Read Zɔɓe 33

Zɔɓe33tod_pbt

¹«Niizu, Zɔɓe, woilo dɛɛ kìsu vaiti ma,woilo gòoiti kpein ma.²Wɛlɛ, nà laalaosu,nɛ̀gi ɓɔɛ è ʋɔ.³Zìi ná-sɔledai ɠa nà-kpɔɛiti ti ɠulazu su.Kala kitei ɠa dàaʋɛ bosu.⁴GALA Zɛnvui ɠa é kpɛ̀tɛai,Zɛbɛi-Pɛ-Maliɠii ná-fiilɛi ɠa é zɛ̀nvuzu.⁵Ni ɗa zoo, gòoɠaaʋote,ɗa-ɠɛʋele ɓɛtɛiti kɛ, è lo gàazu!⁶GALA gaazu, nà ga è ɠɛʋele,kpɛ̀tɛʋɛ ga pɔlɔi.⁷Naazu è la ɓalia ga dualuagi nɔ̀un gaazu,ɓaa è ʋa ɠisiɛ ga nà-zobogi ɠa è ɠoloɠolosu.

⁸«È boni, é loo gòizu,gè è-laawooiti mɛnini ga:⁹‹Ɲàdegɛ, tɔ koloɠolo ge la bà.Kòleʋɛ, gè la faa nɔpɛ gaazani.¹⁰Anɛɛ naa ʋe, GALA ka faiti kpɛtɛzu dàalɔɠɔma,é ɗa pɛ̀tɛ ga zili nu.¹¹É kɔlui ʋiliga kɔ̀ɠɔiti ba,é ɠaazulo kɛ̀ɛ vaiti kpein ba.›

¹²«Nà è wooɠaaʋotesu ga, gaama la è ya naa zu,mazɔlɔɔ GALA bɔɔlɔʋɛ nuɓusɛi ʋa.¹³Leeni vaa zu è pɔ è tɔun maaɠaali,tɛi é la ɗa ga ɗa-ɠaazaɠagiti gaaʋotesu vai ʋe, è ti ʋilisu ma?¹⁴Anɛɛ naa ʋe, GALA ka ɗa ɓɔɛ,ná ta ga pelei nii, ɓaa nuuma ʋelei,kɛlɛ nuɓusɛi la ɗa ga ɠida bu.¹⁵Toɠa ɗa ɓɔɛ ga segi ta kulakɛlɛmai kpidii,siɛgi zu ɲiimɛni wolai nuiti kpein sosu da,siɛgi zu ti ɲiizu la ta-ʋeteiti su.¹⁶Názu ɠa a ɗa kulakɛlɛmai ɠɛ la nuiti bɛ,kalagi é bosu, é maaɓakpa,¹⁷nii a kɛ é nuɓusɛi zeɠe ná-kɛɛwotiiti polu,é ti makɛ, ti mina loo wasogi zu.¹⁸Zekana é ti-yɛnvui ɠizosu da kabai ma,toɠa pele leʋesu ti luɠɔ ga ti mina ʋilɛ pelei naa ma é liizu gɔvɛalaazu.

¹⁹«Nui ɠa ɗa yɛ daazuʋɛ ga taɓai maaʋele, é ɠigi zɔlɔɔ, é lɛnɛ,siɛgi zu seeɓɛi kaeiti kpalizu la, dooɠo ge la ba.²⁰Naazu ɓului ɠa ɗa ɲɔu da,anɛɛ daamianigi niiti wɔinɗai ga tiye gola.²¹Kɔlɔgi ɠula ma, é ɠaɲa, nu ɠaazulosu la ba,kaeiti nu la ɠɛa ti ɠaazu, naati ti ɠula kɛlɛzu.²²É maaɓuɠaa kabai ʋa.Zɛnvui ɠa niina saa ɠeezuɠeelaiti zea.²³Kɛlɛ ni GALA ná-geezuɠeelai gila ga ɠɛna zunui naa ɠoba,é ɠula waagiti saama, é pele zɔlegi lɛɛ la,²⁴naazu toɠa zaalai la ma, é maawɔinɠa, é ɠɛ GALA ma:‹Mina zɛ ná, é ʋa yei kabai zu, gè unmɔɔ ganii zɔlɔɔga,›²⁵názu ɠa kpusɛi niinɛzu la eɠɛ ná-doungo ziɛgi zu,é ɠale ma ná-doungoyai ma voloiti ma.²⁶Toɠa wooɠula GALA ma, naa yeezei bu ga pagɔ,é lo gaazu ga koozunɛ wooi.Mazɔlɔɔ GALA ka kwɛɛsu ga niinɛ ga telebo nui.²⁷Toɠa too ga guyei ɛsɛ pɛ gaazu, é ɠɛ ma:‹Gè koto ɠɛɛni, gè tɔgi ɠoloɠolo.Kɛlɛ GALA ge la sòni ga nà-faaɠaazagi, é ʋa dòɠa.²⁸GALA ge kùlani kabai zu,zɛ̀gɛ vulua, gè wozakalagi ɠa.›²⁹Pɛtɛ, GALA ka naa kpein kɛɛzu nui ʋɛ,ná ɠɛ fele, ná ɠɛ saʋa,³⁰nii a kɛ é zɛnvui ɠula ʋolu kabai zu,é fulu nuiti ta-wozakalagi ve zea.³¹Lo dɛɛ, Zɔɓe, woilo gòoi ma!Maaɠɛ kpɔ, gè zoo gè ɓɔɛ è ʋɔ.³²Anɛɛ naa ʋe, ni gooɠaaʋote ka è ya, bo,mazɔlɔɔ kòozu ɠa nɛɛ, gè ɠɛ è ma, gaamai ɠa è ya.³³Ni faa la è-la, è ʋa bo, maaɠɛ kpɔ,è woilo gòo ma, nà è ɠalasu ga ɠimalai.»

Zɔɓe 33 / tod_pbt

Zɔɓe33tod_pbt