Zɔɓe39tod_pbt
1«È naama yeeɠɛɠalai ɠwɛɛ nɛi, nii fasa woliiti ta ɗa yiʋoi ʋilɛ da?Ɗa ɗa dopaiti pɛtɛ nɛi, siɛgi zu ti yiʋoi ʋilɛsu da?2Ɗa ɗa alugi ɠaalu nɛi, nii é kɛɛzu koozu?È ta-yiʋoi zɔlɔɔ yeeɠɛɠalai ɠwɛɛ nɛi ɓaa?3Ta ɗa zuɓili, ti ti-yiʋoi ʋilɛ,názu taɓai zeɠea ti ʋa.4Ti-yiʋoiti su ɠa ɗa lo, ti ɗa wɔɔlɔ fiilɛi ɠa,ta maaɠoozana ti-lee ʋa, ti la mɔ ʋaa pɔ ʋolu.5«Ɓɛ ɠa é dɔɓɔ zoovalegi ʋilɛgai ɓɔɠɔyeemai zu?Ɓɛ ɠa é dɔɓɔ zoovalegi viegai, ga é li?6Gè seizuʋɛ ɠɛɛʋɛ ga teʋebai zu,kpolo nɛmɛiti ka a ɗa ɲi ti zu.7Toɠa ɗa ɲɛɛɠula taazuʋɛ ma zɔngɔ wooi zu,é la sooi ná-totuɠɔ nui ná-kpee wooi mɛniga.8Toɠa gizeiti suɓizɛ, é ʋa ná-daamianigi zɔlɔɔ,tufa wundui kpein ka é gaiziɛzu.9«Teɠui wɔinʋɛ nɛi ga é lɔ ɗa-wotii zu?Toɠa ɲi nɛi ɗa-logani zasai ɠobaʋɛ?10Ɗa galu lo nɛi teɠui ʋa, ga é wozawoli è ʋɛ?Toɠa ʋilɛ nɛi è ʋolu, é ɗa kalii ɓokpo nɛmɛi zu?11Ɗa ɠito nɛi tɔun ba, tɔɔzei ná-zɛbɛi wɔɔlɔʋɛ gola?Ɗa ɗa-wotii zulɔnɔgi yɛ zea ɓaa?12Ɗa ɠito ba nɛi, ga toɠa ɗa-moloi leʋe è ʋɛ,é ʋaa la, é pu molo loɠazuʋɛ?13«Sokei ɠoʋegiti ta ɗa ʋɛɛ su ga koozunɛɛi.Kɛlɛ nu la ti ʋokɔɠɔga wɔnii naa nɔnɔi ma, nii daa ga sigɔɲe.14Mazɔlɔɔ sokei ɠa ɗa ɠain la fufiligi zu,é zou ɓadii yɛ ná, é ʋɛɛ ma bɛ,15é yeema ga nua ta ziɛ ma, ti golowolo,ɓaa dɔɓɔ zuaiti ta ziɛ ma.16Ná-dointi ti la loni zii ʋa, eɠɛ ti la ga nɔnɔ,é la yiizoolɛzu ga é mina ɓɔlɔ wafuun.17Mazɔlɔɔ GALA ge balani ɠimalai ma,é la nɔnɔ zɔlɔɔni keleɠelegi zu.18Kɛlɛ a wuzeɠena, é kpizɛi lɔɔzei,toɠa ɗa ɲɛɛɠula sooi ta kpizɛ nui zu, é ti yɛ ɠoozama.19«Ɗa ɠa è zobogi veezu sooi ʋɛ ɓaa,è maaɠili ga kɔma leɠai, nii a ɗa ɲiikpi?20Ɗa ɠa ɗa ɗa kɛ é ɗa ʋili fafa eɠɛ kotogi?A ɠɛna ɓɔɠɔ lɛa su ga kpɔzɔ wooi, sasuɓalii ɠa ɗa lɔ nuiti su.21Toɠa ɗa pɛtugi zuziɠa ga polokagi, koozunɛai ná-zɛbɛi ma.É ɗa li ga siliɲɔɠɔi ná-kɔɔɓɔgi laaɠomi ga.22É ɗa ɲɛɛɠula dualuagi zu, ani la maalua.É la ɠula ʋolu boɠa zɔkpɔi ʋɛ.23Kɔɔɠɔ zɔɔlaiti tugi ɠa lɛɛzu maazu:mɛɛn zeɠe ɓɔlɔi, kpɛɛin é volozu ta kpɛɛn goi.24É ɗa ɓali ga maaɓɔuntalai, é ɗa ʋili ga kpizɛ wolai.É la mɔ yɛga loni kpɛ, a puʋugi wooi mɛnina.25Siɛgi zu puʋugi vɛɛzu la, toɠa ɗa ɓain, é ɠɛ ma: ‹Ee!›,é yɛ ɠoozama, é kɔɔi ɠugi mɛni,ta kundiɠiiti sikɔ wooi, ta kɔɔ ɓeei.26«Ɗa-ɠeleɠelegi zaɓui ɠa é kɛɛzu seeʋei ɠoʋesu da ɓaa,é ɠoʋe, é li lɛkpɛmaʋɛ nu yeezazu ʋelei?27Ɗa ɠa è koɠɛi levezu, ga é lɛ fiilɛi zu,é laɠagi lo gizeiti maazuʋɛti?28Toɠa ɗa fasa ɠizei ɠɛ ga seizuʋɛ, é ɗa ɲii ná kuai,kɔtu laaʋalizuʋɛ ɠɛ bɛ ga siɠigi.29Ná ɠa é ná-daamianigi maaɓɔunsu ná,naa ɠa yɛsu ɠoozama, gaazuɠɛzɛiti ti ka.30Ná-doungoiti ta ɗa ɓɔɔle ga ɲamai.Ʋɛ nɔpɛ ani ʋoomaiti ti ná, miná ɠa a ɗa ɠɛ ná.»