Read Guyeiti 51

Guyeiti51tod_pbt

Maavaayɛ gaiziɛ ƓALA falii

¹Guye loo ɠundiɠii nɔnɔi ʋe. Davide ná-guyei.²Siɛgi zu GALA goo wo nui Natan liini la Davide ʋɔ bɛ, pilɛgai ma Ɓate-Seɓa ʋolu.

³Ee, GALA, màawɔinɠa ɗa-wooɠɛɠiladai maaʋele ma,ɗa-maawɔinɠaa wolai ʋɔ, nà-tɔ koloɠologiti gaaʋa.⁴Gbà ga pagɔ, è kùla nà-faaɠaaza golaiti su,ɲàde, è nà-kotoi zeɠe bà.⁵Mazɔlɔɔ gè nà-tɔ koloɠologiti kwɛɛ,nà-kotoi ma ɠisiɛi ɠa kpɔ̀lɔzu yeenɔpɛ.⁶Ɗa ɠa gè kotoi ɠɛai è laalɔɠɔma, ɗa ɠila kpe è laalɔɠɔma,nii ɲɔuɗai è ɠaazu, gè naa ɠɛɛni,naa ɠa a kɛ, è ɠɛ ga sɔle nu ɗa-vaawogi zu,zelii mina lo è ma, ɗa ɠɛna tùkpɔɠaaleʋea.⁷Wɛlɛ, sɔ̀lɔɔgɛ faaɠaaza golai zu,kaite zɛ̀gɛ dèe ɠoozu, gè ɠɛ ga kotoba nu.⁸Kɛlɛ, gaamai é nui yiimaʋɛ, naa ɠa nɛai è ʋɛ,ɠimalai lɛ ga ze zìimaʋɛ, ʋɛ ná lɔɔɠuai.⁹Ɲàde ga ɠizɔɔpe tufa ɓifɔgi, nà ɠole naazu,gbà, nà ɠole kobe kolegi ʋa.¹⁰Koozunɛɛi ta ziilɛi fai wo mà,kpùsɛi è suɓɔlɔkpɔlɔni, naa ɠa ɠoozunɛ.¹¹Ɠaazuzeɠe nà-kotoiti ba,nà-faaɠaaza golaiti gaaʋa.¹²Ee, GALA, zii ʋagɔi ɓɛtɛ kòozu,kìgi niinɛ, è sei ʋele ɓɛtɛ sù.¹³Mina pìli ya, è ʋa màaɠooza,mina ɗa-Yɛnvu Ɲadegai ɠula zèa.¹⁴Ɗa-ɠizo fai ma ɠoozunɛɛi ve zèa,GALA, è-yiimaɠɛ ɠi pagɔi yeezei bù, é màkɛ.

¹⁵Niiti ti ga tɔ koloɠolo nuiti, nà naati kala ga ɗa-ʋeleiti,kotoba nuiti ta ʋa ʋolu è ʋɔ.¹⁶Ee, GALA, nà-kizo GALAGI!Ùnmɔɔ, è kùla ɲama ʋuu vai nii zu,nà guyei loo, gè ɗa-lelebodai ɠula kɛlɛma.¹⁷Màliɠii, dàkɔlɔgiti buzeɠe,dàaʋɛ è maamusɛ.¹⁸Mazɔlɔɔ zalaɠai la ga è yiilɛi gani,ni naa laade, nà la ta ɠula.Gala zalaɠai la ga è yiilɛi gani.

¹⁹Zalaɠa ɠila kpegi soloogai GALA ma,naa ɠa é ga ɓɔɠɔmaayei ɠigi,zɔi nimizaai, ziiɓɔlɔ,ee, GALA, è la ɠɛlɛa naa ʋa.²⁰Ɗa-nuɓɔɠɔlai zu, faa ʋagɔiti kɛ Siyɔn taa wolai ʋɛ,Zeluzalɛme ná-siɠigiti to.²¹Naazu, è yiima zalaɠaiti ta ɠula,ta gala zalaɠaiti, nii kpusɛi kpein ge ɠalazu.Naazu, nikɛ zinɛiti ta ɠula ga zalaɠai, ɗa-zalaɠa ɠulazuʋɛ.

Guyeiti 51 / tod_pbt

Maavaayɛ gaiziɛ ƓALA falii

Guyeiti51tod_pbt