Read Guyeiti 39

Guyeiti39tod_pbt

Saai ɠakala

¹Guye loo ɠundiɠii Yedutun nɔnɔi ʋe. Davide ná-guyei.

²Gè ɠɛni ɠɛɛzu ma: «Nà daazu ma kpɛ ga sìɛ ʋeleiti,gè ʋa koto ɠɛ kpɔ̀ɛ wooiti su.Nà yeeʋɛɛzu la,ni nɔ dɛ faa ɲɔu ɠɛ nui ɠa tùɠɔ.»³Gè ɓɔɠɔ lɔɔni maaɠɛkpɔ golai zu,gè la woo ɠila kpalaa boni.Nà-taɓai wola zuwɔɔlɔni.⁴Zìi ɠɛni zoolɛzu kòozu,zɛ̀gɛ kpalagi wosu, abui ɗa zo,wooi ʋaani kìsu, gè ɓɔɛ, gè ɠɛ ma:⁵«Ɠɔoɠɔ GALAGI, nà-eteai ɠaaɓelagi lɛ ga ze,sìi ma voloi liegɔi,naa ɠa a kɛ gè kwɛɛ ʋelei sìi zuɓuɠaai la.⁶Wɛlɛ, nà-foloiti kwɛteʋeʋɛ, ta ga zeelo gilagi liegɔi.Sìi zuɠooza ʋelei la è ɠaazu ga ani nɔpɛ.Ungo, nui kpein é loni, toɠa è ɠaazu ga fiilɛi nɔ.Lo!⁷Ungo, nui ɠa ziɛzu eɠɛ niinigi,é ɗa ɓɔɠɔ ɲiikpi, kɛlɛ toɠa ga fiilɛi.Toɠa ani ʋagɔiti gaalɛɛzu ba,kɛlɛ é la kwɛni, ɓɛ ɠa é ʋaazu ti yɛʋɛzu.

⁸«Niizu, Màliɠii, leeni ɠa nà ɠito ba niina?Nà-kitogi ɠa ɗa nɔ è ʋa.⁹Ùnmɔɔ, è kùla nà-tɔ koloɠologi kpein su!Mina va bu, ɠimalala nuiti ti ʋa dɔ̀ ɓaaɠulamai zu!¹⁰Nà maaɠɛsu kpɔ, gè la laalaosu,mazɔlɔɔ ɗa ɠa è tii ɠɛɛzu.¹¹Ɗa-ɓakɔiti maaɠooza bà.È-yeei a ɠɛna dòɠaa, nà loozu.¹²Ni a kɛ è nuiti maaɠolo, ɗa ti loɠazu ta-vaaɠaaza golaiti faa zu,è ti nɛɛbɛ aniiti koloɠolo eɠɛ fɔfɔi.Ungo, nui kpein ka ga fiilɛi.Lo!

¹³«Ee, Ɠɔoɠɔ GALAGI, woilo nà-maanɛɛnɛ wooi ma,woilo nà-kpee wooi ma!Mina woizuɓɔlɔ nà-gɔlɔ wooiti tuɠɔ!Mazɔlɔɔ nà ga wɛɛn è ʋɔ bɛ,gè ɠɛ ga seikɔɠɔma nu,eɠɛʋelei mɛ̀mɛwolani ti ɠɛni la.¹⁴Ɠaazu lati, è seɠe bà, ga gè undaanɛɛ zɔlɔɔ,aisa gè ʋa li, gè ɲɛɛlɛ!»

Guyeiti 39 / tod_pbt

Saai ɠakala

Guyeiti39tod_pbt