Ɓɛ ɠa a zoo é ɠimalai zɔlɔɔ?
1Adaʋɛti ta náʋɛ, ta ɗa walii ɠula ná,adaʋɛ tanigaa ta ná, ta ɗa zanugi gba ná.2Kɔlui ɠa ɗa ɠula fufiligi zu,kɔtui ɠaawuungai ɠa kɔlu ɓɔigi a ɗa ɠula su.3Zanu kula nuiti ta ɗa zeɠei wɔ,ti yei zooi wu, wozakalagi lɔ ná,ti kɔtuiti kula niiti ti lɔɔɠuai kpidii zu, kpidi ɓɔii zu.4Ta ɗa zeɠei wɔ zooi wu, maaɠooza nuiti seizuʋɛ ʋa.Ʋɛ nu ɠɔɠɔlosu nɔpɛ ge la ná, zanu kula nuiti ti ɗa ɲiikpi.Ti zɛlɛni ada ɲakai maazu, ti maaɠoozaai zɔɔma nuɓusɛiti ba.5Zooi nii daamianigi zɔlɔɔsu ba,naa ɠa valibosu kpomaʋɛti eɠɛ abui.6Ná-kɔtuiti ta miná ʋɛ, kɔtu zɔngɔ ɓaagi daa ga safiil,naa zɔlɔɔsu ná, ta zanu fukɔi.7Seeʋei la naama ʋelei ɠwɛɛ,sizigoi ɠaazuɠɛzɛi la dɛ ná ɠaani.8Suai nii kpein daai ɓɔɠɔ la,naa tanɔpɛ ge la dɛ ziɛni ma,zalai la ɗa ga ziɛ ná.9Nui ɠa zoosu é laalɛ fasa ɠɔtuiti golo vai wu,é gizeiti kpusɛ eyɛsu ti zeeli ti ma wuulaagiti ma.10Toɠa fasa ɠɔtui zuwɔɔzu,gaazuɠɛzɛi ɠa zoo é ani ʋagɔi kpein ka su.11Toɠa ziɛi luɠɔlo,naavoloiti ti lɔɔɠuai, é naati kula kɛlɛma.12Kɛlɛ, nii é ga ɠimalai,mini ɠa nu a zoo é ka ná?Mini ɠa keleɠelegi zeini ná?13Nui la sɔngɔi liegi ɠwɛɛ,nu la ka fulu nuiti ta-yooi ɠa.14Palii ɓomaʋɛ ɠɛ ma: «É la sù.»Kpoloɗɛi ɠɛ ma: «É la pɔ̀ bɛ.»15È la zooga è ʋa zanu kitei ve potogi zu,ɓaa mu, è walii ɠɔɠɔ kiloi ɠa è ʋa geya la.16É la ʋokɔɠɔga zanugi ma, nii é ga Wofiil gelei,ɓaa kɔtu zɔngɔ ɓaagi nii é ga wonikese, ɓaa safiil gelei.17È la zooga è ʋa zanugi ɓaa sanugi ti pokɔɠɔ ma.È la zooga è ʋa aniɲakai maavalibo da, nii é ga zanu kitei.18Anɛɛ nu la kpɔzɔi ta sanu ʋɛɛlɛi ti ta-vaa woni.Ɠimalai zɔlɔɔ fai vizɔgɛ kɔtu zɔngɔ ɓaagi ʋa é ga pɛɛlegi.19Kɔtu zɔngɔ ɓaagi é ga Etiyopi gelei, naa la ʋokɔɠɔga sɔngɔi ma.Zanu kitei la ʋokɔɠɔga sɔngɔi ma.20Mini ɠa ɠimalai zeɠezu ná?Mini ɠa keleɠelegi zeini ná?21Dɔɔɠuʋɛ nu vului kpein ba,dɔɔɠuʋɛ wɔniiti ba.22Undaaʋili zeɠezaɠai ta saai ta ɠɛɛzu ma:«Gi ná-fai mɛnigɛ nɔ, é ɗa wo.»23Mazɔlɔɔ GALA gila kpe ka é pelei ɠwɛɛ, nii é liizu pɔ bɛ.Ungo, GALA ka é seizuʋɛ ɠwɛɛ.24Mazɔlɔɔ ná-wozaɠaai ɠa zeelizu eteai zu ná pɛ.Nii kpein é ɠɛɛzu geeɠɔlɔgi wu, toɠa kaazu.25Siɛgi zu é fiilɛi wuɲɛgi ɠɔɠɔni da,é kpoloɗɛiti kɔɠɔ,26é tonai ná-fai zeikpasu,é pelei ve mainmain ya, ta tona kpunɛ tugi,27názu ɠa é ɠimalai ɠaani la, é kula kɛlɛma.É ɠimalai ma wuulaagi laani,é sumɔ, é fɛɠɛlɛfɛɠɛlɛ.28Naa ʋolu, é ɠɛ nui ma:«Lua Maliɠii ʋa, è dɛbi, naa ɠa é ga ɠimala ɠitei!È ʋoluave faa ɲɔi ʋa, naa ɠa é ga keleɠelegi!»