Neɠemi8tod_pbt

1Ti pɛ ti ɠaalɛɛni ba Zeluzalɛme ɠi gilagi zu, ti zeini lawugi zu, nii é Ziɛ Ziɠidaʋɛ ɠakalaʋɛ. Ti ɠɛni sɛʋɛ ɠɛ nui Ɛsedalase ma, é ʋa ga Moize ná-tɔ sɛʋɛi, nii Ɠɔoɠɔ GALAGI feai Izilayɛle ya.2Alugi lɔfelasiɛi ma volo mɔungi ma, zalaɠa ɠula nui Ɛsedalase ʋaani ga tɔ sɛʋɛi bɛbɛi ɠakala nii gaalɛai ba, zinaa ta anzaa, niiti ta zoo naa ɠaaɠaazu, nii ti mɛnisu.3É tɔ sɛʋɛi ɠalani ti ʋɛ, é tɔɔzei sobui, eyɛsu foloi gaalɔ, é loni ada ɠilagi lawugi zu, nii é Ziɛ Ziɠidaʋɛ ɠakalaʋɛ. Nuɓusɛiti kpein goiloga ɠɛni de ga pagɔ, zunuiti ta anzanuiti, naa ʋɛɛ naati kpein ba, ta zoo faa ɠaaɠaazu.4Ti Ɛsedalase losuʋɛ ɓɛtɛni ga gului, gaalɛbai naama vai zu, miná ɠa é ɠɛni loni ná. Nui niiti ti ɠɛni loni zeezazuʋɛ, naati kaa: Matitia, Sema, Anaya, Ilii, Yilikiya, ta Maaseya. Zɔiti ti ɠɛni loni ga kɔʋɛzu ʋelei, naati kaa: Pedaya, Misayɛle, Malikiya, Ɠasume, Ɠasebadana, Zakali, ta Mesulame.5Ɛsedalase sɛʋɛi laalaoni nuɓusɛiti pɛ gaazu, tɔɔzei gaaɠoozani nuɓusɛi pɛ ba. É daalaogai ma, ɛsɛ pɛ ge kaani, ti wuzeɠe, ti lo.6Ɛsedalase Ɠɔoɠɔ GALAGI mamani, nuɓusɛiti pɛ ti-yeeiti tɛɛni geezuʋɛ, ti gooɠaaʋote, ti ɠɛ ma: «Amina-o! Amina!» Naa ʋoluma ti maayeini zooi ma, ti nɔkɔ Ɠɔoɠɔ GALAGI wu.7Ti ɠaalɔni, Levi nui niiti ka ti ɠɛni nuɓusɛiti kalasu ga tɔ sɛʋɛi zu wooiti: Zozuwe, Ɓani, Seleɓia, Yamin, Akuɓe, Saɓetayi, Wodiya, Maaseya, Kelita, Azalia, Yozaɓade, Ɠanan, Pelaya.8Ti ɠɛni GALA ná-tɔ sɛʋɛi ɠalasu gaaɠala fo,ti ɗa poluʋɛ zuɠula nuiti ma, nii a kɛ naati ti gaaɠa ga pagɔ.9Nuɓusɛiti ti tɔ sɛʋɛi zu wooiti mɛnigai ma, ti pɛ ti ɠɛni wɔlɔzu. Názu ɠa Neɠemi, nii é ɠɛni ga kundiɠii, ta Ɛsedalase é ga zalaɠa ɠula nui ta sɛʋɛ ɠɛ nui, naa ʋɛɛ Levi nuiti ba, niiti ti ɠɛni nuɓusɛiti kalasu, ti ɠɛni la nuɓusɛiti pɛ ma: «Za voloi ɠa ga Ɠɔoɠɔ GALAGI nɔnɔ, nii é ga wa-ƓALAGI. É la zolooni ga wo ʋa ɠɛ gaazuɠilii zu, wo ʋa ɗa wɔlɔ.»10Ɛsedalase ɠɛni ti ma ʋolu: «À liina wa-ʋɛlɛiti bu, wo daamiani pagɔiti mi, wo kpɔleɓɔle gani pagɔiti kpɔle, wo ta ve naati bɛ, niiti ta ɠɛʋele la ɓɛtɛni ti ʋɛ ta-ʋɛlɛiti bu. Mazɔlɔɔ za voloi ɠa ga ade-Maliɠii nɔnɔ, à mina ɠaazuɠili pa! Koozunɛɛi nii Ɠɔoɠɔ GALAGI feezu, naa ɠa é ga wo-zɛbɛi.»11Levi nuiti ti ɠɛni nuɓusɛiti pɛ gaanɛɛnɛzu, ti ɗa ɠɛ ma: «À maaɠɛ kpɔ, mazɔlɔɔ za voloi ɲadegɛ, à mina ɠaazuɠili.»12Nuɓusɛiti pɛ ti liini, ti daamii wo, ti ɗa ti ɠɔnɔgiti gaaɠwɛ ʋa ta niiti ani la ti ya, ta ti ɗa ɠoozunɛ ga gola. Mazɔlɔɔ ti naama wooiti pɛ gaaɠaani, nii ti suɠulani ti ma.

Kota vɛtii ɠula vai

13Foloi velesiɛi pɛlɛyeɠe ɠundiɠiiti kpein, ta zalaɠa ɠula nuiti, ta Levi nuiti ti ɠaalɛɛni ba sɛʋɛ ɠɛ nui Ɛsedalase ʋɔ bɛ, nii a kɛ ti tɔ sɛʋɛi zu wooiti kala ga pagɔ.14Ti kaani tɔ sɛʋɛi naa zu, nii Ɠɔoɠɔ GALAGI feeni Moize ya, ga Izilayɛle nuiti maanɛɛni ti ɗa ɲi kotaiti bu, kota vɛtii ma voloiti pɛ daawu, alugi lɔfelasiɛi ma.15Fɛti naa ɠula vai zu, kɛni ti zeze ta-laa wolaiti pɛ su, ta Zeluzalɛme, ti ɠɛ ma: «À ɠula, wo lɛ gizei zu, wo ʋa ga wolive wului ma laagiti, nii siingai ta nii é dɔɓɔi zu, wo ʋa ga milɛte daagi ta dɔɔ wului ma laagi, naa ʋɛɛ gulu ɓiiliiti gaalaagiti ba, nii a kɛ wo kotaiti to, ʋelei sɛʋɛai la.»16Nuɓusɛiti ti ɠulani, ti ʋa ga daaiti, ti kotaiti to, tanigaa ti to ta-ʋɛlɛ ɠɔmaʋɛ, ná ɓɛtɛai ga dooɠo bosuʋɛ, tanigaa ti to ta-ɠoi zaamaʋɛ, tanigaa ti to GALA sei ʋɛlɛi ma ɠoizuʋɛ, ta lawugi zu nii é Ziɛ Ziɠidaʋɛ ɠakalaʋɛ ta lawugi zu nii é Efelayime Ziɠidaʋɛ.17Nuɓusɛi niiti kpein ti ɠulani duɔlai zu, ti ʋa, ti pɛ ti kotaiti toni, ti ɗa ɲi ti wu. É zo Nun ná-doun zunui Zozuwe ná-siɛgi ma, é zeeli nuuma voloi ma, Izilayɛle la ɠɛni dɛ kɛɠala vɛti ɠulani. É ɠɛɛni ga koozunɛ vaa wola.18Fɛtii ma voloi ɠilagilagi kpein ti ɠɛni GALA ná-tɔ sɛʋɛi zu wooi ta ɠalasu, fɛtii yɛni ga folo lɔfela, foloi lɔsaʋasiɛi ti gaalɛba wolai ɠɛ, eɠɛʋelei deveai la tɔgi zu.
expand_more
Search