei. Guyei.2Gá-maaɠɛkpɔgi gi bosu maaɓɔungi zu, ɗɔun è letemazu,naa ɠa ga maamusɛi, gi feezu è ʋɛ, ee, GALA, Siyɔn taazuʋɛ.Gɔun, gá gá-minazeɠegiti daazeeli, nii gi kɛɛni è ʋɛ.3Ɗɛi è maanɛɛnɛ wooi mɛnisu,nuiti kpein ta ʋa è ʋɔ.4Kotoi ma ɠasɔi wuiʋɛ mà, gola wuiʋɛ,kɛlɛ ɗa gá-lɔ koloɠologi kpein gbazu, è ti zuvaayɛ.5Undaanɛ nu ɠa ga naama nui, nii è yiimazeɠezu la, è maaɓuɠa ɓɔɠɔ ʋa,ga é yɛ è zei ʋɛlɛi ma ɠoizuʋɛti.Gá yiɠo ga ɗa-ʋɛlɛwuʋɛ ma undaanɛɛi,ta ɗa-ʋɛlɛi ná-ɲadedai.6GALA gi Ɠizo Nui, ɗa-lelebodai zu,ɗa gi wooɠaaʋotesu ga laavɔɔ ɠɛɛwotiiti,ɗɛi è ga nuɓusɛiti kpein ta-ɠitogi zou ɓela ga,ziɛ zaama yooiti su, ti maaɠoozaai.7É gizeiti togɛ kpaan ga ná-zɛbɛi,é ɓɔɠɔ maaɠiliʋɛ ga zobogi.8Toɠa kpoloɗɛiti sulu gooiti gaaɓɛɛzu,ta ti-ma lakpatakpagiti tugi,ta nuɓusɛiti sɔngɔ wooiti.9Niiti ti zeini zou ɓela ga, naati daavɔɔʋɛ, ti ɗa lua, ga ɗa-ʋoogiti kaa vai,ɗa folo ɠulazu ta folo liizu laavesu ga koozunɛ wooiti.10Ɗa eteai zɛsɛbosu, è kɔ ga bɔɔlɔa,è sulaave ga kulanumai,GALA ná-laasamagi laavegɛ ga ziɛi.Ɗa moloi ɠɛʋele ɓɛtɛzu nuiti bɛ, zooi ɠɛʋele ɓɛtɛai ʋɔ.11Ɗa ziɛi ʋuuzu ma ɓabiiti su ga bɔɔlɔa.È pɔlɔ ɓuiti golowolo, gaanɛmɛ,è zɛɓɛ ga tonaiti,è tuya loo pɔnɔ ganiiti ma.12È konagi maaɠiliʋɛ ga ɗa-vaanɛɛiti,ʋɛ dɔin è leʋeni ná, zooi wulɔʋɛ ná pɛ.13Anɛɛ dɔɓɔ zaama lufaiti ta ziɛi wola zɔlɔɔsu,gizeiti ti zaamaɠilia ga koozunɛɛi.14Toganiiti ta ʋɛɛni tufa lɛnugi zu mɛɛ,molo lufai nɛmɛiti suɓidia,ti pɛ ta guyei loozu, ti ta-ɠoozunɛɛi ɠula kɛlɛma.