Read Guyeiti 116

Guyeiti116tod_pbt

Màliɠii ɠa ɗa gòoi mɛni

¹Ɠɔoɠɔ GALAGI nɛɛʋɛ bɛ̀, mazɔlɔɔ toɠa ɗa gòoi mɛni,siɛgi zu gè maanɛɛnɛzu la.²Tɔɔzei goilogɛ gòoi ma,nà yɛ wooɠulazu ma yeenɔpɛ, sìi ma voloi pɛ su.

³Saai ma ɠaluiti ti ɠɛa veleveleni mà,gɔvɛalaazu vaiti ma yiizoolɛiti ti ɠɛni mà,gè zeelini kidaaʋiligi ta ziizoolɛi ɠwɛgi ma.⁴Kɛlɛ gè wooɠulani Ɠɔoɠɔ GALAGI ma, gè ɠɛ ma:«Nà è maanɛɛnɛzu, Ɠɔoɠɔ GALAGI, zɛ̀nvui ɠizo!»

⁵Ɠɔoɠɔ GALAGI ɠa ɗa nuɓɔɠɔlai ɠɛ, sɔlegɛ,ada-ƓALAGI ɠa ga maawɔinɠa ƓALAGI.⁶Ɠɔoɠɔ GALAGI ɠa ɗa naati makɛ, niiti ti la dɛ faa mɔinmɔin kwɛni,tɔ ɠa é kìzoni, siɛgi zu màawɔinni la.

⁷Zìi, ɠaaɠale ma ɗa-yiilɛigi zu,mazɔlɔɔ Ɠɔoɠɔ GALAGI faanɛɛ ɠɛɛʋɛ è ʋɛ.⁸Ungo, Ɠɔoɠɔ GALAGI, è ùnmɔɔni, è kùla saai ya,è gàazuɗɛiti kpale,è kɔ̀ɠɔiti seɠe too ʋelei ma.⁹Nà yɛ ziɛzu fulu nuiti ta-eteai tɛi su,Ɠɔoɠɔ GALAGI ɠaazu.

¹⁰Ìɲɔ ge la ɠɛni leʋeni, anɛɛ siɛgi zu gè ɠɛni ɠɛɛzu ma la:«Màawɔinɗa gola!»¹¹Nà-ziiɓɔlɔi zu, gè ɠɛni ɠɛɛzu ɓɔɠɔ ma:«Nui kpein ka ga zɛɛ nu!»¹²Leeni ɠa nà zoo gè kɛ Ɠɔoɠɔ GALAGI ʋɛ,ná-faanɛɛi kpein faa zu nɔ̀un tetema?¹³Nà pilɛ sɔlɔɔ ziawɔi lɛ geezu,gè wooɠula Ɠɔoɠɔ GALAGI ma.¹⁴Nà nà-minazeɠegiti daazeeli, niiti gè ti ɠɛa Ɠɔoɠɔ GALAGI ʋɛ,nà naa ɠɛ ná-nuɓusɛiti pɛ gaazu.

¹⁵Ɠɔoɠɔ GALAGI ná-wooɠɛɠila nuiti saa vai ɠa ɗa ɠɛ gaazu ga faa ɓaa gola.¹⁶Ee, Ɠɔoɠɔ GALAGI, nà ga ɗa-wotiɠɛ zunui,nii ɗa-wotiɠɛ anzanui sɔlɔɔgai!È bà wɔinzeɠema ɠaluiti teʋea bà.¹⁷Nà faanɛɛ wuuɠwɛɛ zalaɠaiti kula è ʋɛ,gè wooɠula è ma, Ɠɔoɠɔ GALAGI.

¹⁸Nà nà-minazeɠegiti daazeeli, niiti gè ti ɠɛa Ɠɔoɠɔ GALAGI ʋɛ,nà naa ɠɛ ná-nuɓusɛiti pɛ gaazu,¹⁹Ɠɔoɠɔ GALAGI ná-koizuʋɛti,Zeluzalɛme laaʋeaiti saama.À Ɠɔoɠɔ GALAGI maamusɛ!

Guyeiti 116 / tod_pbt

Màliɠii ɠa ɗa gòoi mɛni

Guyeiti116tod_pbt