Read Guyeiti 31

Guyeiti31tod_pbt

Dàaʋɛ Ɠɔoɠɔ GALAGI la

¹Guye loo ɠundiɠii nɔnɔi ʋe. Davide ná-guyei.

²Ee, Ɠɔoɠɔ GALAGI, ɗa ɠa gè lɔɔɠuzu è ʋoluʋɛ,màkɛ eyɛsu pɛ, gè mina lɔ unfegi zu!Ùnmɔɔ ɗa-lelebodai zu!³Woilo gòoi ma, zuvilɛ è ùnmɔɔ!Ɠɛ bɛ̀ ga dɔɔɠuzu vasai, ta siɠigi, nii a kɛ gè ɠizo!⁴Mazɔlɔɔ ɗa ɠa è ga nà-fasai, ta nà-siɠigi,è-laaseigi lɛbi vai ma, ɗa lo tùɠɔ, è ɓɔ bà.⁵Ɗa kùla tumɔi zu, nii ti seiɗai tùɠɔ,mazɔlɔɔ ɗa ɠa è ga siɠigi é màkɛsu.

⁶Nà zɛ̀nvui ɠalivaazu è ma,ɗɛi è ùnmɔɔni, Ɠɔoɠɔ GALAGI, gaama ƓALAGI.⁷Gè naati wɔinzeɠea, niiti ti ɠilizu zɛɛ zaleiti ba.Nà ɠalivaazu Ɠɔoɠɔ GALAGI ma.⁸Nà ɠɛ wuulee ga koozunɛɛi, ɗa-wooɠɛɠiladai maaʋele ma,tɔɔzei è nà-maanɔɠɔi ʋɛtɛga,è ɠida nà-kidaaʋili fai wu.⁹È la dɔ̀ɔzu sìli nuiti zeezu,è pìlɛga ɓɔɠɔyeemai zu.

¹⁰Màawɔinɠa Ɠɔoɠɔ GALAGI!Mazɔlɔɔ nà kidaaʋiligi zu, ziizoolɛi gàazuʋɛ maaʋooloa,ta zìi ta kpùsɛi kpein.¹¹Nà-eteai ɓega taɓai zu,nà-konagiti ɓalaa ti ɠɛa kpalagi zu,sùvikɛi ɠula sù, tɔɔzei nà-faaɠaaza golai ʋa,mà ɠaeiti sumiiʋɛ.¹²Wɔ̀inzeɠe nuiti kpein ta ɲɛɛɠulazu sù,sìɛɲɔɠɔiti ti ɗa ta ɓɔ ba,kwɛ̀ɛ nuiti ti ɗa lua bà.Niiti ti kàazu eteaʋɛ, naati ti ɗa ɓizɛ, ti ɗa maaɠooza bà.¹³Nà-fai yeema nuiti bɛ ti-yiimaʋɛ, eɠɛ nà za.Gè ɠɛa eɠɛ anii nii toai ya.¹⁴Nà naama woo ɲɔiti mɛnisu, niiti ti wosu dàalɔɠɔma:«Maaɠooliʋɛ ga maalua vai.»Ti zoloogɛ ma dàalɔɠɔma,ti yaavai ɠili ga ti zɛ̀nvui ɠula zèa.

¹⁵Kɛlɛ nɔ̀un nà, nà ɠalivaazu è ma, ee, Ɠɔoɠɔ GALAGI!Gè ɠɛ ma: «Ɗa ga nà-GALAGI!»¹⁶Nà-eteai ɠa è yeezu,kùla sìli nuiti zea, niiti ti wɔ̀inzeɠezu!¹⁷Yeezei bù ga pagɔ, nà ga ɗa-wotiɠɛ nui!Kìzo ɗa-wooɠɛɠiladai maaʋele ma!¹⁸Ee, Ɠɔoɠɔ GALAGI, gè mina lɔ unfegi zu,siɛgi zu gè wooɠulazu la è ma.Faa ɲɔu ɠɛ nuiti ti yɛ unfegi zu,ti yɛ maaɠɛkpɔgi zu, ti yei gɔvɛalaazu!¹⁹Ti ɠɛ ga ɓoɓoiti,naama lakɔlɔgiti ti ɓɔɛzu ga gaazumaanɛɛi telebo nui laalɔɠɔma,ta wasogi, ta wɔinzeɠemai.

²⁰Ɗa-nuɓɔɠɔlai wɔɔlɔʋɛ gola,nii è makɛgai naati bɛ, niiti ti luazu è ʋa,ta naati ti lɔɔɠuai è ʋolu,nii è ʋaazu kɛɛzu ti ʋɛ, nuɓusɛi kpein gaazu.²¹Ɗa ti lɔɔɠuzu è-ɠaazu ma,ti maaɠooza nuɓusɛiti ta-ɠisiɛ ɲɔiti ba,dɔɔɠuzuʋɛ miná ɠa è ti ɠizosu ná,nuiti ti-nɛgiti ma, niiti ti laalɛɛzu ti wu.²²Mamagi ɠa Ɠɔoɠɔ GALAGI ʋɛ!Mazɔlɔɔ é ná-wooɠɛɠiladai ɠulaʋɛ kɛlɛma bɛ̀,nɛ̀i gè ɠɛni eɠɛ taa wolai seiɗai kɛlɛ su.²³Kìgi zupuni, eyɛsu gè ɠɛ ma:«É la mɔ yiizoolɛzu ga ze!»Kɛlɛ è nà-maanɛɛnɛ wooiti mɛnini,siɛgi zu gè wooɠulani la è ma.

²⁴Wɔiti wo ga Ɠɔoɠɔ GALAGI ná-wooɠɛɠila nuiti, à nɛɛʋɛ wo pɛ!Ɠɔoɠɔ GALAGI ɠa ɗa kidaaleʋe nuiti makɛ.Kɛlɛ toɠa waso nuiti sala ga ɲɔuɗa.²⁵À zɛbɛzeɠe, wo zulo,wɔiti wo ɠitogai Ɠɔoɠɔ GALAGI ʋa!

Guyeiti 31 / tod_pbt

Dàaʋɛ Ɠɔoɠɔ GALAGI la

Guyeiti31tod_pbt