1Guye loo ɠundiɠii nɔnɔi ʋe. Nii é loozu é zoloo guye wooi ma, nii daa ga: «Mina koloɠolo!» Davide ná-guyei. Siɛgi zu Sayile ná-pɛlɛi maalatini da ga é ʋa paa.2Nà-GALAGI, ùnmɔɔ, è kùla sìli nuiti zea,bùzeɠe, gàaɠooza naati ba, niiti ti wuzeɠezu dàalɔɠɔma!3Ùnmɔɔ, è kùla naati zea, niiti ti telebotala vai ɠɛɛzu,kìzo ɲama ʋuu nuiti ma!4Mazɔlɔɔ ti ʋɛtɛ, ti lɔɔɠuai zɛ̀nvui ɠoloɠolo fai ma,zobobɛ nuiti ta yaavai ɠilizu mà,anɛɛ ni gè la ga tɔ koloɠolo nu,anɛɛ ni gè la koto ɠɛɛni, Ɠɔoɠɔ GALAGI!5Anɛɛ ni gè la faaɠaaza gola ɠɛɛni, ta ɓizɛzu, ti ɗa ɠɛʋele ɓɛtɛ.Wuzeɠe, ʋa è dàaɠomi, gwɛlɛi wo!6Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI,ɗɔun wuzeɠe, è zii ɠiligiti sakpe!Mina nu ʋaa nui tɛiti, telebotala nuiti maawɔinɠa!Lo!7Ta ʋaana ʋolu kpɔkɔi, ti ɓozɔ eɠɛ gilɛiti,ti taai maalati.8Wɛlɛ, poomugi ɠa ti-laaʋɛ, ti-lakɔlɔgiti ta ga boɠa zɔkpɔiti,ta ɠɛɛzu ɓɔɠɔ ma: «Ɓɛ ɠa a woilo ade-woo ma?»9Kɛlɛ ɗɔun ɗa, Ɠɔoɠɔ GALAGI, ɗa ti ɲɛɛzu,ɗa ɲɛɛɠulazu zii ɠiligiti kpein su.10Ɗɛi è ga sɛ̀bɛi, è ʋɔ pelei ɠa gè wɛlɛzu ná.Ungo, GALA ka é mà ga siɠigi.11Nà-wooɠɛɠila ƓALAGI ɠa ʋa pɔ̀.Nà-GALAGI ɠa sìli nuiti kpein dɛɛ ga ze, pilɛgi zɔlɔɔgai na ti ma.12Mina ti ʋa, nà-nuɓusɛiti ta ʋa yeema naa ma,kɛlɛ è-zɛbɛi ʋɔ, ti ɠɛ ga teʋeteʋe nu, è ti loka,ɗɛi è ga gá-ɠɔɔɠɔ zɛpɛgi, Maliɠii!13Ti-laawooi kpein ka ga kotoi nɔ.Ti ɠɔ ga tiya ɓɔɠɔi ta-waso balii,ta-yɛɛiti kpein faa zu ta ta-voovooiti kpein.14Ti-ma zuwu ɠaaleʋe, ɗa-yiiɠulagi zu,ti-ma zuwu ɠaaleʋe, ti mina mɔ ɠɛna!Toɠa ɠwɛɛ naazu ga GALA ka masadai ɠɛɛzu Izilayɛle unda,eyɛsu é zeeli eteai ɓela ga.Lo!15Ta ʋaana ʋolu kpɔkɔi, ti ɓozɔ eɠɛ gilɛiti,ti taai maalati,16ti ziɛziɛ, ti ɗa ti-laamianigi ɠaiziɛ.Ni ti la sɔlɔɔni, ti yɛ ná eyɛsu geelaalao.17Nɔ̀un nà, nà è-zɛbɛi maawuye,sobui, gè ɗa-wooɠɛɠiladai maamusɛ.Mazɔlɔɔ ɗa bɛ̀ ga siɠigi,ʋɛ gè lɔɔɠuzu ná kidaaʋili foloi.18Ee, nà-zobogi, nà guyei loo è-laaseigi lɛbi vai ma,mazɔlɔɔ GALA ka ga nà-siɠigi,nà-GALAGI nii é wooɠɛɠiladai ɠɛai bɛ̀.