Guyeiti35tod_pbt
Ɠɔoɠɔ GALAGI ɠa ɗa maawɔin nuiti makɛ
1Davide ná-guyei.Ɠɔoɠɔ GALAGI, naati sakpe, niiti ti sàkpesu,kɔɔi laalɛ naati bu, niiti ti kɔɔi laalɛɛzu bù!2Kɔɔɠɔ zɛpɛ koi ta ma wolaiti seɠe,è wuzeɠe, è ɓɔ bà!3Kpɛɛn goiti ta kɔɔɠɔ yoovɛiti seɠe,è tɛ ga naati daalɔɠɔma niiti ti wɔ̀inzeɠezu!È ɠɛ zɛ̀nvui ma:«Nà ɠa gè ga è ɠizo nui!»4Naati ti unfe, ɓaaɠula ti ma,niiti ti wɔinɗai ga ti zɛ̀nvui ɠula zèa!Ti ɠula ʋolu, ti unfe,tɛiti ti ɠisiɛzu nà-maanɔɠɔ vai zu!5Ti ɠɛ ga daazaɠagi ɠɛʋele, nii fiilɛi liizu la,Ɠɔoɠɔ GALAGI ná-geezuɠeelai ti ɓɛ!6Ta-ʋelei ti ziɛzu la suɓidi, suɲa,Ɠɔoɠɔ GALAGI ná-geezuɠeelai ʋilɛ ti ʋolu ga ti ɓɛa!7Mazɔlɔɔ ti zeɠei wɔɔʋɛ, ti tumɔi zei su,ma un ge la ba, ti naa wɔɔʋɛ nɔ̀un bɛ.8Ziizoolɛi zeeli ti ma, ti yeemazu,ta-lumɔi ti dɔɔɠuai tùɠɔ, naa ti zo,ti loo naama undaaʋiligi zu!9Koozunɛɛi ɠa ɠɛ zìimaʋɛ Ɠɔoɠɔ GALAGI ʋɔ,toɠa ɠoozunɛ ná-kizo fai zu.10Mà ɠaeiti kpein ta ɠɛ ma:«Ee, Ɠɔoɠɔ GALAGI, ɓɛ ɠa é ga è ɠɛʋele?Ɗa maanɔɠɔ nui unmɔɔsu, è kula naa yeezu, nii sɛbɛi wɔɔlɔai tɔun nɔnɔi ʋa.Maanɔɠɔ nui ta bala nui ɓalaa, ɗa ti ɠulazu tooma nui ya.»11Zɛɛ zeeleiti ta wuzeɠezu,ti ʋa, ti ɗa gàazaɠa faiti ma, niiti gè la ti zuɠwɛɛ.12Nà-faa ʋagɔi gè kɛɛni,ti ɗa naa zala mà ga faa ɲɔi.Ti zɛ̀ gilɛlai zu.13Nɔ̀un nà, siɛgi zu ti ɠɛni zeeɓɛzu la,gè ɓena saa wɔlɔ wo seɠei loo ɠɔba,gè ɠaalɛi, gè ɓɔɠɔmaayei, gè zugi zo.Gè la ɠɛni ɓeni GALA falii ʋa ti ʋɛ ɠɔ,14eɠɛ nà ɠɛ kɛɛzu bɔɔla ʋɛ, ɓaa kɛ̀ɛloun.Gè maaʋɛ, gè ɗa ziɛ gaazuɠiliai,gàalɛi, eɠɛ nu dee a za.15Naa ʋolu, siɛgi zu gè ɲiikpisu da,ta ɠaalɛɛzu ba, ti ɗa ɲɛɛɠula sù,gè la dòɠa nuiti kwɛɛ, ti ɠaalɛɛzu ba dàalɔɠɔma,ti ɗa dàazuɠɔli, ti la looɠosu.16Eɠɛ nuiti ti ɲɛɛɠulazu nɛɛʋuzu ba nuiti su,ta ɲiigai ziɛzu ga dàalɔɠɔma.17Màliɠii, ɗa yɛsu niima vaiti pɛtɛsu nɔ ɓaa?Zɛ̀nvui ɠula ta-wɔinzeɠemai laawu,zɛ̀nvui wola vizɔgɛ, é mina yɛ zalaiti zea.18Nà è maamusɛ maaɓɔ golai zu,nà è mama nuɓusɛ mɔinmɔingiti saama.19Niiti ti ga sìli nuiti, ti ɓaaɠosu mà, naati ti mina ɲɛɛɠula sù.Niiti ti wɔ̀inzeɠezu un ge la ba, naati ti mina pòomu ga ɠaazuɠɛzɛi.20Mazɔlɔɔ ti la ziilɛi kpɔɛ wosu,yaavai ɠa ti kpɛtɛzu nu ʋagɔiti daalɔɠɔma,ti zeini zooi zu.21Ta laalaosu dàalɔɠɔma,ti ɗa ɠɛ ma: «Ee, gi-ɠaazuɠɛzɛi ɠa wozaɠaazu!»22Ɠɔoɠɔ GALAGI, ɗa wozaɠaazu, mina maaɠɛ kpɔ!Màliɠii, mina maaɠooza bà!23Wuzeɠe, ɠaazuzeɠe ma, è màalobo!Nà-GALAGI, Màliɠii, lo bɛ̀!24Tukpɔi lo bɛ̀, eɠɛʋelei ɗa-zɔledai la, Ɠɔoɠɔ GALAGI, nà-GALAGI!Ti mina ɠoozunɛ, ti ʋa ɲɛɛɠula sù!25Ti mina ɠɛ ma ti-yiimaʋɛ:«Ee, nii ɠa ade ɠɛa pɔ!»Ti mina ɠɛ ma: «Ade kpɔlea!»26Ti pɛ ti unfe ʋɔɔma, ti ʋɛlɛʋɛlɛ ɓɔɠɔ ma,tɛiti ti ɠoozunɛɛzu nà-maanɔɠɔ vai zu!Unfegi loo ti ɠɔba ta faazupui,niiti dɔin ti ɓɔɠɔ wɔɔlɔzu dàalɔɠɔma!27Naati ti maamusɛi wo, ti ɠoozunɛ,niiti ti yiilɛiɗai nà-telebo fai zu,ti ɗa ɠɛ ma yeenɔpɛ: «Lɛbiyai ɠa Ɠɔoɠɔ GALAGI ʋɛ,nii é ná-botiɠɛ nui ná-ziilɛigi ʋɔ!»28Nɛ̀gi ɠa ɗa-lelebo fai wo,ta ɗa-maamusɛi, folo-o-folo.