Read Zɔɓe 38

Zɔɓe38tod_pbt

Ɠɔoɠɔ GALAGI ná-gooɠaaʋotegi

¹Názu, Ɠɔoɠɔ GALAGI yɛni fiilɛ wolai zu, é Zɔɓe wooɠaaʋote, é ɠɛ ma:²«Ɓɛ ɠa ga ɗe, è ʋa nà-deveiti gaaʋala ba ga ɠimalala ɓɔɛzuɠulaiti?³Ɗa-zaamaɠiligi ɠili eɠɛ ziilo nui,nà ʋaazu è ɠaazaɠasu, ɗa kàlasu.⁴Mini ɠa è ɠɛni ná,siɛgi zu gè ɠɛni eteai ɓɛtɛzu la?Dɛɛ lɛɛ nii è kwɛɛ ga ɗa-ɠeleɠelegi.⁵Ɓɛ ɠa é ma ɠɔɠɔgiti toni, è kwɛni ɓaa?Ɓɛ ɠa é kɔɠɔ bo galui laani maazu?⁶Ná-tɔkpalaiti kɔɠɔi lɔɔʋɛ ɓɛgele zu?Ɓɛ ɠa é ma sokoga ɠɔtui laani,⁷siɛgi zu sobui somideɠaiti ti ɠɛni guyei loozu la ʋɔɔma,siɛgi zu GALA ná-geezuɠeelaiti ti ɠɛni ɠoozunɛɛzu la, ti ɗa zɔngɔ?

⁸«Ɓɛ ɠa é daaɠuluni kpoloɗɛi ma,kɛai ma ɠulazu dee ɠoozu,⁹siɛgi zu gè tonaɓiingi ɠɛɛni la ga maazeɠei,gè maavelevele ganii ɠɛ ga kpidii,¹⁰gè pele ɓesani ná-kpizɛi luɠɔ, gè kwɛteʋe,gè daaɠuluni ma, gè sɔɠɔgi loo?¹¹Gè boni ma ga:‹Ɗa ɠwɛsu ʋɛ, è la ɓudɛa ná maazu, è ʋa li munu,ɗa-ɗɛ lakpatakpagiti ta-wasogi ɠa ɠwɛsu ʋɛ!›

¹²«Kaipa è ɠulani etea, è sobui levea ná ɠɛ liele,è seizu ve bɛ, a zei ná geelaabosuʋɛ,¹³é zooi lakɔlɔgi zo, é suɓukpunɛ,é faa ɲɔu ɠɛ nuiti sulua?¹⁴Naazu zooi ɠa valibo, eɠɛ penɛi nu zoo è yeeʋozɛ ba,anii pɛ kɛʋele ɓɛtɛai, eɠɛ seɠe a ɠɛ ti ɠɔba.¹⁵Kɛlɛ faa ɲɔu ɠɛ nuiti balagɛ ta-wozakalagi ma,ti-yeei buzeɠeai doɠa wo fai ma, naa ɠa ɠaleɠale.

¹⁶«È zeelia nɛi kpoloɗɛi nɔungi zu?È ziɛziɛga nɛi kpoloɗɛi ma ʋalii ɓomaʋɛ?¹⁷Saai ma ziɠidaʋɛti, ti ɠulani nɛi è ʋɛ kɛlɛma?È kpidi ɓɔii ma ziɠidaʋɛti ka ɓaa?¹⁸È eteai ɠaawɔɔlɔ ʋelei ʋɛtɛga nɛi?Bo dɛɛ, ni è naa kpein kwɛɛ.

¹⁹«Pelei ɠa mini, nii é liizu wozakalagi zeizuʋɛ,kpidii ma, mini ɠa seizuʋɛ ná,²⁰ga è zoo è gaaɠa, ʋɛ ti yeeɠaaɠwɛɛzu ná,è peleiti kwɛɛ ga pagɔ, é li ti-zeizuʋɛ?²¹È maanɛɛʋɛ è naati kpein kwɛɛ, mazɔlɔɔ è zɔlɔɔni niina,ɗa-voloiti mɔinʋɛ gola!

²²«È lia kɔɔlɛ vukɔi makɛsuʋɛ,è sakɔtui makɛsuʋɛ ɠaa nɛi ɓaa,²³nii gè puai ɠoba, maanɔɠɔ voloi ʋɛ,ɲɛpi ɠɔɔ voloi vaa zu, ta kɔɔɠɔ voloi?²⁴Pelei ɠa mini, wozakalagi a ɗa ɠula la, gaa ɗa ɠwɛ,mini ɠa folo ɠulazu ʋele viilɛi a ɗa zeɠe ná, é ʋa ʋu zooi ma?

²⁵«Ɓɛ ɠa é pelei laani sabalagi ʋɛ,é mainmain ta tona kpunɛ tugi ziɛ ʋelei la,²⁶ga tonai pu zooi ma, ʋɛ nu la ná,é ʋu teʋebai zu, ʋɛ nu vulu la ná,²⁷ga é zou vɔɔi yɛɓɛ, adaʋɛ náti fɔai,nii a kɛ gui ʋɔnɔ, tufa wundui ɓaɠa?²⁸Kɛɛɠɛ ɠa nɛi tonai ʋɛ?Ɓɛ ɠa é nɔɗagi ɠilagilagi ɓɛtɛni?²⁹Ɓɛ ɠoozu ɠa kɔɔlɛi ɠulaai ná?Geeɠɔlɔgi ma ɠolegi zɔlɔɔ nui ɠa ga ɓɛ?³⁰Siɛgi zu é ziɛi ɓuunsu da, naa ɠa ɓaa kpekpe eɠɛ kɔtui,ziɛi ɠaaʋɛ ma vuɠeiti ti ɠili ʋa kpe eɠɛ fasai.

³¹«Geezu ʋoogi daa ga ‹Peleyadegiti›, ɗa zoo è galui lo ba,ɓaa nii daa ga ‹Wɔliyɔn›, è naa vie?³²Ɗa zoo è poogiti kula kɛlɛma ta-yeeɠɛɠalaiti ma?Poogi daa ga ‹Wuluse Golai›, ɗa lo naa luɠɔ ta ná-somideɠa ɠiligi zɔiti?³³È geeɠɔlɔgi zu lɔgiti kwɛɛ nɛi?Ɗa ɠidaazu nɛi zooi ná-fai wu, ta ná-seikpasui?

³⁴«Ɗa wooɠula tonaɓiingi ma,nii a kɛ sabalagi ʋu è ma?³⁵Ɗa ɠa ɗa ɗa mainmain leve,é ʋa leɠa ziɛ, é ɠɛ è ma: ‹Giya ɠaa›?³⁶Ɓɛ ɠa é ɠimalai lɔa nuɓusɛi yiimaʋɛ,ta faa yɔɠɔzuɠwɛɛ zɛnvui?³⁷Ɓɛ ɠa a zoo é tonaɓiingi ɠaalu ga ɠimalai maaʋele,é geeɠɔlɔgi ma ɠɔlɔ liɠiiti maala,³⁸siɛgi zu fufiligi ɓaazu la kpe eɠɛ kɔtu,zooi ma ʋɔlɔ ɓuiti ti ɗa ɓɔɠɔ zo?

³⁹«Ɗa zoo è dosoi ɠɛ, è zala zaai laamianigi zo bɛ,è pului zeɠe zala ɓokpagiti ma,⁴⁰siɛgi zu ti ʋɛɛni la ta-yeɠei zu,siɛgi zu ti ʋuuni la kpifɔ, tufai maazu?⁴¹Ɓɛ ɠa a ɗa kalawɔnii ná-daamianigi ɓɛtɛ bɛ,siɛgi zu ná-ziʋoiti ti wɔlɔzu la GALA goizu,ti ɗa ziɛziɛ, daamiani ge la ti ya?»

Zɔɓe 38 / tod_pbt

Ɠɔoɠɔ GALAGI ná-gooɠaaʋotegi

Zɔɓe38tod_pbt