Read Zɔɓe 9

Zɔɓe9tod_pbt

Zɔɓe Ɓilidade wooɠaaʋote fai

¹Zɔɓe gooɠaaʋoteni naazu, é ɠɛ ma:²«Gaamazu, gè kwɛɛ ga zekana é la.Nui ɠa lelebo ɠale GALA gaazu?³Ni nu ɠa pɔ é maaɠaali,é la zooga é ʋa gooɠaaʋote gila pa fe woo waagilagi (1.000) zaama.⁴GALA ka nɔnɔ ga ɠimalai, ná-zobogi zuɓaaʋɛ.Ɓɛ ɠa a sakpe, é ʋa ɓe ma zalai zɔlɔɔsu?⁵Toɠa ɗa gizeiti seɠe ti-losuʋɛ, ti la loa ga ná,é ti loka ná-ziiɠaawanai zu.⁶Toɠa ɗa zooi ɓali ma wuulaagiti maazu,ma lɔkpalaiti ti ɲiikpi.⁷A ɓɔɛna foloi ʋɔ, foloi la ɠulaa.Toɠa zoo pele ɓesasu somideɠaiti tuɠɔ ga ti volo.⁸Tɔ ɠila ka a ɗa geeɠɔlɔgi zuvie,tɔ ɠa a ɗa ziɛ kpoloɗɛi ɠaaɠoozazuʋɛti maazu.⁹Tɔ ɠa é geezu ʋoo golaiti kpɛtɛai, ti laa ga:‹Wuluse Golai›, ta ‹Wɔliyɔn›, ta ‹Peleyadegiti›,ta poogi é lɛkpɛma ʋelei nu yeezazuʋɛ.¹⁰Nii é kɛɛzu, naa wɔɔlɔʋɛ, nu la gaaɠaa,ná-laavɔɔ vaiti gaa la luga.

¹¹«Ni é ɠɛni leʋesu kòbaʋɛ, gè la ɠɛni kaa,naa ʋolu, a la maaɠooza, gè la ɠɛni loa ga ná.¹²Nii a so ga zɛbɛi, ɓɛ ɠa a kula zea?Ɓɛ ɠa a zoo é ɠɛ ma:‹Leeni ɠa è kɛɛzu?›¹³GALA ge la ná-ziiɠaawanai zuzoga.Ziɛ wu zua ɲɔiti Laɠaɓe ta polu ani ɓulugi, ta yɛ laani kɔɠɔwu.

¹⁴«Nɔ̀un nà zoo gè gooɠaaʋote ɠale?Wooi ɓɛgeleni ka nà yiimazeɠe ga tiye, gè ʋa ti wo ma?¹⁵Anɛɛ ni gaamai ɠa zèa, gè la zooga gè ʋa gooɠaaʋote nɔpɛ fe.Kɛni nɔ gè maawɔinɠai ɠaiziɛ nà-tukpɔɠaaleʋe nui ya.¹⁶Anɛɛ ni nà wooɠulana ma, é gòoɠaaʋote,anɛɛ naa ʋe, gè la zooga gè ʋa la da ga toɠa gòomɛnisu.¹⁷É tèʋegɛ fiilɛ wolai zu,É màawanazuʋɛ mɔin, un ge la ba.¹⁸É la vaazu bu, gè ʋa yɛnvu laaɠula.Toɠa dɛ nɔ zìimaʋɛ laavesu ga ani wanai.¹⁹Ni nà lona daawu, ná-zɛbɛi wɔɔlɔʋɛ.Nà ɠɛɛna gè ɓɔɠɔ maalobo?Ɓɛ ɠa a toli tukpɔɠaaleʋezuʋɛ?²⁰Anɛɛ ni gaamai ɠa zèa, toɠa pèelala,gè kpɔɛ nɔpɛ suɠula ʋa, toɠa pèelala anɛɛ ni nà ga sɔbalala nu.²¹Tama, nà ga sɔbalala nu! Kɛlɛ gè la yiizoolɛzu ga ɓɔɠɔ,zɛnvui wɔinzeɠea mà.²²Ti pɛ ta ga faa ɠila nɔ nɔ̀un bɛ, naa ɠa é ba, nà zoo gè ɠɛ ma:‹GALA ka ɗa sɔbalala nui ɠoloɠolo, ta nu ɲɔi ɓalaa.›²³Siɛgi zu faaɓaagi ʋaazu la, é sɔbalala nui ʋaa nɔ kpe,GALA ka ɗa ɲɛɛɠula sɔbalala nuiti ta-ʋoluɠulaiti su.²⁴Siɛgi zu zooi lɔɔzu la nu ɲɔiti ta-zobogi zu,toɠa ɗa tukpɔɠaaleʋe nuiti gaazuɠole.Mazɔlɔɔ ni tɔ laade, ɓɛ ɠili ka a naa ɠɛ?

²⁵«Nà-foloiti ti leʋega fala, eɠɛ kpizɛ wo nui,ti ʋela, ti la undaanɛɛi zɔlɔɔni.²⁶Ti leʋe gaamanɔ eɠɛ tɛmu ɓatoi,eɠɛ koɠɛi é yeizu, é zeɠe geezuʋɛ, é loo ná-daamianigi ma.²⁷Nà ɠɛna ma: ‹Kɛni gè yeema nà-ziizoolɛiti ma,gè ɠaazuʋɛ valibo, gè tɔɔzei ga ɲɛɛi woga,›²⁸màa ɠa ɓalizu nà-kpɔlɔiti kpein faa zu,mazɔlɔɔ è la sòga ga nui sɔ ge la ba.²⁹Nà la leve ga sɔba nu!Leeni vaa zu gè ɓɔɠɔ ɓɔlɔzu wafuun?³⁰Anɛɛ ni nà màagbazu ga kɔɔlɛ vukɔi ma ɗɛi,gè zèeiti gaagba ga tɔbɔgi,³¹ɗa dɔ̀ palaʋalai zu gaamanɔ,gè ɲɔu nà-seɠeiti gaazu.

³²«Mazɔlɔɔ é la ga nuɓusɛ ga kɛ̀ʋele nii nà zoo gooɠaaʋotesu,ɓaa gi ʋa ɠomi tukpɔɠaaleʋezuʋɛ.³³Ni nu ɠɛni gi felegɔ yɔɠɔzu ga zaamazunui,nii a zoo é dɔɔzɔɠɔzui wo,³⁴GALA ge ná-tukpɔi zeɠe màazu,ná-maalua vaiti ti ɓe, ti mina mɔ kpɔ̀lɔ,³⁵nà zoo gè ɓɔɛ pɔ, gè la lua ba.Kɛlɛ kɛɛɠeleɠele ge la ná, nà ɠila nɔ ɠa gè ɓɔɠɔ ʋa.»

Zɔɓe 9 / tod_pbt

Zɔɓe Ɓilidade wooɠaaʋote fai

Zɔɓe9tod_pbt