Read Guyeiti 55

Guyeiti55tod_pbt

Nui ti yaavaai, ná-GALA falii

¹Guye loo ɠundiɠii nɔnɔi ʋe. É loozu ga kɔnigiti. Davide ná-kidafaawui.

²Ee, GALA, woilo nà-maanɛɛnɛ wooi ma,mina lɔɔɠu nà-maanɛɛnɛ wooi ʋa!³Ɠida nà-faiti bu, è gòoɠaaʋote!Mazɔlɔɔ nà kpalagi wosu, gè ɗa kpeei loo.Zìi ɠa kpɔlɔzu,⁴sìli nuiti daawooi maaʋele ma,kpɔidai ʋɔ nu ɲɔiti ti bosu.Mazɔlɔɔ ta màanɔɠɔzu,ti ɗa ʋilɛ pòlu ta-yiiɠulagi zu.⁵Zìi ɠa ɓalizu kòozu,saai ʋa luabai ɠa lɔɔzu ùnga.⁶Dualuagi ta sasuɓalii naati ta kpɔ̀lɔzu,maalua vai màaɓɔlega.⁷Gè ɠɛ ma: «Nà pɔ ga gè koʋe sɔlɔɔ, ga poopogi ɠɛʋele,gè ɠoʋe, gè li gè dooɠo bosu ʋagɔ zɔlɔɔ.⁸Wɛlɛ, nà ʋela gè li ɠoozama,gè li gè zei teʋebai zu.Lo!⁹Nà ʋelazu ʋagɔ zɔlɔɔ ga suvilɛ,gè lɔɔɠu fiilɛi ʋa, anɛɛ fiilɛ wolai.»

¹⁰Faazupui lɔ ti zaama, Màliɠii,ti laawooi zupu,mazɔlɔɔ nà toomai ta zeeɠaaɠwɛɛi ɠaazu taazuʋɛ,¹¹ti ziɛzu kpidii ta foloi siɠigiti ga,telebotalai ta faa ɲɔi ɠa taazuʋɛ.¹²Faa zuɠoloɠologi nɔ ɠa é ɠɛɛzu siɠigi naa zu,yaavai ta zɛɛi la zeɠezu ta-maaɓɔ bosuʋɛti.

¹³Mazɔlɔɔ sìli nu laade, é ʋa ɠɛ ɓaaɠulazu mà,nà la va naa wu,wɔ̀inzeɠe nui laade, é ʋa ɠɛ wuzeɠeni dàalɔɠɔma,nà la lɔɔɠu ba.¹⁴Kɛlɛ ɗa ʋe, è ga zunui ga nɔ̀un kɛʋele,bɔ̀ɔlai, nɛ̀ɛɲɔɠɔi!¹⁵Dɛi de ɠɛa ɓɔni dɔɔɠuzu vaiti ma,siɛgi zu de ɠɛni liizu la ʋɔɔma, ada bɛbɛi GALA pɛlɛi wu!¹⁶Saai ɠula ti viliba!Ti ma vului yei gɔvɛalaazu!Mazɔlɔɔ faa ɲɔi ɠa ti-zeizuʋɛ, ta ti-yiimaʋɛ.

¹⁷Nɔ̀un nà, nà kpee loozu GALA goizu,Ɠɔoɠɔ GALAGI ɠa kìzo.¹⁸Kpɔkɔ, sobu ta folo gaalɔgai,zìi ɠa ɓɔlɔzu, gè ɗa ɓala,toɠa gòoi mɛni.¹⁹Toɠa ziilɛigi veezu bɛ̀, é zɛ̀nvui unmɔɔ,é kùla kɔɔi ya, nii ti daalɛa bù.Mazɔlɔɔ niiti ti kpɛ̀ɛzu, ti wola mɔinʋɛ.²⁰GALA ka gòomɛni é ti ɠaayei.Toɠa masadai ɠɛɛzu yeenɔpɛ!Lo!Mazɔlɔɔ ti la valibosu ɲɛgɛlɛin,ti la luazu GALA ba.

²¹Zunui naa ɠa laalɛɛzu seiɲɔɠɔiti kpein bu,é ná-minazeɠegi ɠaaʋala ba.²²Daaʋɛ ʋagɛ nɔnɔ vukɔi ʋa,kɛlɛ kɔɔi ɠa é ziimaʋɛ,daawooiti nɛɛʋɛ gulɔi ʋa,anɛɛ naa ʋe, ta ga boɠa zɔkpɔiti niiti ti ɠulaai ti-maalaɠagiti su.

²³È-maavaiti zɛ Ɠɔoɠɔ GALAGI ya,toɠa è zɛsɛbo,é la telebo nui yɛga ná, é ʋa ɲiikpi, eyɛsu ɠɔ.²⁴Ee, GALA, ɗa ti yei zeɠezaɠai ɓomaʋɛ,ɲama ʋuu nuiti, yaava nuiti,ti la ti-zii ma voloi ma ɠaaɠwɛsui zɔlɔɔga eteai zu,kɛlɛ nɔ̀un nà, nà ɠalivaazu è ma.

Guyeiti 55 / tod_pbt

Nui ti yaavaai, ná-GALA falii

Guyeiti55tod_pbt