Zɔɓe41tod_pbt
1«Wɛlɛ, kitogi kpein é nu ya ga ɗa vɔni ma, ɗa ɠɛna loni tuɠɔ, naa ɠa nɔ ga dualuagi.Ɗa tɔ ɠila kpe kaana, ɗa lokasu.2Nu nɔpɛ ge la litini ga é ʋa ziiɠaawana vaa ɠɛ.Ɓɛ ɠa mu a zoo losu dàawu?3Ɓɛ ɠa é ani vea bɛ̀, gè ʋa potogi zala?Geeɠɔlɔgi wu, anii kpein ka ga nɔ̀nɔ.4«Gè la pɔ gè ʋa maaɠɛ kpɔ kpusɛi ʋaalobazuʋɛti faa zu,nà ná-zɛbɛi vai wosu, nu la pokɔɠɔ ga taɠili ma,ná-pagi, ta kpusɛi ɓɛtɛ ʋelei.5Ɓɛ ɠa é ná-seɠei ɠulaa ma ga kakala ʋelei?Ɓɛ ɠa é ziaa ɲiiga ɲɛkpɛ felegɔiti saama?6Ɓɛ ɠa é ɓɔiɗa da, é ʋa daalao?Ɲiiga ɠaazoɓagiti ta ga maalua aniiti.7Kɔɔɠɔ zɛpɛgi ma ɲɛkpɛ mɔinmɔin ka é ʋɛɛni poluʋɛ,ga kpaamaazu aniiti ti wola ɓatagai ɓɔɠɔ ʋa.8Ti ɠatagai ɓɔɠɔ ʋa, ti ɠilagila pɛ,fiilɛ la zooga leʋesu ti yɔɠɔzu.9Ti ɠiliʋɛ ɓɔɠɔ ʋa, ti ɠilagilagi,ti ɓɔɠɔ zo, ti la zooga ɠaaɠwɛɛzu.10«A lisomana, wozakalagi ɠa ɗa ɠula.Gaazuɠɛzɛiti kulaʋɛ ga geelaalaosuʋɛ ma wozakalagi.11Sɔmɔ abuiti ti ɗa ɠula daaʋɛ,abuɓeɓelaiti ti ɗa ɠula ná.12Duului ɠa ɠulazu sokpayeɠeiti su, eɠɛ ɠain kpɔvɔi abui ba,eɠɛ diɠii é nɛsu.13Sokpa zu viilɛi ɓadiʋɛ, é ɗa so tiɠi ʋa,abuzogi ɠa ɠulazu daaʋɛ, é ɗa vaza.14Ná-zɛbɛi ɠa zeini kɔgi zu,nu nɔpɛ a kaana, kɛni é lua ba.15Kɔlɔgi ɓilikpiligɛ ma, é mɔin ma.Anɛɛ ni nu ɠa ɓadɔzu ma gola, é la faa nɔpɛ kɛa la.16Kikpaaʋɛ eɠɛ kɔtui,kpaaʋɛ eɠɛ kɔtui ti kpooloi ɲɔfɔsu ma.17Siɛgi zu é wuzeɠezu la, suɓaa nu wolaiti ta ɗa lua.Ti ɠɛ unga wuulee, dualuagi vɔni ti ma.18Boɠa zɔkpɔi a ʋilina ma, po ge la ɠaa ba,kpɛɛin ɓalaa, ta mɛɛin ta kpɛɛn goi,naati ti la ga ani nɔpɛ zea.19Kɔlui ɠa gaazu nɔ eɠɛ tufa vɔɔi,kɔlu ɓɔigi ɠɛ gaazu, eɠɛ gulu luulai.20Nu la zooga é ʋa kpɛ ga mɛɛin,fɛlɛvɛlɛ kɔtuiti ta zea nɔ ga kaʋai.21Kpakɔi ɠa gaazu nɔ ga kpaku vɔɔi,a kpɛɛn ʋili tugi mɛnina, é ɗa ɲɛɛ wo.22Gulu ɠaazoɓagiti ka ti koozuʋɛ,a ɠɛna ziaa, é ɗa zooi woli, eɠɛ kaʋa loɠa wulu zɛpɛgi a ɠɛ palaʋalai zu.23À lɔɔna ziɛi wu, toɠa ɲiikpi eɠɛ diɠi a ɠɛ nɛsu,toɠa kpoloɗɛi valibo, eɠɛ ʋɛ gulɔ maku nɛɛnɛgi ɠalazu ná.24Toɠa wozakalagi yɛsu ʋoluʋelei pelei zu.Kpoloɗɛi ɠɛ eɠɛ undeɠa ɠolegi.25Kɛɠala la eteai zu,kpɛtɛʋɛ ga é mina lua ɲɛgɛlɛin.26Toɠa ɗa ɠaazulo sakpeɲɔɠɔiti pɛ ba, é la lua.Toɠa ga masagi filɛ zuaiti kpein unda.»