Read Zɔɓe 29

Zɔɓe29tod_pbt

Zɔɓe ná-kpɔɛzuɠula ɠaaɓelagiti

¹Zɔɓe ɓɔɠɔ liini ga luɠɔ ná-kpɔɛzuɠulai zu, é ɠɛ ma:²«Ee, wɔ̀inʋɛ ga gè ɓɔɠɔ ɠa nà-kɛʋele wɔlɔmai zu,siɛgi zu GALA ge ɠɛni ɓaazu la màazu, gè ɗa nà-eteai ziɛ,³siɛgi zu ná-sɔmɔgi ɠɛni volozu la màazu,ná-wozakalagi ɠɛni ɓɔsu bà, gè ɗa kpidii zuziɛ,⁴eɠɛʋelei gè ɠɛni la mɔungi sɛ̀bɛi pɛ gaavɔnigai sù,siɛgi zu GALA ge ɠɛni la ga nà-pɛlɛyeɠei nɛɛɲɔɠɔi,⁵siɛgi zu Zɛbɛi-Pɛ-Maliɠii ɠɛni bà la dɛ.Naama ziɛgi zu, dòun zunuiti pɛ ti ɠɛni ɠɛɛzu màaɠoolii zu.⁶Naama ziɛgi zu, gè ɠɛni lasesu undaanɛɛi zu,gulɔ ɓoigi ɠɛni yeizu nà-gulɔ ɓɛtɛzuʋɛ.

⁷«Nà la ɠɛna ɠulaa, gè ʋa li taa ziɠidaʋɛ,siɛgi zu gè ɠɛni liizu la, gè seizuʋɛ ɓɛtɛ maaɓɔ bosuʋɛ,⁸nu niinɛiti ta la kàana, ti ɓena ʋoluazo,kɛwola wɔlɔiti ti wuzeɠe, ti lo.⁹Kundiɠiiti ti ɓena kpɔɛzuɠulai yɛ ná,ti yeeʋɛɛ la, ti maaɠɛ kpɔ.¹⁰Nu wolaiti ti ɠɛni maaɠɛsu kpɔ,ti-nɛgi ɠata ti-laaɠoozuʋɛ ʋa.

¹¹«Zɔi a la gòoi mɛnina, naa ɠɛni ɠɛɛzu mà, undaanɛ nui.Zɔi a la kàana, naa ɓena li, é nà-faa ʋagɔi wo.¹²Gè ɠɛni maanɔɠɔ nuiti kulazu, niiti ti ɠɛni kpɔbai ɠaiziɛzu,ta podoin ɓalaa, nii é la ɠɛni kpɔba zɔlɔɔsu.¹³Niiti ta la ɠɛ saa yeɠei la, naati ti ɠɛni tuya loozu bɛ̀.Gè ɠɛni poanzaiti koozunɛɛzu.¹⁴Telebodai ɠa é ɠɛni kɔ̀ba ga seɠei,faa zɔle fai ɠɛ kɔ̀ba ga seɠeungi, ta bɔɔlɔgi ùnba.¹⁵Gè ɠɛni ga gaazuɠole nuiti gaazuɠɛzɛi,ta kɔɠɔ ɠoloɠolo nuiti kɔɠɔi.¹⁶Gè ɠɛni ga bala nuiti ti-ɠɛɛ,gè ɠɛni wɛɛinti maavaiti gaaɠulazu ba.¹⁷Gè ɠɛni nu ɲɔi ɓalɔɠaeiti galeɠalezu,gè daamianigi ɠula ɲiigaiti ga.

¹⁸«Gè ɠɛni ɠɛɛzu ma naazu:‹Nà zaazu mà laɠagi zu,sìi ma voloi ɠa mɔinzu eɠɛ ɲaɠaegi.¹⁹Gè ɠɛa eɠɛ gulu wolai, kɔɠɔi ziɛi wu,kpidii nɔɗagi ɠa yeizu, é ɗa ʋu mà ɓekegiti ga.²⁰Nà tɔɠɔɠula niinɛ zɔlɔɔ ʋolu,ta zɛbɛ niinɛi, eɠɛ mɛɛin maalegai.›

²¹«Naama ziɛgi zu, ti ɠɛni wòilosu, ti ɗa maaɓɔun,ti ɗa maaɠɛ kpɔ, ga ti woilo nà-tɛnɛ gooiti ma.²²Nà la ɓena ga ɓɔɛ, nu la ɠɛni maaɠaalia,dàawooi ɠɛni ʋilɛsu ti pɛ ma, pein, pein.²³Ti ɠɛni màaɓɔunsu, eɠɛʋelei nu a ɗa tonai maaɓɔun da.Ti-ɠigi loni bà, eɠɛʋelei a ɗa ɠɛ la foɠo lonai ʋa.²⁴Gè ɠɛni ɲɛɛzu ti ʋɔ, kɛlɛ ti la ɠɛni laani da,gàazuʋɛ ná ɠɛni volozu, ti la ɓena zoo ti ʋa naama voloi ɠaaʋa.²⁵Gè ɠɛni ti untuɠɔ, gè ɗa pelei lɛ ga tiye,gè ɠɛ ti zaama eɠɛ masagi nii é ná-salaʋusu ɓulugiti saama,eɠɛ nui nii é iɲɔteʋe nuiti gaanɛɛnɛzu.»

Zɔɓe 29 / tod_pbt

Zɔɓe ná-kpɔɛzuɠula ɠaaɓelagiti

Zɔɓe29tod_pbt