Zɔɓe36tod_pbt
1Eliyu liini luɠɔma ga kpɔɛi, é ɠɛ ma:2«Màaɓɔun dɛɛ, Zɔɓe, gè faiti zɔɠɔzulɛ ga ɗe,mazɔlɔɔ faa mɔinmɔin kana dɛ a wo GALA ná-faiti su.3Nà nà-faaɠaaɠai zeɠezu ɠoozama,gè gaamai ve Kpɛ̀tɛ ƓALAGI ya.4Nii gè bosu, gaama ɠitei ʋe,ɠima nu ɓɔɠɔɓɔɠɔ ka é è ɠoba.5«Ungo, GALA bɔɔlɔʋɛ gola, é ʋa li nui ʋɛlɛʋɛlɛsu,zobobɛ ƓALAGI ʋe, ná-devei la valiboga.6É la nu ɲɔi yɛga vulua,kɛlɛ toɠa ɗa maanɔɠɔ nui ná-gaamai maalobo.7É la ɗa ga ɠaazu zeɠe telebo nuiti ba,kɛlɛ toɠa ɗa ti zei masa kpɔkpɔgi ɠa masagiti koba.Toɠa ɗa ti ʋilɛ ná, ga ti zei ná eyɛsu ɠɔ, é ti wɔɔlɔ.8Ni ti ɠiliʋɛ ga yɔlɔɠɔiti,ni ɠiliʋɛ ga maanɔɠɔ ɠaluiti,9naa ɠa ga, toɠa ta-ɠɛɛwotiiti poluɠulazu,tɔ koloɠologiti ti ti ɠɛɛni ta-wasogi zu.10Tɔ ɠa é ti lɛnɛsu, é ti ɠala,ga ti ɓeteʋe ta-vaa ɲɔiti ba.11Ni ta woilona, ti ɠolo GALA bɛ,ta ta-voloiti gaaɓela undaanɛɛi zu,ta-ɠonagiti gaa ɠa ɓela gaanɛɛi zu.12Ni ti la woiloni, ta ʋilɛ pelei naa ma é liizu gɔvɛalaazu,ti undaa ɠa ʋili ta-faaɠwɛtalai zu.13«GALA gaazuluabalala nuiti ta ɗa ta-yiiɠaawanai makɛ,ti la wooɠula kpɔba ɠaiziɛ vaa zu, siɛgi zu GALA ge ti ɠilizu la ga yɔlɔɠɔiti.14Ta yɛsu nu niinɛlai zaamaʋɛ, ti za,ta-eteai ɠaaɓela koloɠolo nuiti saama.15GALA ka ɗa maanɔɠɔ nui unmɔɔ ga ná-maanɔɠɔi maaʋele,ta é kpɔlɔi zeɠe, é kɛ ga zaɓui naa woilo goo ma.16«Ɗa ɓalaagi, toɠa è ɠula kidaaʋiligi zu,é undaanɛ wolai ve è ʋɛ,é ɗa-laamii wo taɓalii ɠaalaave ga daamiani nɛɛnɛgiti.17Kɛlɛ niizu, faa ɲɔu ɠɛ nuiti ta-maaɠoloi zeelia è ma,tukpɔi ta faawogi ti è zoga.18Ziiɠulagi mina è li ɲɛɛɠulasui ma!Mina ɓɔɠɔ ɠaka ga kisiɛi, ga ɗa ɠaaɓaana è faanɛɛi ɠɛ, ɗa GALA geya.19È ɓain gooiti ta ɗa-ɠaaɓaaiti ta kula ɠɛ nɛi ɓaa,ti ʋa è ɠula kidaaʋiligi zu?20Mina ɠito kpidii ʋa gola,a ɗa nuiti suvaza, ti zeɠe ti-losuʋɛ.21Dama ga ɓɔɠɔ, è mina ɠaaʋote faa ɲɔi ma.Mazɔlɔɔ naa ɠa é kɛa, è kpɔlɔi zu.22«GALA bɔɔlɔʋɛ, zobogi ɠa bɛ,kalagi wo fai zu, kɛɠala la ná.23Ɓɛ ɠa a ɗa pelei lɛɛ la?Ɓɛ ɠa é zooga é ɠɛ ma: ‹Nii è kɛɛzu, é la zolooni›?24Mina yeema, è maamusɛ kɛɛ vaiti faa zu,nii nuɓusɛi kpein ge dɛbizu ma vaa zu ga guyeiti.25Nuɓusɛi kpein ka wɛlɛzu ba,nui kpein ka yɛsu ɠoozama, é ɗa ka.26Wɛlɛ ʋelei GALA bɔɔlɔai la, ná-bɔɔlɔi ɓudɛʋɛ da-ɠisiɛiti maazu.Nu nɔpɛ ge la zooga é ʋa ná-konagi liegɔi ɠaalu.27Toɠa ɗa nɔɗa koiti mɛɛn ʋɔ pelei,é ɠɛ ga diegi, é ɠaaɠale ma, é ɠɛ ga tonai.28Tonaɓiingiti ti faza, é ʋu nuɓusɛiti ma.29Ɓɛ ɠa a zoo é tonaɓiingiti siɛ ʋeleiti gaaɠa,ta ʋelei tona kpunɛ tugi ɠulazu la geezuʋɛ?30Wɛlɛ maaɠoolii zu, ʋelei mainmain saɠazu la,é ʋɛɛ kpoloɗɛi ma ʋali wolai ɠaaʋɛ.31Nuɓusɛiti ta yɛnvuzu ga tonai maaʋele, é puuzu,é daamianigi ve ti ya ga bɔɔlɔa.32Toɠa ɗa mainmain zo yee felegɔi ɠa,naa ʋolu, é diizuʋɛ lɛɛ la.33A ɠɛna ʋaa, toɠa ɗa dɛɛ ga ná-tona kpunɛ tugi maaʋele,toganiiti ta looga ná ga maaɓuɠa.»