Read Guyeiti 50

Guyeiti50tod_pbt

GALA ka ʋaazuná-nuɓusɛiti tukpɔɠaaleʋezu

¹Azafe ná-guyei.
GALA, GALA, Ɠɔoɠɔ GALAGI ɠa ɓɔɛzu, é ɗa eteai loli,é zo folo ɠulazu, é li folo liizu.²É zo Siyɔn, taai naa fizɔgai pagi zu,miná ɠa GALA ge volozu ná, é ɗa ɠula kɛlɛma adaʋɛ pɛ.³Gá-ƓALAGI ɠa ʋaazu, é la yɛga maaɠɛkpɔgi zu,abui ɠa tuɠɔ, é ɗa galai wo,maaɠooliʋɛ ga tɔngɔlɔ fiilɛi.⁴GALA ka geeɠɔlɔgiti tolisu ti maazu ʋelei,ta zooi, ga ti ʋa ná-nuɓusɛiti tukpɔɠaaleʋe.⁵«À nà-lada nuiti gaalɛ ba bɛ̀,ti minazeɠe bɛ̀ ga zalaɠai!»⁶Geeɠɔlɔgiti ta ná-telebodai lɛ,mazɔlɔɔ GALA ka é ga tukpɔɠaaleʋe nui.Lo!

⁷«Nà-nuɓusɛi woilo, nà ɓɔɛzu è ʋɔ,Izilayɛle, nà zeele wooi wosu è laalɔɠɔma,nɛ̀i gè ga GALA, ɗa-ƓALAGI.⁸Ɗa-zalaɠaiti faa laade, gè ʋa ɠɛ zeliiti tosu da è ma,ɗa-ɠala zalaɠaiti ta gàazu yeenɔpɛ.⁹Gè la nikɛ zinɛ zeɠezu ɗa-ʋɛlɛi wu,anɛɛ bolia ɗa-logani makɛsuʋɛ.¹⁰Mazɔlɔɔ dɔɓɔ zuaiti kpein ta ga nɔ̀nɔ,ta sua mɔinmɔingiti ti gizeiti ma.¹¹Gè wɔniiti kpein kwɛɛ, ti gizeiti ma,ta nii kpein é ɲiikpisu dɔɓɔiti su ta ga nɔ̀nɔ.¹²Ni pulu ɠɛni ma, gè la ɓena bo è ma,mazɔlɔɔ eteai ɠa ga nɔ̀nɔ, ta nii dɔin é ʋuuni su.¹³Nà ɗa nikɛ zinɛi ma zuaiti mi ɓaa?Nà ɗa boli ɲamaiti kpɔle ɓaa?¹⁴Nii ɗa kɛ ga zalaɠai bɛ̀, nɛ̀i gè ga GALA, naa ɠa ga faanɛɛ wuuɠwɛɛgai.È ɗa-minazeɠegiti daazeeli bɛ̀, nɛ̀i gè Anii-Pɛ-Unda.¹⁵Wooɠula mà kidaaʋili foloi,nà è unmɔɔ, ɗa lɛbiyai ve bɛ̀.»

¹⁶GALA ge ɠɛ faa ɲɔu ɠɛ nui ma:«Leeni ʋe mu! Ɗa nà-deveiti bosu ɠisu nɔ,nà-minazeɠe gooi ɠɛ è-laaʋɛ,¹⁷ɗɛi è kalagi wɔinzeɠezu,è dàawooiti pilisu ya è ʋoluʋelei!¹⁸Ɗa unma nui ɠaana, ɗa ɠɛɛzu ga naa ná-kpɔba nui,wa ɓɔsu faa ɠilagi ma wa wɛɛnzo nuiti,¹⁹ɗa è-laaʋɛ lɔɔzu faa ɲɔi zu,è-nɛgi ɠa yaavai ɓɛtɛzu.²⁰Siɛgi zu wo zeizu la wa zɔiti,ɗa vaazu è-ɠɛɛloin ma,ɗa è-leeloin maaɓoozu.

²¹«Wɛlɛna, naa ɠa è kɛɛni, gè maaɠɛ kpɔ,è ɠisiɛni ga nà ga è ɠɛʋele,kɛlɛ nà zeliiti tosu è ma, gè ti pɛ dɛɛ è ɠaazu.²²À naa ɠaaɠa, wɔi wo yeemazu mà, nɛ̀i gè ga GALA,à dama, gè mina wo ʋali ga, nu nɔpɛ ge la wo unmɔɔga.²³Zɔi a ɠɛ zalaɠa ɠulazu, é kɛ ga faanɛɛ wuuɠwɛɛgai, naama nui ɠa dɛ̀bizu,zɔi é ɠaaɓaazu siɛ ʋelei ma, nà, GALA, nà nà-kizo fai lɛɛ la.»

Guyeiti 50 / tod_pbt

GALA ka ʋaazuná-nuɓusɛiti tukpɔɠaaleʋezu

Guyeiti50tod_pbt