Read Zɔɓe 7

Zɔɓe7tod_pbt

¹«Nii deveai nuɓusɛi ma eteai zu, kpaaʋɛ eɠɛ salaʋusulai,sii ma voloiti kulaʋɛ eɠɛ nui é zalai ɠaiziɛzu.²Eɠɛ duɔi é foloi ɠa, é niinigi maaɓɔunsu,ta eɠɛ botiɠɛ nui é zalai maaɓɔunsu,³zekana gè la, gè alugiti kɛa taɓai zu,nà kpidiiti kɛɛzu nɔ kpɔlɔi zu.⁴Nà laana nɔ feya, nà ɗa ɠisiɛ ga: ‹Nà wuzeɠe siɛ kpɛgele zu?›Siɛgi zu kpidii zuɠoozazu la, dàa ɠa vesu ga kɛunga wuuleegi eyɛsu geelaalao.⁵Koegi ʋua kpùsɛi ʋa ná pɛ, kɔ̀lɔgi ɓaa ga pɔlɔi ɠɛʋelei,kɔ̀lɔgi ɗa ʋaliʋali, é ɗa ɠula ɓɔɠɔ ʋa.⁶Nà-eteai ɠa leʋesu ga maavilɛ, é leʋe seɠe vɛlɛ nui ná-keingi ʋa.Toɠa liizu, é ɓe, kito nɔpɛ ge la ɠɛa ná.

⁷«Ee, GALA, ɠizɛ su ga zɛ̀nvui ɠa ga fiilɛi nɔ,gàazuʋɛ la mɔ undaanɛɛi ɠaa ʋolu eyɛsu ɠɔ.⁸È-ɠaazuɠɛzɛi è ɠɛa wɛlɛzu mà la, naa la mɔ zooga é ʋa kà,siɛgi zu è wɛlɛzu la, gè la mɔ ɠɛa ná.⁹Tonaɓiingi ɠa ɗa ɲɛɛlɛ, é li,zekana é la, zɔi é yeizu gɔvɛalaazu, é la mɔ lɛa ʋolu.¹⁰É la mɔ ɠalega ma ʋolu, é ʋa ʋa ná-pɛlɛi wu,ta yeema ma seizuʋɛ ɓɔɠɔi.

¹¹«Naa ɠa é ba, gè la mɔ maaɠɛsu kpɔ ʋolu,zɛ̀nvui ɠa kidaaʋiligi laawu, kɛni mu gè ɓɔɛ.Nà kpalagi wosu nà-ziiɓɔlɔi laawu.¹²Nà ga kpoloɗɛi ɓaa, ɓaa kpoloɗɛ wu zua wolai,è nua ʋilɛsu dàalɔɠɔma ga ti ɗa wɛlɛ mà?¹³Siɛgi zu gè ɠɛɛzu ma la: ‹Nà-betei ɠa gàanɛɛnɛ,dàazuʋɛ ɠa ɓɔ bà ta zeɠe nà-taɓai ʋa,›¹⁴naazu ɠa è màaluazu la ga se wuulewuulegi,è gàalua ga kulakɛlɛmaiti.¹⁵Wɔ̀inʋɛ ga è dɔ̀ɔɓa,Ungo, saai vizɔgɛ mà, gè ʋa lia yɛsu ga mà ɠaei nɔ!¹⁶Faa kula ɠɛa, gè la yɛga ná ɠɔ,zɛ̀nvui la ga ani nɔpɛ, zɛ̀ ná dɔin.

¹⁷«Nuɓusɛi ɠa ga leeni, è ʋa wola ɠigaiziɛ ná-faa zu,ta ná-fai wola ʋa ɠɛ è-yii ma,¹⁸è ʋa ɗa ná-fai wuuʋɛtɛ sobu-o-sobu,ta è ɗa ʋa poluɠulazu yeeɠɛɠalai pɛ su?¹⁹Siɛgi ɓɛgele ɠa è-ɠaazuʋɛ zeɠezu la bà?Siɛgi ɓɛgele ɠa è ɓesu la bà, gè dàaɗɛi ɓɔle?²⁰Tɔun, anɛɛ ni gè koto ɠɛɛni, leeni ɠa gè kɛai ga ɗe, ɗɛi è wɛlɛzu nuɓusɛiti ma?Leeni vaa zu è daalogai nà nɔ bà?Gè ɠɛa ga kasɔ, ɓaa?²¹Leeni vaa zu è la nà-tɔ koloɠologiti suvaayɛsu,è ʋa ɓudɛ nà-faaɠaaza golai maazu?Mazɔlɔɔ nágo ʋe na, gè ʋa la fufiligi zu.Ɗa gàiziɛ, kɛlɛ gè la mɔ ɠɛa ná.»

Zɔɓe 7 / tod_pbt

Zɔɓe7tod_pbt