1À Ɠɔoɠɔ GALAGI maamusɛ, wo wooɠula, wo dɛɛ ga toɠa ga GALA,wo kɛɛ vaa wolaiti dɛɛ ziiti saama!2À guyei loo tɔun bɛ, wo maamusɛ ga gɛingɛin ganigiti!À kɛɛwoti maayikiaiti kpein dɛɛ!3À ɓɔɠɔ maamusɛ ga GALA daasei ɲadegai!Niiti ti Ɠɔoɠɔ GALAGI ɠaiziɛzu, naati ti ɠoozunɛ.4À Ɠɔoɠɔ GALAGI ɠaiziɛ ta ná-zɛbɛi,wɔin ɠɛ wo ma ga wo ɠɛ gaazu yeenɔpɛ.5À ɠizɛ kɛɛwoti maayikiaiti su, é ti ɠɛɛni,maaɓɛlɛ vaiti, ta ná-tukpɔɠaaleʋeiti,6wɔiti wo ga ná-botiɠɛ nui Abalaame mavofodaiti,wɔi wo ga Zakɔɓe ná-dointi, wɔi é yiimazeɠeai ga woye!7Ada-ƓALAGI ɠa ga Ɠɔoɠɔ GALAGI,toɠa deve eteai pɛ ma.8Ki ka ná-minazeɠegi zu yeenɔpɛ,wooi nii é fea yamani waagila (1.000) su nuɓusɛiti zea,9minazeɠegi é boni Abalaame ʋɛ,ta ná-kona wooi ɠɛ de Izaake ʋɛ.10É kɛ ga devei Zakɔɓe ʋɛ,é ɠɛ ga ɠɔoɠɔ minazeɠegi Izilayɛle ʋɛ.11É ɠɛni ma:«Nà Kanaan yooi veezu è ʋɛ,toɠa ɠɛ ga wɔnɔi wo sɔlɔɔsu.»12Ti lɔini gola,ti goa nɔ ɠɛni de, ti ná ga wɛɛinti ti seikɔɠɔmai zu,13ti ɠɛni leʋeteʋesu, ziiti pɔ bɛti,ta masadaiti pɔ bɛti.14Kɛlɛ GALA ge la ɠɛni ti yɛni na nu nɔpɛ ge ʋa ti maanɔɠɔ,ti makɛ vai ɠa é masagiti doɠani la.15É ɠɛni ti ma:«À mina naati sopele ɲɔu, niiti gè yiimazeɠeai ga tiye,à mina faa ɲɔu ɠɛ ga dàawoo laazeeli nuiti.»16É pului looni zooi zu ná pɛ,é daamiani fai ɠaaʋalani ba ti ya.17É zunu ɠila teʋeni ti luɠɔ,Zozɛfe, nii é ʋɔdini, é ɠɛ ga duɔi.18Ti daani kpeɠɔi ɠa,ti kɔlu yɔlɔɠɔi ʋili kɔgi ʋa,19eyɛsu naama voloi zeeli, Zozɛfe wooi laazeeli, nii é boni.Názu ɠa wooi nii Ɠɔoɠɔ GALAGI boni, naa dɛɛni la ga gaamai ɠɛni tɔun zea.20Masagi, nii é ga nuɓusɛiti ta-ɠundiɠii,naa devei veeni ga ti fie, ti yeeɓeni ba.21É seini ga ná-pɛlɛyeɠei ma ɠundiɠii,ta é kɛ ga kundiɠii naati kpein unda, niiti ti ɠɛni zeezu,22ga é ɗa masagi ná-kundiɠi wolaiti kala, ʋelei nɛai la bɛ,é ɗa ná-nu wolaiti kala ga ɠimalai.23Naa ʋoluma, Izilayɛle liini Ezipete yooi zu,Zakɔɓe ɠɛni ga seikɔɠɔma nu Same ná-zooi zu.24GALA ge ná-nuɓusɛiti maamɔinni gola,é ti-zɛbɛi wɔɔlɔ, é leʋe ti zili nuiti tɔnɔi ʋa.25É ti-ɠigi valiboni, wɔinzeɠemai lɔ ti-yiimaʋɛ ná-nuɓusɛiti daalɔɠɔma,ti ɗa ná-wooɠɛɠila nuiti yaava.26Názu ɠa é ná-botiɠɛ nui Moize leʋeni da,ta Aalɔn, nii é yiimazeɠeni la.27GALA sɛbɛi zu, ti laavɔɔ vaiti kɛɛni,ta maaɓɛlɛ vaa wolaiti, Ezipete nuiti saama, Same ná-zooi zu.28GALA ge kpidii leʋeni, kpidii ʋɛɛni zooi ɠa,nu nɔpɛ ge la ɠɛni daawooi zakpe.29É ta-ɗɛiti faliboni ga ɲamai,é kaleiti paa.30É zɔlɔgiti puuni zooi ɠa,eyɛsu ti ʋu ta-masagi laa ʋɛlɛiti bu.31GALA ge ɓɔɛni, dɛgiti ti ɠula,ti ʋu ta-yooi kpein ga, ta sosoligiti.32É sakɔtui ʋuuni ti ma, tonai ʋotogi zu,ta geeɓadɛi nii é abui yeini ti ma zooi zu.33É leezɛn ɓeleiti koloɠoloni, ta kooleɠoole guluiti,é ta-yooi ɠaa wuluiti galeɠaleni.34GALA ge ɓɔɛni, kotogiti ti ɠula,ta koto ziʋoiti, niiti nu la ti-liegɔ ɠwɛɛga.35Ti ta-yooi ɠaa lufaiti kpein miini,ti zooi ɠaa lɔnɔgiti kpein miini.36Naa ʋolu, é Ezipete nuɓusɛiti ti-loun zunu mɔungiti kpein paani,ti-zuvikɛi ma lɔnɔ mɔungiti.37É ná-nuɓusɛiti kulani ná ʋa, walii ta zanugi yɛni ti ya.Bolodamaiti saama, tanɔpɛ ge la ɠɛni ɲiikpini.38Ti lii vai ɠɛni ga koozunɛ Ezipete nuiti bɛ,mazɔlɔɔ ti ɠɛni luazu Izilayɛle nuɓusɛiti ba.39Maliɠii tonaɓiingi zuvieni ga é ti maalɔɔɠu,é abui ve ga naa kpidii zu ɠɛ kala.40Tɔɔzei ti falini, é kakalogiti feeni ti ya,ti yiɠoni ga ɓului, nii é zeɠeni geezuʋɛ.41É fasai laaʋalini, ziɛi ɠula,é vazani ada vɔɔiti, eɠɛ ziɛ wola.42É ɠizɛni ná-minazeɠe ɲadegai zu,nii é boni ná-botiɠɛ nui Abalaame ʋɛ.43É ná-nuɓusɛiti kulani Ezipete yooi ʋa ga koozunɛ wolai,ná-nuiti é yiimazeɠeni ga tiye, ti ɠulani ga guyeiti toa.44É zii ɠiligiti ta-yooiti feeni ti ʋɛ,ti nuɓusɛ ɠiligiti ta-wotii ma lɔnɔgi zɔlɔɔ ga tɔnɔ,45nii a kɛ ti ɠolo ná-deveiti bɛ,ti ná-tɔgiti so.À Ɠɔoɠɔ GALAGI maamusɛ!