Guyeiti145tod_pbt
Ɗa-masadai ɠa ga ɠɔoɠɔ masadai
1Maamusɛ wuyei. Davide ná-guyei.Nà è mamasu gola, nà-GALAGI, nà-Masagi!Nà yɛ è-laaseigi lɛbizu, eyɛsu ɠɔ.2Nà yɛ è lɛbizu folo nɔpɛ,nà yɛ è maamusɛzu eyɛsu ɠɔ.3Ɠɔoɠɔ GALAGI wɔɔlɔʋɛ, toɠa maamusɛi kpein soloogai ma,nu la zooga é ʋa ná-bɔɔlɔi ɠaaɠa.4Yeeɠɛɠalai ma nuɓusɛi ɠilagilagi pɛ ge ɗa-ɠɛɛwotiiti maamusɛ,faa wolaiti è ti ɠɛai, ti naati suɠula,5ta ɗa-lɛbiyai é volozu, naama maayikii.Nɔ̀un, nà ɠigaiziɛzu ɗa-vaa maanɛɛnɛgiti su.6Ti ɗa-zobogi maayiki vai wo,nɔ̀un nà, ɗa-vaa wolaiti ka gè ti zula.7Ta ɠizɛ ɗa-nuɓɔɠɔlai wɔɔlɔ ʋelei zu, ti ɗa dɛɛ,ta guyei loo ɗa-zɔledai ʋɛ.8Ɠɔoɠɔ GALAGI ɠa é zaalai veezu, é ɠɛ ga maawɔinɠaa ƓALAGI,zii la ɠula fala, kpɛtɛai wooɠɛɠiladai zu.9Ɠɔoɠɔ GALAGI ʋagɛ nu pɛ bɛ,toɠa ga maawɔinɠaa ƓALAGI ná-kpɛtɛanii pɛ bɛ.10Ɗa-ɓɛtɛaniiti kpein ti è lɛbi, Ɠɔoɠɔ GALAGI,ɗa-wooɠɛɠila nuiti ti è maamusɛ.11Ta ɗa-masadai ma lɛbiyai ma vai wo,ti zeze ga ɗa-zobodai ma vai.12Ɗa-vaa wolaiti è ti ɠɛai, ta nuɓusɛiti kala ga naati,naa ʋɛɛ ɗa-masadai ma lɛbiyai ʋa, é volozu.13Ɗa-masadai ɠa ga ɠɔoɠɔ masadai,ɗa-ɠundiɠilai ɠa yɛsu ná, yeeɠɛɠalaiti pɛ su.Ɠɔoɠɔ GALAGI ɠa ga wooɠɛɠila nu ná-minazeɠegiti su,daavegɛ ga nuɓɔɠɔlai fai kpein su é kɛɛzu.14Ɠɔoɠɔ GALAGI ɠa ɗa naati suzo, niiti ti loozu,é naati sɔle, niiti ti ɓiligai.15Fuluaniiti pɛ gaazulogɛ è ʋa kitogi zu.Ɗa ɠa è ti ɠɔnɔgi veezu ti ya, ma yeeɠɛɠala ʋagɔi ma.16Ɗa ɗa yeavie,è naati maavai kpein kɛ, niiti ti yɛnvuzu.17Ɠɔoɠɔ GALAGI zɔlegɛ ná-fai pɛ su nii é kɛɛzu,nuɓɔɠɔʋɛ ná-kɛɛwotiiti pɛ su.18Ɠɔoɠɔ GALAGI ɠa naati kobaʋɛ, niiti ti wooɠulazu ma,niiti dɔin ti wooɠulazu ma ga gaamai.19Toɠa gaazuluaba nuiti ziima vaiti kpein kɛɛzu,a ta-ɓee wooi mɛnina, é ti ɠizo.20Ɠɔoɠɔ GALAGI ɠa ɗa naati pɛ makɛ, niiti ti nɛai ʋɛ,kɛlɛ toɠa nu ɲɔiti kpein koloɠolo.21Nà zeze ga Ɠɔoɠɔ GALAGI ná-maamusɛ vai.Kpɛtɛanii kpein ge dɛbi, tɛigi é ga GALAGI, ɲadegai,ta naa ɠɛ, eyɛsu ɠɔ.