Read Guyeiti 30

Guyeiti30tod_pbt

È zɛ̀nvui vea zèa ʋolu

¹GALA sei ʋɛlɛi laalao guyei. Davide ná-guyei.

²Ee, Ɠɔoɠɔ GALAGI, nà è maamusɛzu,mazɔlɔɔ è kùlaa zeɠe ɓokulagi zu.È la vaani bu, sìli nuiti ti ʋa ɗa ɲɛɛɠula sù.³Ɠɔoɠɔ GALAGI, nà-GALAGI, gè è loligɛ ga è ɓɔ bà,ɗa ma, è bàloʋɛ.⁴Ɠɔoɠɔ GALAGI, è mɛ̀ɛnni, è kùla saai ya,è zɛ̀nvui ʋu sù, siɛgi zu gè ɠɛni liizu la kabayeɠei ʋɔ pelei.

⁵À guyei loo Ɠɔoɠɔ GALAGI ʋɛ, wɔiti wo bɛ ga wooɠɛɠila nuiti.À maamusɛ, wo ná-ɲadedai ɠula kɛlɛma.⁶Mazɔlɔɔ ná-ziiɠaawanai la ɗa ga lɛbiga,kɛlɛ ná-nuɓɔɠɔlai ɠa ná nu zii ma voloi pɛ su.Ni kpɔkɔi gɔlɔi ɠa é ná,geelaa ɠa laosu ga koozunɛɛi.

⁷Gè ɠɛni ɓɔɠɔ ɠaazu ga nà ziilɛi su, gè ɗa ɠɛ ma:«Gè la ɲiikpiga eyɛsu pɛ.»⁸Ee, Ɠɔoɠɔ GALAGI, ɗa-nuɓɔɠɔlai ʋɔ, è sɛ̀bɛlɔɔni sèi ɠizei ma.Kɛlɛ è ʋoluavega bà, gaamanɔ kiteʋei zeelia mà.

⁹Ee, Ɠɔoɠɔ GALAGI, gè wooɠulaa è ma,ee, Màliɠii, gè è maanɛɛnɛ, gè ɠɛ ma:¹⁰«Ni nà zaana, ni nà yeina kabayeɠei zu,ɗa-ɠulanumai ɠa naazu ga leeni?Zɔi é niina ga fufiligi nɔ, naa ɠa zoo ɠale è maamusɛzu?Toɠa zoo ɠale ɗa-wooɠɛɠiladai ɠulazu kɛlɛma?¹¹Ee, Ɠɔoɠɔ GALAGI, woilo, gàazumaawɔinɠa,ʋa è ɓɔ bà, Ɠɔoɠɔ GALAGI.»

¹²È nà-gɔlɔ wooiti faliboga ga kua wogai koozunɛɛi zu,è saa wɔlɔ wo seɠeiti kula kɔ̀ba, è ti maavalibo ga fɛti ɠula zeɠeiti,¹³naa ɠa a kɛ gè è maamusɛ ga zìimaʋɛ pɛ, gè mina ɓɔlɔ.Ee, Ɠɔoɠɔ GALAGI, nà-GALAGI, nà è maamusɛ eyɛsu ɠɔ.

Guyeiti 30 / tod_pbt

È zɛ̀nvui vea zèa ʋolu

Guyeiti30tod_pbt