1À Ɠɔoɠɔ GALAGI maamusɛ!Nà Ɠɔoɠɔ GALAGI lɛbizu ga zìimaʋɛ pɛ!2Nà yɛ Ɠɔoɠɔ GALAGI lɛbizu sìi ma voloi pɛ su,nà nà-GALAGI lɛbi ga guye wooi, ni nà dɛ nɔ vulua.3À mina ɠaliva eteai zu zobobɛ nuiti ma,ta nɔ ga nuɓusɛiti, zobo ge la ti ʋɛ, ti ʋa nu ɠizo.4Siɛgi zu ti yii loozu la, ta ɠalesu ma zooi wu,gaamanɔ, ti ɠisu vai pɛ gaa ɠa ʋala ba.5Undaanɛ nu ɠa ga naa, nii ná-kpɔba nui ga Zakɔɓe ná-GALAGI,nii é ɠitosu Ɠɔoɠɔ GALAGI ʋa, ná-GALAGI.6Mazɔlɔɔ Ɠɔoɠɔ GALAGI ɠa é geeɠɔlɔgi ɓɛtɛa, ta zooi,ta kpoloɗɛi, ta ti zu aniiti kpein.Toɠa ga wooɠɛɠila nu yeenɔpɛ.7Toɠa ɗa sɔle fai ɠɛ naati bɛ, niiti ti ti nimizazu,é daamianigi ve naati zea, niiti pului ti ma.Ɠɔoɠɔ GALAGI ɠa ɗa naati pilɛ, niiti ti kasoi ɠa.8Ɠɔoɠɔ GALAGI ɠa ɗa gaazuɠole nuiti gaazuʋɛ zeɠe ma.Ɠɔoɠɔ GALAGI ɠa ɗa naati gaalɔ, niiti ti ɓiligai.Ɠɔoɠɔ GALAGI ɠa ɗa naati nɛɛ ʋɛ, niiti ti zɔlegai.9Ɠɔoɠɔ GALAGI ɠa ɗa seikɔɠɔma nuiti makɛ.Toɠa ɗa podoin zuzo, ta poanzai,kɛlɛ toɠa ɗa nu ɲɔi ɠisu vaiti gaaʋala ba.10Ɠɔoɠɔ GALAGI ɠa masadai ɠɛ eyɛsu ɠɔ,ee, Siyɔn, ɗa-ƓALAGI ɠa yɛ ná, yeeɠɛɠalaiti pɛ su.À Ɠɔoɠɔ GALAGI maamusɛ!