Zɔɓe37tod_pbt
1«Naama vaiti pɛtɛga laawu, zìi ɠa ɲiikpisu kòozu, eɠɛ a ɠɛ ɠɛɛzu é ʋili, é ɠula tosuʋɛ.2À woilo, à woilo dɛɛ GALA gooi lugi ma,sikɔ gooiti kpein ti ɠulazu daaʋɛ.3GALA ka ɗa ná-mainmain zaɠa mini-o-mini geezuʋɛ,mainmain naa ɠa ɗa leʋe eteai zu mini-o-mini.4Tɔun poluʋelei, GALA gooi ɠa ɗa ɠula, é ɗa zikɔ,daawoo maayikiai lugi ɗa ɠula.Gaamago nɔ, GALA ka ɗa mainmainti teʋe ʋolu ga niinɛ,tama nu ɠa ɗa goomɛni.5Maayiki vaa ʋe, ʋelei GALA ge zikɔzu la ga gooi,toɠa faa wolaiti kɛɛzu, de la ti ɠaaɠaazu.6Toɠa ɗa ɠɛ kɔɔlɛ vukɔi ma: ‹Ʋu eteai zu,›é sabalagi ʋu, ta tona zɛbɛlɛgi.7Naama ziɛgi zu, nuɓusɛiti ti la mɔ zooga faa nɔpɛ kɛɛzu,naa ɠa a kɛ, nuiti kpein ti kwɛɛ ga naa ɠa é ga ná-kɛɛwotii.8Anɛɛ dɔɓɔ zuaiti ta ɗa ɓɔɠɔ maalɔɔɠu,ti li, ti la ta-yeɠeiti su.9Tɔngɔlɔ fiilɛi ɠa ɗa zeɠe ga lɛkpɛma ʋelei nu yeezazuʋɛ,kɔɔlɛi zeɠe lɛkpɛmaʋɛ nu ɠɔʋɛzuʋɛ viilɛiti pɔ.10Ziɛi ɠaa ɠa ɗa ɲi ga GALA daa viilɛi maaʋele,gaaʋɛ ɓaa eɠɛ kɔlui.11GALA ka ɗa tonaɓiingiti kasɔɠili ga dɛilɛigi,é ti leʋe mini-o-mini, mainmain ɗa saɠa ti zu.12Zekana a ɗa ti ziɛziɛ da adaʋɛ pɛ,nii a kɛ ti naa ɠɛ eteai zu ná pɛ, nii é ti leʋesu ma.13Kɛɛʋɛ eɠɛ kpakɔi ɠa é eteai loɠazu la,ɓaa kɛɛʋɛ eɠɛ ná-wooɠɛɠiladai ɠa é dɛɛzu ga tiye.14«Zɔɓe, woilo dɛɛ niima vaiti ma.Lo dɛɛ, è ɠigaiziɛ GALA ná-faa maanɛɛnɛgiti su.15È kwɛɛ nɛi ɓaa, ʋelei GALA ge losu da niima vaiti untuɠɔ,ta ʋelei tonaɓiingiti ti mainmainti saɠazu la?16È kwɛni ɓaa, ʋelei tonaɓiingiti ta lo da kpɛ?Laavɔɔ vai naati ta naa yeezu, nii ná-faaɠwɛgi laazeeliai.17Ɗɔun ɗa kaazu ga è maaɠiliʋɛ gola, die golai zei è ma,siɛgi zu lɛkpɛmaʋɛ nu yeezazu viilɛi zooi zuvikɛi ɠulazu la zea.18Ɗa la zoo nɛi è ɓɔ GALA ba, siɛgi zu é ɠɛni geeɠɔlɔgi ɓɛtɛzu la,é ɓaa, eɠɛ pɛtɛgi puai kɔlu ɓɔigi zu?19«Ɗa zoo nɛi, è naa lɛ ga giye, nii gá bo ma?Faa nɔpɛ ge la ná, nii gá tɔun kala da,ti pɛ suɓidiʋɛ gi ɠaazu.20Siɛgi zu gè kpɔɛi wosu da, kɛni é loo ɠisu ɓaa?Ɓaa kɛni é wo ma, ga nui ta ɓɔɛʋɛ?21«Wɛlɛ, gaamago nɔ, nu la mɔ wozaɠaazu fɔɔn,foloi lɔɔɠua tonaɓiingiti poluʋɛ.Názu ɠa fiilɛi wuzeɠezu la, é geei ɠaaɓale.22Wozakalagi é volozu, naa ɠa wuzeɠezu ga lɛkpɛma ʋelei nu ɠɔʋɛzuʋɛ.Wozakalagi é volozu GALA maaɠoolii zu, maayikiʋɛ!23Toɠa ga Zɛbɛi-Pɛ-Maliɠii, de la zooga vɔɔɠuzu ba,bɔɔlɔʋɛ ná-zɛbɛi ta ná-telebodai maaʋele ma,kɛlɛ é la ɗa ga sɔledai ta teleboda laazeeliai ʋɛlɛʋiliga.24Naa ɠa é ba, nuiti maanɛɛʋɛ ti lua ba,kɛlɛ tɔun, maavaa la naati ba, niiti ti ɓɔɠɔ ɠaazu ga ɠima nuiti.»