Read Zɔɓe 19

Zɔɓe19tod_pbt

Zɔɓe Ɓilidade wooɠaaʋote fai

¹Zɔɓe gooɠaaʋoteni, é ɠɛ ma:²«Wa yɛsu kpɔ̀lɔzu eyɛsu yeelɛ?Ungo, wa yɛsu kpɔ̀lɔzu ga wa-ɓɔɛiti eyɛsu yeelɛ?³Ná zeizu ɠɛa puu, wo ɗa kìgi zupu!Wo la unfesu ga kpɔ̀lɔ vai?⁴Ni kàkagɛ, nà-kaka fai ma ɠasɔi ɠa la ùnma.⁵Ni wɔun wa kaana ga wo vizɔgɛ bà,ni wa ɠɛna zeliloga mà nà-unfe fai zu,⁶à suɠwɛɛ ga GALA ka é tòsuʋɛ ɠoloɠologai,é ná-tumɔi lo màaɠoolii zu.⁷Ni nà kpee loona suɲɔu vai laalɔɠɔma, nu nɔpɛ ge la gòoɠaaʋotesu.Ni nà kpɔbai maalolina, telebo faa la ɠɛɛzu.⁸GALA ge pelei leʋeni tùɠɔ, gè la zooni gè ʋa leʋe.É kpidii ʋɛɛni nà-peleiti su.⁹É ɓaazeɠeni mà,é nà-lɛbiya wɔɔlɔgi ɠula ùnba.¹⁰É tòka mini-o-mini, ta nà ga li.É nà-kitogi lɔɔɠula eɠɛ gului.¹¹Ná-ziiɠaawanai lokoleʋeni dàalɔɠɔma.É dèveni eɠɛ sili nui ta.¹²Ná-kɔɔɓɔgiti pilɛgɛ pelei ma ʋɔɔma,ti ʋaa pɔ̀, ti ta-ʋelei laani,ti ti-zeizuʋɛ ʋu sèizuʋɛ maaɠoolii zu.

¹³«É nà-nu ɓɔɔɓɔgiti maaɠoozani bà.Kwɛ̀ɛ nuiti ti vazani, ti maaɠooza bà.¹⁴Nà-nu ɓɔɔɓɔgiti ti ɠɛlɛni bà,nɛ̀ɛɲɔɠɔiti ti ɠɛlɛni bà.¹⁵Nà-pɛlɛ wu nuiti ta nà-botiɠɛ anzanuiti ɓɔɠɔi,ta kɛɛzu eɠɛ nà ɠɛ ga wɛɛn.Kɛ̀ɛʋɛ ti ɠaazu, eɠɛ nii nu la kwɛɛ.¹⁶Nà nà-botiɠɛ zunui lolisu, é la gòoɠaaʋotega,anɛɛ ni nà maanɛɛnɛzu.¹⁷Dàaʋɛ makugi ɠa ɠulazu ànzai ɓɔɠɔi zokpai zu.Wɔ̀inzeɠea kòozu lointi ma.¹⁸Anɛɛ doungoiti ti ɠɛlɛa bà.Siɛgi zu gè pɔ gè wuzeɠe la, ta ɲɛɛɠulazu sù.¹⁹Bɔ̀ɔlaiti kpein ta luazu bà.Niiti gè ti nɛɛni ʋɛ gola, naati ti ʋoluavega bà.²⁰Gè vɔa ɠae ma,ta gè ʋalaga anii pɛ ma.²¹À màawɔinɠa, à màawɔinɠa, wɔiti wo ga bɔ̀ɔlaiti!Mazɔlɔɔ GALA zeei ɠa é dòɠani.²²Leeni vaa zu wo ʋilɛsu pòlu, eɠɛʋelei GALA ge ʋilɛsu da pòlu?Wo la dɛ ɓɔlɔni ɓaa ga kpùsɛi ɓɔlɔ vai?

²³«Ee, ni nui ta ɠa dàawooiti sɛʋɛ!Ni nui ta ɠa yeeʋozɛ ti ʋa, ti zɛʋɛ sɛʋɛi zu!²⁴Ti zoo ti kɔlu ɠaazoɓagi zeɠe, ti sɛʋɛ la fasai ma,ti kena kpui ziɛ su, sulɛi, é yɛ ná eyɛsu ɠɔ!²⁵Gè kwɛɛ gè ɠɛ ùnmɔɔ nui ɠa vulua,tɔ ɠa é wuzeɠezu ga gaaɓelagi eteai zu.²⁶Niima ɓusɛi ɠoloɠologa ʋoluma,nà ɠɛ kpùsɛi zu, gè GALA ka.²⁷Nà ka nà ɓɔɠɔi ga gàazuʋɛ.Nà ka ga gàazuʋɛ, nu ɠili nɔnɔ laade.Ee! Zìi ɠa ɠalazu kòozu ga maaɓɔungi naa wo fai.²⁸Wa ɓɔɠɔ ɠaazaɠasu ga, gá ʋilɛ polu ɠale?Goozuɠulagi ɓɛgele ɠa ada tukpɔ la?²⁹À lua boɠa zɔkpɔi ʋa,mazɔlɔɔ maaɠoloi ɲɔu ʋe, nii é ɠɛɛzu ga boɠa zɔkpɔi,naa ɠa a kɛ wo suɠwɛɛ ga tukpɔɠaaleʋei ɠa ná!»

Zɔɓe 19 / tod_pbt

Zɔɓe Ɓilidade wooɠaaʋote fai

Zɔɓe19tod_pbt