Read Guyeiti 119

Guyeiti119tod_pbt

Ɠɔoɠɔ GALAGI ná-tɔgi maayikiʋɛ, daazeeli

¹Undaanɛ nu ɠa ga naati, niiti ti-ziɛ ʋelei zɔlegai,ti ti-ziɛ ʋelei zoloosu Ɠɔoɠɔ GALAGI ná-tɔgi ma.²Undaanɛ nu ɠa ga naati, niiti ti ná-kala gooiti sosu,ti ɠolozu bɛ ga ti-yiimaʋɛ pɛ.³Naati ti la faa ɲɔu nɔpɛ kɛa,kɛlɛ ta ta-eteai ziɛzu, é zoloo GALA ná-pelei ma.⁴È ɗa-leveiti kulani kɛlɛma,nii a kɛ nu ɠolo ti ʋɛ ga pagɔ.⁵Ziilɔɔi ɠɛ zèa,nii a kɛ, gè ɗa-leveiti so!⁶Naazu gè la unfega tago ɓalaa,siɛgi zu gè ɗa-leveiti pɛ pɛtɛsu da.⁷Nà è maamusɛ ga sɔledai, é zìimaʋɛ,nà ɗa-lelebodai ma leveiti kalana.⁸Nà ɗa-leveiti so,mina ɠɛlɛ bà ɲɛgɛlɛin.

⁹Zunu loungoi ɠa zoo ɠale, é ziɛ ɲadedai zu?Kɛni é è-laawooi zo, é ziɛ la.¹⁰Nà è ɠaiziɛzu ga zìimaʋɛ pɛ,mina ɓe bà, gè ʋa zeɠe ɗa-leveiti polu.¹¹Gè è-laawooi makɛgɛ zìimaʋɛ,naa ɠa a kɛ, gè mina koto ɠɛ è laalɔɠɔma.¹²Mamagi ɠa è ʋɛ, Ɠɔoɠɔ GALAGI,kàla ga ɗa-leveiti!¹³Dàkɔlɔgiti ta ɗa-leveiti kpein suɠulazu,niiti è ti woni.¹⁴Gè ʋilɛ ɗa-ɠala gooiti polu, naa ɠa ɗa kòozunɛ,eɠɛ ni nà naavolo wola zɔlɔɔ.¹⁵Nà ɠisiɛ ɗa-leveiti su,gàazu logɛ ɗa-ʋeleiti ba.¹⁶Nii è sɛʋɛai, naa ɠa nɛ̀ɛbɛ vaa wolai su,gè la yeemaa è-laawooi ma.

¹⁷Faa ʋagɔ ɠɛ bɛ̀, nɛ̀i gè ga ɗa-wotiɠɛ nui,gè zɛnvui wo, nà ɠolo è-laawooi ʋɛ.¹⁸Gàazuʋɛ zeɠe ma,naa ɠa a kɛ, gè ɗa-lɔgi maayikizuʋɛ ɠa.¹⁹Nà ga seikɔɠɔma nu eteai zu,mina ɗa-leveiti dɔɔɠu bà.²⁰Yeeɠɛɠalai pɛ su, ɗa-leveiti kwɛɛ fai ɠagè gaiziɛzu ga sɛ̀bɛi pɛ.²¹Ɗa zelii losu waso nuiti ma, foovoo nuiti,ti zeɠezu ɗa-leveiti polu.²²Ɓaaɠulamai ta bɛlɛlala vai ma ɠasɔi zeɠe ùnma,mazɔlɔɔ nà ɗa-ɠala gooiti sosu.²³Anɛɛ ni kundiɠiiti ta yaavai ɠilizu dàalɔɠɔma,nɛ̀i gè ga ɗa-wotiɠɛ nui, nà yɛ ɠisiɛzu ɗa-lɔgiti su.²⁴Ɗa-ɠala gooiti ti ga zìima vaiti,ta ga tɛ̀nɛ nu ʋagɔiti.

²⁵Nà laani fufiligi zu,zɛnvui ve bɛ̀, eɠɛʋelei è-laawooi bogai la.²⁶Gè sɔ̀giti kpein dɛa ga ɗe, è gòoɠaaʋoteni,kàla ga ɗa-leveiti.²⁷Ɗa-leveiti gaaɠa ʋelei lɛ ga ze,nii a kɛ gè ɠisiɛ ɗa-vaa maayikiaiti su.²⁸Ziizoolɛi ɠa gàazuɗɛi ʋuuzu.Bùzeɠe, eɠɛʋelei è-laawooi la.²⁹Màaɠooza zɛɛ ʋelei ʋa.È-zaalai zu, ɓɔ bà, gè ziɛ ga ɗa-lɔgi.³⁰Gè yiimazeɠea ga gè yɛ è ʋɛ ga wooɠɛɠila nu,nà ɠolozu ɗa-leveiti bɛ.³¹Nà ɠilizu ɗa-ɠala gooiti ba, niiti è ti veeni zèa,Ɠɔoɠɔ GALAGI, mina va bu, gè ʋa unfe.³²Nà ɓizɛzu ɗa-leveiti ma ʋelei zu,mazɔlɔɔ è zìi laalaoga.

³³Ee, Ɠɔoɠɔ GALAGI, kàla ga ɗa-leveiti ma ʋelei,nà yɛ ziɛzu la eyɛsu gaaɓela.³⁴Faaɠaaɠaa ɠigi ve bɛ̀, gè ɗa-lɔgi zo,gè ɠolo bɛ ga zìimaʋɛ pɛ.³⁵Lo tùɠɔ ɗa-leveiti ma ʋelei zu,mazɔlɔɔ naa ɠa ga zìima vai.³⁶Zìi ɠɛʋele ɓɛtɛ ɗa-ɠala gooiti tuɠɔ,gè mina ʋilɛ kpɔ̀ɠɔ lɔnɔgi ʋolu.³⁷Gàazuʋɛ zeɠe wafuun faiti ba,zɛnvui ve bɛ̀ ɗa-ʋelei ma.³⁸Naa ɠɛ bɛ̀, nɛ̀i gè ga ɗa-wotiɠɛ nui,nii è ma minazeɠea naati bɛ, niiti ti luazu è ʋa.³⁹Ɓaaɠulama vai maaɠooza bà, nii é màaluazu,mazɔlɔɔ ɗa-leveiti pagɛ.⁴⁰Wɔ̀in ma vaa wolai ɠa ga ɗa-leveiti!Zɛnvui ve bɛ̀ ɗa-lelebodai ʋɔ.

⁴¹Ɠɔoɠɔ GALAGI, ɗa-wooɠɛɠiladai ɠula kɛlɛma bɛ̀,kìzo, eɠɛʋelei è mìnazeɠeni la!⁴²Nà zoo gè naati gooɠaaʋote, niiti ti ɓaaɠulazu mà,mazɔlɔɔ gè ɓɔɠɔ ɠaliva è-laawooi ma.⁴³Dàaʋɛ mina zeɠe gaama ɓɔɛi ʋolu,mazɔlɔɔ nà ɠitosu ɗa-leveiti ba.⁴⁴Nà ɗa-lɔgi zo,yeenɔpɛ eyɛsu ɠɔ.⁴⁵Nà ziɛ ɓɔɠɔyeemai zu,mazɔlɔɔ ɗa-leveiti ka gè ti ɠaiziɛzu.⁴⁶Nà ɓɔɛ masagiti gaazu ga ɗa-ɠala gooiti,gè la unfega da.⁴⁷Ɗa-leveiti nɛɛʋɛ bɛ̀,kòozunɛɛʋɛ ga gè ɠolo ti ʋɛ.⁴⁸Nà yeemaalesu ɗa-leveiti ma, mazɔlɔɔ ti nɛɛʋɛ bɛ̀.Nà ɠisiɛ ɗa-lɔgiti su.

⁴⁹Ɠizɛ è-laawooi zu, nii è boni mà, nɛ̀i gè ga ɗa-wotiɠɛ nui,nii è kitogi veeni bɛ̀ su.⁵⁰Nà-maanɔɠɔi zu, nà-ziilɛigi ɠa gaɗa-minazeɠegi ɠa é zɛ̀su vulua.⁵¹Waso nuiti ti ɲɛɛɠulani nɔ̀un su,kɛlɛ gè la zeɠezu ɗa-lɔgi ʋolu.⁵²Ɠɔoɠɔ GALAGI, kìgi ɠa ɗa-leveiti su, è ti woni kaite,naa ɠa é zìilɛizu.⁵³Zìi ɠa ɗa ɠoloɠolo, nà faa ɲɔu ɠɛ nuiti kaana,ti ɠɛlɛai ɗa-lɔgi ʋa.⁵⁴Nà ɗa ɗa-leveiti maawuye,zooi nii zu, ʋɛ gè ná ga wɛɛn.⁵⁵Ee, Ɠɔoɠɔ GALAGI, nà ɗa ɠisiɛ è zu kpidii,nà ɗa-lɔgi zo.⁵⁶Nii é ga nɔ̀un tosuʋɛ,naa ɠa é ga, gè ɗa-leveiti makɛ.

⁵⁷Ee, Ɠɔoɠɔ GALAGI, nà bosu ʋolu, tòsuʋɛ ɠa é ga, gè ɠolo è-laawooi ʋɛ.⁵⁸Gè ɠaaɓa ga zìimaʋɛ pɛ, ga gè nɛɛ è ʋɛ,zaalai la mà, eɠɛʋelei ɗa-minazeɠegi la.⁵⁹Gè ɠisiɛni sìɛ ʋeleiti su,nà ɠalesu ma ɗa-ɠala gooiti ma.⁶⁰Nà zuvilɛzu, gè la ná laazu ɠoba,ga gè ɗa-leveiti so.⁶¹Anɛɛ ni faa ɲɔu ɠɛ nuiti ti sòni ga ta-ʋalii,gè la yeemazu ɗa-lɔgi ma.⁶²Kua zaamai, nà ɗa wuzeɠe ga gè è maamusɛ,tɔɔzei ɗa-leveiti sɔle fai ʋa.⁶³Nà ga naati ti-wɔɔlai, niiti ti luazu è ʋa,ta niiti ti ɠolozu ɗa-leveiti bɛ.⁶⁴Ɠɔoɠɔ GALAGI, ɗa-wooɠɛɠiladai eteai kpein daavegɛ,kàla ga ɗa-leveiti.

⁶⁵Ɠɔoɠɔ GALAGI, è faanɛɛ ɠɛa bɛ̀, nɛ̀i gè ga ɗa-wotiɠɛ nui,é zoloo è-laawooi ma.⁶⁶Kàla ga ɠimala ʋagɔi ta keleɠelegi,mazɔlɔɔ dàaʋɛ ɗa-leveiti da.⁶⁷Aisa ùnmaa ʋa yei, gè ɠakani,kɛlɛ niizu, gè è-laawooi zoga.⁶⁸È ʋagɛ, è ɠɛ ga faanɛɛ ɠɛ nui,kàla ga ɗa-leveiti.⁶⁹Waso nuiti ta zɛɛ mɔinmɔin pɛɛzu mà,kɛlɛ nà ɠolozu ɗa-leveiti bɛ ga zìimaʋɛ pɛ.⁷⁰Ti yiilaaɠulugɛ,kɛlɛ nɔ̀un, kòozunɛ vai ɠa ga ɗa-lɔgi zo vai.⁷¹É kpɛ̀tɛni, ùnmaayeini,nii a kɛ gè ɗa-leveiti kala.⁷²Tɔgi kulaai è-la, naa vizɔgɛ bɛ̀,é leʋe zanu kae waagila (1.000) ba, ta wali ɠaei.

⁷³È-yeeiti ti kɛ̀ʋele ɓɛtɛa, ti sùzo,ɠimalai ve bɛ̀, nii a kɛ gè ɗa-leveiti kala.⁷⁴Niiti ti luazu è ʋa, ta kà, ti ɠoozunɛ,mazɔlɔɔ kìtogɛ è-laawooi ʋa.⁷⁵Ɠɔoɠɔ GALAGI, gè kwɛɛ ga ɗa-leveiti sɔlegɛ.È sɔledai ɠɛɛni ùnmaayei vai zu.⁷⁶Ɗa-wooɠɛɠiladai ɠɛ ga gàanɛɛnɛ zaɓui,eɠɛʋelei ɗa-minazeɠegi la bɛ̀, nɛ̀i gè ga ɗa-wotiɠɛ nui.⁷⁷Ɗa-maawɔinɠai yei mà, nii a kɛ gè zɛnvui wo,mazɔlɔɔ ɗa-lɔgi ɠa é ga nɛ̀ɛbɛ vai.⁷⁸Unfegi yei waso nuiti ma, tɛiti ti wɔ̀inzeɠezu wafuun.Nɔ̀un nà, nà ɠigaiziɛzu ɗa-leveiti su.⁷⁹È ɠaazuluaba nuiti ti ʋa ʋolu pɔ̀ bɛ,nii a kɛ ti ɗa-ɠala gooiti kwɛɛ.⁸⁰Nà pɔ zìi zɔle ɲɛgɛlɛin, ɗa-leveiti so fai zu,naa ɠa a kɛ gè la unfega.

⁸¹Zìi ɠa zoolɛzu ga ɗa-ɠizogi ma vai,kìgi logɛ è-laawooi ʋa.⁸²Gàazuʋɛ ɓɔiɗa su ga ɗa-minazeɠegi ɠaiziɛ vai.Gè ɠɛ ma: «Ɗa gàanɛɛnɛ yeelɛ?»⁸³Gè ɠɛa eɠɛ kɔlɔ woolei é ɠoloɠolosu abu luului zu,anɛɛ naa ʋe, gè la yeemazu ɗa-leveiti ma.⁸⁴Folo lielegɔ ɠa ɗa-wotiɠɛ nui kɛɛzu dɛ, kɛʋelei niizu?Yeelɛ ɠa è naati tukpɔɠaaleʋezu la, niiti ti nìmizazu?⁸⁵Waso nuiti ta zeɠei wɔɔzu tùɠɔ,naa la zolooni ɗa-lɔgi ma.⁸⁶Ɗa-leveiti kpein sɔlegɛ ga nu la ti la.Ta wɔ̀inzeɠezu wafuun, ʋa è ɓɔ bà.⁸⁷Ná tago ɠɛa de, ti ʋa ùndaaʋili,kɛlɛ gè la ɠɛlɛzu ɗa-lɔgiti ba.⁸⁸Zɛnvui ve bɛ̀ ga ɗa-wooɠɛɠiladai,naa ɠa a kɛ gè deveiti so, è ti woni.

⁸⁹Ɠɔoɠɔ GALAGI, è-laawooi ɠa ná eyɛsu ɠɔ,seizuʋɛ ɠa ná eyɛsu ɠɔ, geeɠɔlɔgi zu.⁹⁰Ɗa-wooɠɛɠiladai ɠa yɛ ná, yeeɠɛɠalaiti pɛ su.È eteai ɓɛtɛni, toɠa loni kpaan losuʋɛ.⁹¹Aniiti pɛ ta ná za, ɗa-levei zaɓui zu,mazɔlɔɔ eteai kpein ka è yeema.⁹²Ni ɗa-lɔgi la ɠɛni zìimani,nà la za kaite nà-maanɔɠɔi zu.⁹³Eyɛsu pɛ gè la yeemaa ɗa-leveiti ma,naati ka è vaazu bu, gè zɛnvui wo ti zaɓui zu.⁹⁴Nà ga ɗɔnɔ, kìzo.Mazɔlɔɔ nà ɠaaɓaazu, gè ʋilɛ ɗa-leveiti polu.⁹⁵Faa ɲɔu ɠɛ nuiti ta pàa ɠeleɠelegi ɠaiziɛzu,kɛlɛ nɔ̀un, gòilogɛ ɗa-ɠala gooiti ma.⁹⁶Gè pɛtɛgɛ ga kwɛ ka ani ʋapagi kpein ba,kɛlɛ ɗa-leveiti, kwɛ ge la ba.

⁹⁷Ee, ɗa-lɔgi nɛɛʋɛ bɛ̀!Nà ɗa ɠisiɛ su yeenɔpɛ.⁹⁸Ɗa-levei ɠa kɛ̀ɛzu ga ɠima nu, gè leʋe sìli nuiti ba,mazɔlɔɔ toɠa zèa yeenɔpɛ.⁹⁹Gè ɠimalai zɔlɔɔga, gè leʋe nà-kalamɔinti kpein ba,mazɔlɔɔ nà ɠisiɛzu ɗa-ɠala gooiti su.¹⁰⁰Ɠigi ɠa mà, é leʋe kɛwola wɔlɔiti ba,tɔɔzei nà ɠolozu ɗa-leveiti bɛ.¹⁰¹Gè la kɛɛni, kɔ̀ɠɔi ʋa ʋilɛ faa ɲɔu ɠɛ ʋele nɔpɛ ma,nii a kɛ gè è-laawooi zo.¹⁰²Gè la maaɠoozani ɗa-leveiti ba,mazɔlɔɔ ɗa ɠa è kàlasu.¹⁰³Ɗa-minazeɠegi nɛɛʋɛ dàa ɠoozuʋɛ,é leʋe kɔin gulɔi ʋa dàaʋɛ.¹⁰⁴Ɗa-leveiti ti kɛ̀a ga ɠima nu,naa ɠa é kɛa gè zɛɛ ʋeleiti kpein wɔinzeɠea.

¹⁰⁵È-laawooi ɠa ga lanboi kɔ̀ɠɔ wu,ta wozakalagi é volozu nà-pelei zu.¹⁰⁶Gè minazeɠeni, nà ma, nà nà-minazeɠegi zo,gè ɠolo ɗa-leveiti bɛ, tɔɔzei ti zɔlegɛ.¹⁰⁷Ti gòla maanɔɠɔni,ee, Ɠɔoɠɔ GALAGI, zɛnvui ve bɛ̀, eɠɛʋelei è-laawooi bogai la.¹⁰⁸Ee, Ɠɔoɠɔ GALAGI, yeezei nà-maamusɛ wooi wu,è kàla ga ɗa-leveiti.¹⁰⁹Zɛ̀nvui ɠa faaɓaagi laawu yeenɔpɛ,kɛlɛ gè la yeemazu ɗa-lɔgi ma.¹¹⁰Faa ɲɔu ɠɛ nuiti ta balii zeizu tùɠɔ,kɛlɛ gè la zeɠezu ɗa-leveiti polu.¹¹¹Ɗa-ɠala gooiti ta nɔ̀un bɛ ɠɔ, ga ani ɓii gola,tiya ɠa ti kòozunɛɛzu zìimaʋɛ.¹¹²Gè devea zìimaʋɛ ga gè ɠolo ɗa-lɔgiti bɛ,yeenɔpɛ, eyɛsu ɠɔ.

¹¹³Gè woovele nuiti wɔinzeɠea,kɛlɛ ɗa-lɔgi nɛɛʋɛ bɛ̀.¹¹⁴Ɗa ga dɔ̀ɔɠuzuʋɛ ta nà-kɔɔɠɔ zɛpɛgi,kìtogɛ è-laawooi ʋa.¹¹⁵À maaɠooza bà, faa ɲɔu ɠɛ nuiti,naa ɠa a kɛ gè nà-GALAGI ná-deveiti so!¹¹⁶Yeezei bù eɠɛʋelei ɗa-minazeɠegi la, naa ɠa a kɛ gè zɛnvui wo,mina kìteʋe.¹¹⁷Ɠɛ ga pòluzeigi, naa ɠa a kɛ gè ɠizo,gè la ɠaazuzeɠea ɗa-leveiti ba eyɛsu ɠɔ.¹¹⁸Ɗa naati daaʋilisu, niiti ti zeɠezu ɗa-leveiti polu,mazɔlɔɔ ta-ɠisiɛi ɠa nɔ ga zɛɛ vai.¹¹⁹Ɗa faa ɲɔu ɠɛ nuiti pilisu ya, niiti ti eteai zu, eɠɛ kaʋai,naa ɠa é ba, ɗa-ɠala gooiti nɛɛʋɛ bɛ̀.¹²⁰Kpùsɛi ɠa ɓalizu ga dualuagi, è seizu mà,nà luazu ɗa-leveiti ba.

¹²¹Nà ziɛzu ga sɔledai ta telebodai,mina ɠɛlɛ bà, è ʋa dɔ̀ nìmiza nuiti zeezu.¹²²Ɠɛ ga pòluzeigi, nɛ̀i gè ga ɗa-wotiɠɛ nui, nà-undaanɛɛi vaa zu,mina yeeɓe bà, waso nuiti ti ʋa nìmiza.¹²³Gàazu ɓɔiɗa su ga ɗa-ɓɔbai maaɓɔun fai,ta ɗa-ɠizogi, nii è ma minazeɠeni.¹²⁴Faa ɠɛ bɛ̀, nɛ̀i gè ga ɗa-wotiɠɛ nui, eɠɛʋelei ɗa-wooɠɛɠiladai la,è kàla ga ɗa-leveiti.¹²⁵Nà ga ɗa-wotiɠɛ nui, ɠigi ve bɛ̀,ga gè ɗa-ɠala gooiti kwɛɛ.¹²⁶Ɠɔoɠɔ GALAGI, yeeɠɛɠalai ɠa è wuzeɠe,ti ɗa-lɔgiti koloɠologa.¹²⁷Nɔ̀un nà, ɗa-leveiti nɛɛʋɛ bɛ̀,é ɓudɛ zanugi maazu, anɛɛ zanu kitei.¹²⁸Gè ɗa-lɔgiti kpein pɛtɛgɛ ga ti zɔlegɛ, zeeɠaaɠwɛɛzu nɔpɛ ge la ba,gè zɛɛ ʋelei kpein wɔinzeɠea.

¹²⁹Ɗa-ɠala gooiti pagɛ gola,naa ɠa é ba, nà makɛsu ti ma ga pagɔ.¹³⁰È-laawooiti ma ɠulakɛlɛmai ɠa ɗa wozakalagi ve,toɠa ɗa ɠigi ve naati bɛ, niiti ti la dɛ faa mɔinmɔin kwɛni.¹³¹Ɗa-leveiti nɛɛʋɛ bɛ̀ gola,nà ti magalasu ga zìimaʋɛ pɛ.¹³²Ɠaaʋote mà, è zaalai la mà,eɠɛʋelei è deveai la naati bɛ, niiti ti è nɛai ʋɛ.¹³³Sɛ̀bɛlɔ, eɠɛʋelei ɗa-minazeɠegi la,mina va bu, faa ɲɔu nɔpɛ ge ʋa zobo sɔlɔɔ mà.¹³⁴Fìe, è kùla nìmiza nuiti zeezu,naa ɠa a kɛ gè ɗa-lɔgiti so.¹³⁵Yeezei bù ga pagɔ, nɛ̀i gè ga ɗa-wotiɠɛ nui,kàla ga ɗa-leveiti.¹³⁶Gàazuɗɛi ɠa yeizu eɠɛ kɔtuɗɛi,tɔɔzei nuiti ti la ɗa-lɔgi zosu.

¹³⁷Ɠɔoɠɔ GALAGI, è zɔlegɛ,è lelebogɛ ɗa-leveiti su.¹³⁸Ɗa-ɠala gooiti è ti veezu,ta ga gaamai, ti zɔlegɛ.¹³⁹Zìi ɠa ɠalazu kòozu,tɔɔzei sìli nuiti ti yeema è-laawooiti ma.¹⁴⁰Ɗa-minazeɠegi ma ladalai ɠulaʋɛ kɛlɛma,naa ɠa é ba, ti nɛɛʋɛ bɛ̀, nɛ̀i gè ga ɗa-wotiɠɛ nui.¹⁴¹Nà ga nui tosu wola la ba, ti bɛ̀lɛʋiligai,kɛlɛ gè la yeemazu ɗa-leveiti ma.¹⁴²Ɗa-lelebodai ɠa ga ɠɔoɠɔ kelei,ɗa-lɔgi ɠa ga gaamai.¹⁴³Kidaaʋiligi zeelia mà, nà koozuʋiligi zu,kɛlɛ ɗa-leveiti ka ti ga nɛ̀ɛbɛ vaiti.¹⁴⁴Ɗa-ɠala gooiti sɔlegɛ eyɛsu ɠɔ.Ɠigi ve bɛ̀, nii a kɛ gè zɛnvui wo.

¹⁴⁵Ee, Ɠɔoɠɔ GALAGI, nà wooɠulazu è ma ga zìimaʋɛ pɛ, gòoɠaaʋote,nà ɠolo ɗa-leveiti bɛ.¹⁴⁶Nà wooɠulazu è ma, ʋa, è kìzo,naa ɠa a kɛ, gè ɗa-ɠala gooiti so.¹⁴⁷Nà wuzeɠezu aisa geelaa ʋa lao, gè wooɠula è ma ga è ɓɔ bà,kìtogɛ è-laawooi ʋa.¹⁴⁸Nà ɲiizu ɠaazu ɠa,nii a kɛ gè ɗa ɠigaiziɛ ɗa-minazeɠegi zu.¹⁴⁹Ee, Ɠɔoɠɔ GALAGI, woilo gòoi ma, ɗa-wooɠɛɠiladai zu,è zɛ̀ vulua, eɠɛʋelei ɗa-leveiti ti la.¹⁵⁰Niiti ti faa ɲɔi ɠɛʋele ɓɛtɛzu, naati ta maaɓuɠaʋɛ bà,ti maaɠoozaʋɛ ɗa-lɔgi ʋa.¹⁵¹Kɛlɛ, ɗa ɠa è kòba, ee, Ɠɔoɠɔ GALAGI,ɗa-leveiti kpein ta ga gaamai.¹⁵²Gè suɠwɛɛ kaite ga è ɗa-ɠala gooiti seini,ta yɛsu ná ɠɔ.

¹⁵³Nà-maanɔɠɔi ʋɛtɛ, è ùnmɔɔ,mazɔlɔɔ gè la yeemazu ɗa-lɔgi ma.¹⁵⁴Màalogi wo, è ùnmɔɔ,zɛnvui ve bɛ̀, eɠɛʋelei ɗa-minazeɠegi la.¹⁵⁵Kizo fai maaɠoozaʋɛ faa ɲɔu ɠɛ nuiti ba,mazɔlɔɔ ti la ɠolozu ɗa-leveiti bɛ.¹⁵⁶Ee, Ɠɔoɠɔ GALAGI, ɗa-maawɔinɠai zuwɔɔlɔʋɛ!Zɛnvui ve bɛ̀, eɠɛʋelei è deveai la.¹⁵⁷Sìli nuiti ta wɔ̀inzeɠe nuiti mɔinʋɛ,kɛlɛ gè la ʋoluavega ɗa-ɠala gooiti ba pɛ.¹⁵⁸Nà wooʋalada nuiti kaana, nà ɗa ti wɔinzeɠe,ti la ɠolozu ɗa-leveiti bɛ.¹⁵⁹Ee, Ɠɔoɠɔ GALAGI, ɠizɛ su ga ɗa-leveiti nɛɛʋɛ bɛ̀!Ɗa-wooɠɛɠiladai maaʋele ma, zɛnvui ve bɛ̀.¹⁶⁰È-laawooi ma ungi ɠa é ga gaamai,ta ɗa-leveiti kpein ti zɔlegɛ, ta yɛsu ná ɠɔ.

¹⁶¹Zobobɛ nuiti ta wɔ̀inzeɠezu wafuun,kɛlɛ sàsu la ɓalia, kɛni è-laawooi nɔ luɠɔ.¹⁶²Kòozunɛɛʋɛ è-laawooi ma,eɠɛ nui nii é naavolo wola zɔlɔɔgai.¹⁶³Zɛɛi maayo ge la bɛ̀, gè wɔinzeɠeʋɛ,kɛlɛ ɗa-lɔgi ɠa nɛai bɛ̀.¹⁶⁴Nà ɗa è maamusɛ ná zeizu ɠɛ lɔfela foloi ma,ɗa-leveiti faa zu, ti zɔlegai.¹⁶⁵Ziilɛi gola ɠa naati bɛ, niiti ɗa-lɔgi nɛai ti ʋɛ,ani nɔpɛ ge la ti ɠɔɠɔziɠaa, ti ʋa loo.¹⁶⁶Kìtogɛ è ʋa, Ɠɔoɠɔ GALAGI, ga ɗa kìzo,nà ziɛzu ga ɗa-leveiti.¹⁶⁷Nà ɗa-ɠala gooiti sosu ga zìimaʋɛ pɛ,tɔɔzei ti wola nɛɛʋɛ bɛ̀.¹⁶⁸Nà ɗa-lɔgiti ta ɗa-ɠala gooiti sosu,mazɔlɔɔ è sìɛ ʋelei kpein kwɛɛ fai pɛ su.

¹⁶⁹Ee, Ɠɔoɠɔ GALAGI, nà-kpee wooi zeeli è ma,faaɠaaɠaa ɠigi ve bɛ̀, é zoloo è-laawooi ma.¹⁷⁰Nà-maanɛɛnɛ wooi zeeli è ma,ùnmɔɔ, eɠɛʋelei è minazeɠeni la.¹⁷¹Dàkɔlɔgiti ti è maamusɛ gola,mazɔlɔɔ ɗa kàlasu ga ɗa-lɔgiti.¹⁷²Nɛ̀gi è-laawooi maamusɛ,mazɔlɔɔ ɗa-leveiti kpein sɔlegɛ.¹⁷³È-yeei ʋa é ɓɔ bà,mazɔlɔɔ gè yiimazeɠea ga ɗa-lɔgiti.¹⁷⁴Ɠɔoɠɔ GALAGI, wɔ̀inma vaa wolai ɠa ga è kìzo,ɗa-lɔgi ɠa é ga nɛ̀ɛbɛ vai.¹⁷⁵Gè yɛ vulua, gè ɗa è lɛbi,ɗa-leveiti ti ɓɔ bà.¹⁷⁶Nà leʋeteʋesu eɠɛ baalagi nii toai ya.Ʋa, è gàiziɛ, nɛ̀i gè ga ɗa-wotiɠɛ nui,mazɔlɔɔ gè la yeemazu ɗa-leveiti ma.

Guyeiti 119 / tod_pbt

Ɠɔoɠɔ GALAGI ná-tɔgi maayikiʋɛ, daazeeli

Guyeiti119tod_pbt