Read Zɔɓe 22

Zɔɓe22tod_pbt

Elifaze ná-kpɔɛzuɠulai zaʋasiɛi

¹Teman nui Elifaze kpɔɛi lɔɔzeini, é ɠɛ ma:²«Nui losu ɠa zoo nɛi é ɠɛ Ɠɔoɠɔ GALAGI ʋɛ?Ɠima nui ɠa botii ɠɛɛzu ɓɔɠɔ nɔ ʋɛ.³Kɛlɛ Zɛbɛi-Pɛ-Maliɠii ná-kulanumai ɓɛgele ɠa é ɗa-lelebodai zu?Leeni ɠa a sɔlɔɔ, ni è-ziɛ ʋelei a zɔlena?⁴È laaʋɛ da, ga toɠa è maaɠolozu, é è lukpɔ,tɔɔzei ɗa unmaayeizu ná-zobogi wu?⁵È la ɓɔɠɔ ɠɛɛni ga sɔba nu tooma vaa mɔinmɔin su ɓaa?Kwɛ ka nɛi ɗa-vaaɠaazagiti ba?⁶È ɠɛni kpɔunmai ɠulazu è-zeiɲɔɠɔiti zea, un ge la ba.È ɗa nuiti ta-zeɠeiti kula ti ma, eyɛsu è ti maaɲakai ʋilɛ.⁷Nui kpɔɔle wɔin ma, è la ɠɛni ziɛ veeni naa ya.Nui pului ɠɛni ma, è naa ɠomani ga daamianigi.⁸È zooi lɔɔni tooma nui yeezu.Nui nɛai è ʋɛ, naa nɔ ɠa è ɠɛni seizu ɓɛtɛzu.⁹È ɠɛni yeeɓesu poanzaiti ba, ti li ga yeaɲaka.È ɠɛni podointi suvikɛi ɠulazu ti ya.¹⁰Wɛlɛ, naa ɠa é ba, baliiti daai è maaɠoolizu,gaamago nɔ, dualua golai è zogɛ.¹¹È la kpidii naati kaazu ɓaa,ziɛi naati kpein ti è maaɓɔlesu?

¹²«GALA ge la geeɠɔlɔgi zu ɓaa?Geezuʋɛ ʋɛtɛ, ná ɠaaɠoozaai, somideɠaiti ɲɛkpɛai ga!¹³È woo ɠaaɓela ga: ‹GALA ka zoo nɛi é suɠwɛɛ?Toɠa zoo nɛi, é ɓudɛ tonaɓiingi maazu, é tukpɔi ɠaaleʋe?¹⁴Tonaɓiingiti gaaɠiligɛ gola GALA gaazu, é la ani nɔpɛ kaa,siɛgi zu é ziɛzu la, é ɗa lati geeɠɔlɔgi ma.›

¹⁵«Ɗa pɔ è yɛ pele wɔlɔmai ʋolu,nii telebotala nuiti ti ziɛni la?¹⁶Ungo, ti leʋeni ga ma yeeluɠɔ,eɠɛ siɠigi nii ziɛ ɓoigi yeizu la.¹⁷Tɛi ti ɠɛni ɠɛɛzu GALA ma: ‹Maaɠooza gi ʋa!Toɠa ga Zɛbɛi-Pɛ-Maliɠii, leeni ɠa a zoo é kɛ ga giye?›¹⁸Anɛɛ naa ʋe, tɔ ɠa é ta-ʋɛlɛiti buulaaveni ga ani ʋagɔiti.Faa ɲɔu ɠɛ nuiti ta-lɛnɛ gooi maaɠoozani bà.¹⁹Telebo nuiti ta ti-ɠoloɠolosuʋɛ ɠa, ti ɠoozunɛ.Sɔbalala nuiti ta ɲɛɛɠula ti zu, ti ɠɛ ma:²⁰‹Ungo, ade zili nuiti pɛtɛ, ti ɠoloɠologa!Nii dɔi ti zɛni, abui naati galani.›

²¹«À yɔɠɔzuɓɛtɛ wa GALA, ziilɛigi ɠaiziɛ wo yɔɠɔzu wa tɔ.Ʋele ɠana undaanɛɛi a ɠaaɠale ma la è ma ʋolu.²²Kalagi zo tɔ ɓɔɠɔi bosu ga ɗe,ɠizɛ daawooiti su.²³Ʋa ʋolu Zɛbɛi-Pɛ-Maliɠii ʋɔ, toɠa è zei ʋele ɓɛtɛ ʋolu,telebotala vai kpein maaɠooza è-zeizuʋɛ ʋa.²⁴Zanugi é è ya, pili ya zooi ma,ɓaa è zanu kitei yɛ kɔtuɗɛi ma ɠɔtui saama.²⁵Naazu Zɛbɛi-Pɛ-Maliɠii ɠa ɠɛ è ʋɛ ga zanugi, ta wali wola.²⁶Mazɔlɔɔ naazu, ɗa GALA Zɛbɛi-Pɛ-Maliɠii ná-fai ɠɛ ga è yiima vai,ɗa ɠaazuʋɛ wuzeɠe, è to GALA ba ga ladalai.²⁷Ɗa wooɠula ma, toɠa è wooɠaaʋote,ta ɗa ɗa-minazeɠegiti daazeeli.²⁸Ni ɗa deve wona, naa laa ɠa zeeli è ʋɛ,wozakalagi ɠa volo ɗa-ʋeleiti kpein su.²⁹Ni nui ta ɠa ná kpɔlɔai, ɗa buzeɠe.Mazɔlɔɔ GALA ka ɗa ɓɔ naa ʋa, nii é ga ɓɔɠɔmaayei nui.³⁰Toɠa sɔba nui unmɔɔ ɓalaa.È-yee ɲadegaiti saɓui zu ɠa zunui naa a ɠizo da.»

Zɔɓe 22 / tod_pbt

Elifaze ná-kpɔɛzuɠulai zaʋasiɛi

Zɔɓe22tod_pbt