Read Guyeiti 18

Guyeiti18tod_pbt

È mama ɗa-unmɔɔ fai zu

¹Guye loo ɠundiɠii nɔnɔi ʋe. Ɠɔoɠɔ GALAGI ná-botiɠɛ nui Davide ná-guyei. É niima wuyei looni Ɠɔoɠɔ GALAGI ʋɛ, siɛgi zu naa unmɔɔni da, é kula sili nuiti kpein zeezu, ma un ge la ma mɛɛ ga Sayile.

²É ɠɛni ma: «È nɛɛʋɛ bɛ̀, Ɠɔoɠɔ GALAGI, nà-zobogi!

³«Ɠɔoɠɔ GALAGI ɠa ga nà-fasai, nà-siɠigi, ùnmɔɔ nui,nà-GALAGI, nà-fasai, ʋɛ gè lɔɔɠuzu ná,nà-kɔɔɠɔ zɛpɛgi, zobogi nii é kìzosu, nà-siɠi gaaɠoozagi!⁴Mamagi ɠa Ɠɔoɠɔ GALAGI ʋɛ!Siɛgi zu gè tolini da, gè vieni, gè ɠula sìli nuiti kpein zea.

⁵«Saai gìlini ga ná-galuiti,é ɗa màalua, eɠɛʋelei kɔtuɗɛi la, é faa zuɠoloɠologi ɠɛɛzu.⁶Gɔvɛalaazu ɠaluiti ti veleveleni mà,saai ná-tumɔiti ti ɠɛ tùɠɔ, ti ɗa màalua.⁷Nà-kidaaʋiligi zu, gè wooɠulani Ɠɔoɠɔ GALAGI ma,gè ɓainni nà-GALAGI woizu,é yɛni ná-masa pɛlɛi wu, é gòomɛni,nà-kpee wooi looni goizu.

⁸«Naazu, zooi ɓalini, é ɲiikpi,gizeiti ma wuulaagiti ti ɓalini,ti ɲiikpi ná-ziiɠaawanai maaʋele ma.⁹Duului ɠa ɠulazu sokpayeɠeiti su,abui nii é galai wosu, naa ɗa ɠula daaʋɛ,ga tiɠilekai é ɗa ɠala.¹⁰É geeɠɔlɔgi ziɛni su, é yei,tonaɓiin gaaɠiligai kɔɠɔi wu.¹¹É lɛɛni seeluɓɛin ɠɔma, é ɗa ɠoʋe,é ʋa fiilɛi ɠoʋegiti kɔma.¹²É kpidii latini ɓɔɠɔ ma, é lɔɔɠu ma ɓiligi zu,fiilɛ wolai ma ɓidii zu, tonaɓiin gaaɠiligai zu.¹³Wozakalagi é ɠɛni volozu tuɠɔ,sakɔtui ta abulekai niiti ti ɠɛni ɠulazu su,naati ti ɠɛni leʋesu tonaɓiingi zaama.¹⁴Ɠɔoɠɔ GALAGI ɠa zikɔzu geeɠɔlɔgi zu,GALA nii é Anii-Pɛ-Unda, naa wooi ɠa ɠulazu.¹⁵É ná-mɛɛinti pilini ga é sili nuiti suvaza,é mainmainti pilini, nii a kɛ ti ʋoluazo.¹⁶Kpoloɗɛi ɓomaʋɛ ɠulani kɛlɛma,eteai ma wuulaagiti maa ɠɛ kala,Ɠɔoɠɔ GALAGI ná-kpaazaɠai ʋɔ,ta sokpayeɠeiti su viilɛi ʋɔ!

¹⁷«É yeemaaleni, é yɛ geezuʋɛ, é nɔ̀un so,é mɛ̀ɛn, é kùla ziɛ wolaiti ga.¹⁸É kùlani sìli nu wolai ya,niiti ti wɔ̀inzeɠezu, tama ti zuɓaai nɔ̀un ba.¹⁹Ti wuzeɠeni dàalɔɠɔma nà-kidaaʋili foloi,kɛlɛ Ɠɔoɠɔ GALAGI ɠa é loni pòlu.²⁰É kùlani faaɓaagi zu,é kùlani, mazɔlɔɔ nɛ̀ɛʋɛ bɛ.

²¹«Ɠɔoɠɔ GALAGI vaani bu, é sò eɠɛʋelei nà-telebodai la,é kɛ bɛ̀, eɠɛʋelei zèeiti ɲade pelei la,²²mazɔlɔɔ gè Ɠɔoɠɔ GALAGI ná-peleiti sogɛ,gè la maaɠoozani nà-GALAGI ʋa, ga faa ɲɔu ɠɛɛ vaa maaʋele.²³Gàazu ɠa ná-tɔgiti ba yeenɔpɛ,gè la ɗa ga ná-deveiti daa ɠoba.²⁴Gè ɠɛni ga ziimai ɠɛ nui,gè ɓɔɠɔ zoni ga gè mina faaɠaaza gola ɠɛ.²⁵Ɠɔoɠɔ GALAGI sàlani nà-telebo fai maaʋele ma,eɠɛʋelei zèeiti ti ɲadeni da tɔun gaazu.

²⁶«Zɔi é è ʋɛ ga wooɠɛɠila nui, ɗa ɠɛ naa ʋɛ ga wooɠɛɠila GALAGI,zɔi peelalazu la ba, peelalazu la è ʋa naa letema.²⁷Zɔi ɲadegai, ɗa ɗa-ɲadedai lɛɛzu ga naa,niiti ti ga yaava nuiti, ɗa ɗa-ɠimalai lɛɛzu ga naati.²⁸Mazɔlɔɔ ɗa ɠa è maanɔɠɔ nuiti kizosu,è gaazulɛɛ nuiti gaazumaayei.²⁹Ɗa ɠa è nà-wozakalagi volozu,ee, Ɠɔoɠɔ GALAGI, nà-GALAGI, ɗa nà-kpidii zu ɠɛɛzu kala.³⁰Ni ɗa bà, nà ʋili salaʋusu ɓulugi zaama,ni nà-GALAGI ɠa bà, nà ʋili gè ɓudɛ siɠigi maazu.

³¹«GALA ná-peleiti daazeeliʋɛ,Ɠɔoɠɔ GALAGI laawooi ɠoleʋɛ.GALA ka ga kɔɔɠɔ zɛpɛgi naati kpein bɛ, niiti ti lɔɔɠuzu tɔun polu.³²Mazɔlɔɔ ɓɛ ɠa é ga GALA, ni Ɠɔoɠɔ GALAGI laade?Ɓɛ ɠa é ga fasai, ni gá-ƓALAGI laade?³³GALA ka é sàamaɠilizu ga zɛbɛi,é nà-pelei ɓɛtɛ ga pagɔ.³⁴Toɠa kɔ̀ɠɔiti kɛɛzu, eɠɛ dopai ɠɔɠɔiti,é tò ada ɠaaɠoozagiti.³⁵Tɔ ɠa é màalɛlɛzu ga kɔɔɠɔ vai,mɛɛin é ga kɔlu ɓɔigi kpili fai ɓaai, zèeiti ta mɛɛn ɠae ʋilisu ga naa.³⁶Unmɔɔgi è bosu ga ze, naa ɠa é ga nà-kɔɔɠɔ zɛpɛgi,ɗa yeezeizu bù ga è-yeezai.Ɗa-ɓɔbaiti ta sɛ̀bɛlɔɔzu.³⁷È-zaalai zu, nà ziɛzu valafala,kɔ̀ɠɔiti ti la liizu ga.

³⁸«Nà ʋilɛsu sìli nuiti polu, gè yeezeeli ti ma,gè la ɠalega ma, ni gè la ti-ma zuwu ɠaaleʋeni.³⁹Nà ti ʋalizu ga, ti la zooga ti ʋa wuzeɠe,ti loo kɔ̀ɠɔ wu.⁴⁰Ɗa sàamaɠilizu ga zɛbɛi kɔɔɠɔ vai ma,ɗa sìli nuiti toozu bu bɛ̀.⁴¹Ɗa sìli nuiti kpɛɛzu tùɠɔ,nà wɔ̀inzeɠe nuiti koloɠolo.⁴²Ta kpee loozu ga ti kpɔba zɔlɔɔ, ti la sɔlɔɔni,ni ta Ɠɔoɠɔ GALAGI lolina, naa la ti wooɠaaʋotesu!⁴³Nà ti ɠɛɛzu ga fufiligi, nii fiilɛi liizu la,gè ti ɓale eɠɛ pele zu ʋalaʋalagi.

⁴⁴«È kùla nà-nuɓusɛiti ta-ɓaka fai laawu,è sèiɗa zii ɠiligiti unda ga kundiɠii.Nuɓusɛiti gè la ti ɠwɛɛ, naati ta botii ɠɛɛzu bɛ̀.⁴⁵Nà ti levena nɔ feya, ti ɠolo bɛ̀ gaamanɔ.Wɛɛinti ta ʋaazu, ti ɗa tɛ̀ su.⁴⁶Wɛɛinti ta iɲɔteʋei zu,ti zasu ɗa ɓali, ta ɠɛna ɠulaa ta-ziɠigi zu.

⁴⁷«Ɠɔoɠɔ GALAGI ɠa vulua! Mamagi ɠa bɛ, tɔ ɠa é ga nà-fasai!Ɛsɛ pɛ ge nà-kizo GALAGI maamusɛ,⁴⁸GALAGI é zobo feezu bɛ̀, gè nɔ̀nɔ ʋotokula,é ziiti kolozu bɛ̀,⁴⁹ɗa kùlazu sìli nuiti zea.Ɗa sèizu wɔ̀inzeɠe nuiti unda,è kùla nu ɲɔiti zea!⁵⁰Naa ɠa é ba, nà è maamusɛ zii ɠiligiti saama, ee, Ɠɔoɠɔ GALAGI!Nà guyei loo è-laaseigi lɛbi vaa ma.⁵¹Ɠɔoɠɔ GALAGI unmɔɔ faa wolai ɠɛa ná-masagi ʋɛ.Toɠa wooɠɛɠiladai ɠɛɛzu naa ʋɛ, nii gulɔ ɲadegai ziaai ma,nii é ga Davide, ta mavofodai, eyɛsu ɠɔ!»

Guyeiti 18 / tod_pbt

È mama ɗa-unmɔɔ fai zu

Guyeiti18tod_pbt