Read Zɔɓe 31

Zɔɓe31tod_pbt

¹«Gè tɔgi zeini gàazuʋɛ maga é mina gaazuɠulapɔ wɛlɛ wo anzalopo ʋa.²Ni naa laade, leeni ɠa nà la sɔlɔɔ faa maaɓɔunGALA Zɛbɛi-Pɛ-Maliɠii ya, nii é geezuʋɛ?³Tɔɔzei maanɔɠɔi la makɛni telebotala nuiti bɛ ɓaa,ta nimizai naati bɛ, niiti ti faa ɲɔi ɠɛɛzu?⁴GALA ge la sìɛ ʋelei ʋɛtɛsu nɛi ɓaa?É la kɔ̀ɠɔlo daa ɠilagilagi pɛ gaalusu ɓaa?

⁵«Zɛɛi ɠa nɛi gè ɠɛa ziɛzu su?Kɔ̀ɠɔ zu ɠɛa vilɛzu ga gè li kakama vaa ɠɛɛzuʋɛ?⁶GALA ge kɔ̀ɠɔ telebo kilo ɠa,é ɠɛ nà-sɔledai ɠwɛɛ!⁷Ni kɔ̀ɠɔi zeɠeni pele ʋagɔi ma,ni zìi ʋilɛni nà-gaazuɠulapɔ vaiti polu,ni zèeiti kɔzɔʋɛ ga kɛɛwoti ɲɔi ta,⁸naazu nii gè fazasu, taɠili ge naa mi,niiti gè ti ziinni, taɠili ge naati tɔɔɠula.⁹Ni gè looni anzanu lɛga zu,gè li, gè ɗa maaʋɛɛnɛ seiɲɔɠɔi ná-pɛlɛlaʋɛ,¹⁰naazu ànzai boti ɠɛ nu ɠili bɛ,nuiti ti-yiimai ɠɛ su!¹¹Mazɔlɔɔ maaɓoo vaa ɠana, ɲamaba vaa ɠana,nii tukpɔɠaaleʋe nuiti ta ɗa ma lukpɔi ɠaaleʋe.¹²Nà-faaɠaazagi a la ɠɛ ga abui, a la gàla, eyɛsu é kòloɠolo,é naa kpein koloɠolo, nii gè sɔlɔɔni.

¹³«Nà-botiɠɛ zunui ta, ɓaa nà-botiɠɛ anzanui ta, a la ɓaazaɠana mà,gè ɓena gaaɠula ba, gè maalobo.¹⁴Ni naa laade, leeni ɠa nà kɛ, siɛgi zu GALA ge wuzeɠezu la ga é tùkpɔ?Gè la zooga gè ʋa gooɠaaʋote, ni a ɠɛna gè ʋoluvaawo ma.¹⁵Zɔi é kpɛ̀tɛai dèe ɠoozu, tɔun taade é ʋa ti ɓɛtɛ ɓalaa ɓaa?Ungo, ma GALAGI ɓɔɠɔi nɔ ɠa é gi kpein kpɛtɛni gi-lee ɠoozu.

¹⁶«Yeelɛ ɠa gè ɠɛlɛni la maawɔin nui ná-kpɔba vaa ʋa,ɓaa gè poanzai yɛ ná-kitotalai zu?¹⁷Anɠɛ nɛi nà ɠila ka gè ɠɛni nà-daamianigi miizu,podoin la ta miini?¹⁸Tɔun é zo mà loungo ziɛgi zu ma,bɔɔlɔʋɛ zèa, eɠɛ ɠɛɛɠɛi.Siɛgi kpein su gè ɠɛni poanzai lɛnɛ nui.¹⁹Kaipa gè maawɔin nu ɠaa ʋɛ, gè zɛ seɠe ʋalagi zu,ta bala nui gè naa yɛ pɛɛmazeɠe ʋalagi zu?²⁰Ɓa-o, tɔun ti ɠɛni tuya loozu bɛ̀,tɔɔzei gè ɠɛni seɠei veezu ti ya nii su ɓadiai, kpɛtɛai ga nà-baalagiti maaleɠai.²¹Ni nà ɠɛna podoun maaluani tukpɔɠaaleʋezuʋɛtɔɔzei gè kwɛɛ ga tukpɔɠaaleʋe nuiti ta ga nà-poluzeigiti,²²kpàkigi ɠula pòluzaamaʋɛ ʋa,ta zèei ɠula zeeɓoɓolaʋɛ ʋa, é ɠaleɠale!²³Mazɔlɔɔ nà luazu maanɔɠɔi ʋa, nii GALA ge teʋeni,maayikiʋɛ, gè la zooga gè ʋa lo tuɠɔ.

²⁴«Gè ɠitoni nɛi zanugi ʋa? Ɓaa gè ɠɛ ma: ‹Dɔ̀ɔɠuzuʋɛ ɠa!›²⁵Gè la ɠɛni ɠoozunɛɛni nɔ zèaɠɔligiti mɔin vai zu,naavoloiti gè ti zɔlɔɔgai ga zèei.²⁶Siɛgi zu gè foloi ʋɛtɛni da, é ɗa volo ná-keɠaaɓaai zu,ɓaa siɛgi zu gè alugi ɠaani la, é ɗa ziɛ geezuʋɛ ná-maayikii zu,²⁷gè ɠakani zìimaʋɛ dɔɔɠuzu,gè ʋa yeeʋɛɛ la, ga gè nɔkɔ ti wu ɓaa?²⁸Kaka faa ɠana, nii maanɛai é lukpɔ.Nà la ɠɛlɛ GALA ba, nii é geezuʋɛ.

²⁹«Yeelɛ ɠa gè ɠɛni ɠoozunɛɛzu la, ga gè sìli nui ɠaa dɔai maanɔɠɔi zu,kòozunɛ, tɔɔzei faaɓaagi zeelia ma,³⁰nɛ̀i gè la vaani bu pɛ nɛ̀gi ʋa koto ɠɛ,ga gè ʋa foovo, gè ɠɛ GALA ma, é za.³¹Ɓɛ ɠa gè la kɔnɔkulani ga suai, é ʋa yiɠo?Niiti kpein gè ti laazuʋɛɛni, naati ta naama zeele wooi wo.³²Wɛɛn la ɲiini etea,gè nà-pɛlɛi laalaoni siɛ wo nuiti bɛ.³³Eɠɛʋelei nuɓusɛ mɔinmɔin ga ɗa kɛ la,gè nà-tɔ koloɠologi lɔɔɠuni nɛi ɓaa?Gè ɠɛlɛ ga gè mina nà-faaɠaaza golai ɠwɛɛ?³⁴Kaipa gè la luani nui zɔiti ta-lukpɔɠaaleʋei ʋa.Ti ɠɛni zoosu ti ɲɛɛɠula sù, naa la ɠɛni màaluazu,naa la dàaɠuluni kaipa,ɓaa é ʋa pele ɓesa tùɠɔ ga gè mina ɠula.

³⁵«Ee, ni nu ɠɛni bɛ̀, nii é woilosu gòoi ma!Gòo ɠaaɓelagi ɠana!GALA Zɛbɛi-Pɛ-Maliɠii ná-gooɠaaʋotegi ve zèa.Nii é ga maalɔɔ vai sìli nui sɛʋɛai,³⁶nà naa laazu ɠɔma, gè dɔ ùnba eɠɛ masa bɔɔlɔgi.³⁷Nà ʋoluvaawo ma ga nà-kɛɛwotii ɠilagilagiti pɛ,gè li tɔun pɔ bɛ eɠɛ masa!³⁸Ni nà-zooiti ti pèelalani,ni gè ta-wozawoliaiti gaawɔlɔni,³⁹ni gè ti-ʋaalɔnɔgiti miini nɔ, gè la ti ɠeyani,ni gè naati nimizani, niiti ti ɠɛni ti botii ɠɛɛzu,⁴⁰adaʋɛ moloi naa ná, nii é ga ɓeleegi, ɠaingiti ti ʋɔnɔ miná,ta moloi nii daa ga wɔɔlezegi, gui ɲɔi ʋɔnɔ naa ʋotogi zu!»Zɔɓe ná-kpɔɛiti kwɛsuʋɛ ɠa.

Zɔɓe 31 / tod_pbt

Zɔɓe31tod_pbt