1Ɠɔoɠɔ GALAGI ɓɔɛni Moize ta Aalɔn ʋɔ, é ɠɛ ti ma:2«À ɓɔɛ Izilayɛle nuiti pɔ, wo ɠɛ ti ma: Zunu nɔpɛ kalaɲa kolegi ba, kɔzɔʋɛ naa maaʋele ma.3Ná-kalaɲa kolegi maaʋele ɠa kɔzɔai la, é ɠɛni ɠulazu kpusɛi ʋa, ɓaa suzo pa de, kɔzɔʋɛ.4Bete nɔpɛ a la su, naa ɠɔzɔʋɛ, ta ani nɔpɛ a zei ma, naa ɠa ɠɔzɔ.5Zɔi a vɔɔɠu ná-betei ʋa, kɛni naa ná-seɠeiti gba, é maagba. Kɔzɔai ɠa yɛ de, eyɛsu kpɔkɔi.6Zɔi a zeina ani ma, niigi é ɠɛa zeini ma, kɛni naa ná-seɠeiti gba, é maagba. Kɔzɔai ɠa yɛ de, eyɛsu kpɔkɔi.7Zɔi a vɔɔɠu kpusɛi ʋa, kɛni naa ná-seɠeiti gba, é maagba. Kɔzɔai ɠa yɛ de, eyɛsu kpɔkɔi.8A laaɗɛi ʋuuna nu ma, nii ɲadegai, kɛni naa ná-seɠeiti gba, é maagba. Kɔzɔai ɠa yɛ de, eyɛsu kpɔkɔi.9Seima ani nɔpɛ a zei ma togani ɠɔma, naa ɠa ɠɔzɔ.10Zɔi a vɔɔɠu ani nɔpɛ ba, nii é ɠɛa tɔun bu, naa ɠɔzɔai ɠa yɛ de, eyɛsu kpɔkɔi. Zɔi a naama anii ta zeɠena, kɛni é ná-seɠeiti gba, é maagba. Kɔzɔai ɠa yɛ de, eyɛsu kpɔkɔi.11Nu-o-nu nii kalaɲa kolegi ba, é la yeagbani, a vɔɔɠuna nu ʋa, kɛni naama nui ná-seɠeiti gba, é maagba. Kɔzɔai ɠa yɛ de, eyɛsu kpɔkɔi.12Pɔlɔ liɠii kpein tɔun ka vɔɔɠuna ba, kɛni naa wolo, gulu aniɲakai kpein ka gba ziɛi wu.13«Siɛgi zu ná-kalaɲa kolegi a ɓena la, toɠa folo lɔfela ɠaalu ná-ɲade fai zu, é ná-seɠeiti gba, é maagba ga ziɛungi zu ɗɛi. Naa ʋolu toɠa ɲade.14Folo lɔsaʋasiɛi ma, toɠa kpumago felegɔ zeɠe, ɓaa poopo kpokpa felegɔ, é li Ɠɔoɠɔ GALAGI ɠakala, GALA daaɠomi seɠe ʋɛlɛi laaʋɛ, é ti ve zalaɠa ɠula nui ya.15Naa ɠa gilagi ɠɛ ga koto gba zalaɠai, é zɔi ɠɛ ga gala zalaɠai, é koto gba vai ɠɛ tɔun bɛ Ɠɔoɠɔ GALAGI ɠaazu, ná-kalaɲa kolegi vaa zu.16«Zunui nii maaɠoloɠolosu, kɛni é ɓusɛi kpein gba. Kɔzɔai ɠa yɛ de, eyɛsu kpɔkɔi.17Seɠei kpein, ta kɔlɔi kpein a ʋu ti ma, naati ta gba ziɛi wu. Ti ɠɔzɔai ɠa yɛ de, eyɛsu kpɔkɔi.18«Ni zunui ta anzanui ta laana, ta maagba ti ɠilagilagi. Ti ɠɔzɔai ɠa yɛ de, eyɛsu kpɔkɔi.
Anzanui ná-ɲadetala vai
19«Anzanui nii ɲamai ɠulazu ba, tɔɔzei ná-alugi ɠa é kaazu, toɠa yɛ ná-ɲadetalai zu folo lɔfela laawu. Nu-o-nu a vɔɔɠu ba, naa ɠɔzɔai ɠa yɛ de, eyɛsu kpɔkɔi.20Bete nɔpɛ a la su ná-ɲadetala ziɛgi zu, naa ɠa ɠɔzɔ. Ani nɔpɛ a zei ma, naa ɠa ɠɔzɔ.21Nu-o-nu nii a vɔɔɠu ná-betei ʋa, kɛni naa ná-seɠeiti gba, é maagba. Kɔzɔai ɠa yɛ de, eyɛsu kpɔkɔi.22Nu-o-nu nii a vɔɔɠu anii ta ʋa, nii é ɠɛa zeini ma, kɛni naa ná-seɠeiti gba, é maagba. Kɔzɔai ɠa yɛ de, eyɛsu kpɔkɔi.23Ni anii ɠa betei ɠa, ɓaa ʋɛ seiɗai ná, zɔi a vɔɔɠu ba, kɔzɔai ɠa yɛ de, eyɛsu kpɔkɔi.24Ni zunu a laana ga anzanui naa, ná-kɔzɔi ʋɛa tɔun ba. Kɔzɔai ɠa yɛ de, folo lɔfela laawu. Bete nɔpɛ a la su, naa ɠa ɠɔzɔ.25«Anzanui nii ɲamai a yɛ ɠulazu ba folo mɔinmɔin daawu, é ɠula ná-alu kaa yeeɠɛɠala zoloogaiti polu, ɓaa ɲamai lɛbi ɠulazu ba, é leʋe pɔlɔmai ʋa, kɔzɔai ɠa yɛ de, ná-ɲama ʋuu ziɛgi kpein su, eɠɛʋelei nɔ ná-alu kaa yeeɠɛɠalai la.26Bete nɔpɛ a la su, naama ɲama ɠula ziɛgi laawu, naa ɠa ɠɔzɔ eɠɛ ná-alu kaa ʋetei, ani nɔpɛ nii a zeina ma, naa ɠa ɠɔzɔ, eɠɛ ná-alu kaa ziɛgi zu nɔ.27Nu-o-nu a vɔɔɠu ba, naa ɠa ɠɔzɔ, kɛni é ná-seɠeiti gba, é maagba. Kɔzɔai ɠa yɛ de, eyɛsu kpɔkɔi.28«Siɛgi zu é ɲadesu la ná-ɲama ʋui ma, toɠa foloi ɠaalu ga dɔfela. Naati poluma, toɠa ɲade.29Foloi lɔsaʋasiɛi ma, toɠa kpumago felegɔ zeɠe, ɓaa poopo kpokpa felegɔ, é li ga tiye zalaɠa ɠula nui ʋɔ, GALA daaɠomi seɠe ʋɛlɛi laaʋɛ.30Zalaɠa ɠula nui ɠa gilagi ɠula ga koto gba zalaɠai, é zɔi ɠɛ ga gala zalaɠai. Zalaɠa ɠula nui ɠa koto gba vai ɠɛ bɛ Ɠɔoɠɔ GALAGI ɠaazu, ɲama ʋui ma vaa zu, nii é ɠɛa kɔzɔzu.31«Wa Izilayɛle nuiti maaɠooza faiti kpein ba, ta ti ɠɔzɔ, naa ɠa a kɛ ti mina za ta-ɠɔzɔ vaiti su, ni ta nà-seɠe ʋɛlɛ ɲadegai ɠɔzɔna, nii é ti zaama.»32Tɔgi ɠana naama zunui ʋɛ, nii kalaɲa kolegi ba, ɓaa maaɠoloɠologai, é ɠɔzɔ,33ɓaa anzanui, nii kɔzɔai ga ná-alu kaa ɲamai, ɓaa zunui, ɓaa anzanui, nii ɲamai ɠulazu ba, ɓaa zunui, nii é laazu anzanui ɠoba, kɔzɔai.