Read Guyeiti 57

Guyeiti57tod_pbt

Nui ziilɛiɗai sili nuiti saama

¹Guyei loo ɠundiɠii nɔnɔi ʋe. Nii é loozu é zoloo guye wooi ma, nii daa ga: «Mina koloɠolo!» Davide ná-guyei. Siɛgi zu é ʋelani la, Sayile ɗa kpɛ, é li é lɔɔɠu pugi zu.

²Màawɔinɠa, ee, GALA, màawɔinɠa!Mazɔlɔɔ zɛ̀nvui ɠa lɔɔɠuzu è ʋoluʋɛ,è-ɠoʋegiti ma niinigi ɠa gè lɔɔɠuzu bu,eyɛsu maanɔɠɔiti ti leʋe.³Nà wooɠulazu GALA ma, nii é Anii-Pɛ-Unda,GALA nii é fai pɛ kɛɛzu bɛ̀, eyɛsu gaaɓela ga pagɔ.⁴Toɠa ná-kizogi leʋe mà, é zeɠe geeɠɔlɔgi zu!É zelii lo naati ma, niiti ti kpɔ̀lɔzu.Lo!GALA ka ná-wooɠɛɠiladai ta ná-gaamai leʋe mà.

⁵Nà zalaiti saama,nà laani nu mii nuiti kakala,ti-ɲiigaiti ta ga kpɛɛin ta mɛɛinti,ti-nɛgi ɠaaliʋɛ eɠɛ boɠa zɔkpɔi.

⁶Ee, GALA, è wɔɔlɔ ʋelei lɛ geeɠɔlɔgi maazuʋɛ!Ɗa-lɛbiyai volo eteai zu ná pɛ!

⁷Ti tumɔi laani nà-pelei zu,ti pɛ̀lɛʋɛlɛni,ti zeɠei wɔ tùɠɔ,kɛlɛ tiya ɓɔɠɔi nɔ ɠa ti loai zeɠei naa zu.Lo!

⁸Ladalai ɠa zìimaʋɛ, ee, GALA!Nà guyei loo, gè è maamusɛ.⁹Wuzeɠe, zìi, wuzeɠe!À wuzeɠe, nà-kɔnigi ta nà-papai!Nà geelaalaosuʋɛ maaloɠa!¹⁰Nà è maamusɛ ziiti pɛ saama, ee, Màliɠii!Nà guyei loo è ʋɛ zii ɠiligiti saama.¹¹Mazɔlɔɔ ɗa-nuɓɔɠɔlai wɔɔlɔʋɛ geeɠɔlɔgi ʋa,ɗa-wooɠɛɠiladai ɓudɛʋɛ tonaɓiingiti maazu.

¹²Ee, GALA, è wɔɔlɔ ʋelei lɛ geeɠɔlɔgi maazuʋɛ!Ɗa-lɛbiyai volo eteai zu ná pɛ!

Guyeiti 57 / tod_pbt

Nui ziilɛiɗai sili nuiti saama

Guyeiti57tod_pbt