Read Zɔɓe 16

Zɔɓe16tod_pbt

Zɔɓe Elifaze wooɠaaʋote fai

¹Zɔɓe gooɠaaʋoteni, é ɠɛ ma:²«Gè naa ɠɛɠala vai ma mɔinmɔin gola mɛniga,wo kpein wa ga gaanɛɛnɛ nu ɲɔiti.³Siɛ kpɛgele ɠa wo ɓesu ɓɔɛzu la eɠɛ fiilɛi?Leeni ɠa é è ɓɔlɔzu, è ɓɔɛzu ɠani?⁴Nà ɓalaagi nà la zoo ɓɔɛzu ga wo ɠɛʋele,ni wo ɠɛni pòtogi zu,gè kpɔɛiti bo wo laalɔɠɔma,gè nɔ̀ungi ɲiikpi wo maazu ga ɲɛɛɠulasui.⁵Nà la wo iɲɔdɔ ga dàawooi,gè dàkɔlɔgiti ɲiikpi, naa a la wo yiilɛi.

⁶«Anɛɛ naa ʋe, ni nà ɓɔɛzu, nà-kpɔlɔi ɠaa la yeizu,ni nà maaɠɛna kpɔ, toɠa zeɠe bà ɓaa?⁷Niizu, gaamai zu GALA ge zɛbɛi ɠula zèa,é nà-pɛlɛyeɠei pɛ gaaleʋea.⁸É kɔ̀lɔgi maaɓilikpiliga, é gòla vɔ ɠae ma.Naa ɠa pèelalazu, é kɛ̀ ga sɔba nuiniima vai zu é zeelizu mà.⁹GALA ka bàlizu ga ná-ziiɠaawanai zu,é laalɛ bù, é ɗa ɲiigaiti siɛ ga dàalɔɠɔma.Sìli nui gaazu ɗa volo su.¹⁰Nuiti ta laa wolaiti daalaosu dàalɔɠɔma,ti ɗa gòizuloɠa, ti ɗa gòla ʋoomu,ti ɠili ʋa dàalɔɠɔma.¹¹GALA ge dɔ̀ɔni telebotala nuiti zeezu.É kɛ̀ɛni ga faa ɲɔu ɠɛ nuiti daamianigi.¹²GALA ge ʋaani, é ziilɛigi ɠula zèa, ʋɛ gè ɠɛni vulua ná.É sòni kɔ̀poluʋɛ, é sùɓezeɠele.Gè ɠɛa ga ná-mɛɛinti pilisuʋɛ,¹³ta ɠoʋesu nɔ màaɠoolii pɛ su.Toɠa sàamaʋɛ zuvolosu, maawɔinɠa la su.Zìi ma wanai ʋua ya zooi ma.¹⁴É ɗa palai loo bà, palai ʋoluma,é ɗa ɓizɛ màazu eɠɛ kɔɔɠuluɓai.¹⁵Gè saa wɔlɔ wo seɠei zɔlɔɔga, gè too ɠɔba.Gè gàazu unfegi lɔa fufiligi zu.¹⁶Gɔlɔ ɲɔuɲɔugi gàazuɠɛzɛiti kpɔiɗa su,saai ma niinigi ɠa gàazuɓedeɠagiti ba.¹⁷Anɛɛ naa ʋe, suɲɔu vaa la zèeiti kɔzɔni,wooveleda la ɠɛɛni nà-GALA falii zu.

¹⁸«Zooi mina mà ɲamai lɔɔɠu,nà-kpee wooi ɠaa mina yei.¹⁹Mazɔlɔɔ niizu niina zeele ɠa bɛ̀ geeɠɔlɔgi zu.Ungo, nu ɠa zèema geezuʋɛ, nii a zeele wooi wo bɛ̀.²⁰Bɔ̀ɔlaiti ta ɲɛɛɠulazu sù,GALA ka nà ɗa wooɠula ma ga gàazuɗɛi.²¹Nà-zeelei ɠɛ ga zaamazu lobo nuigá GALA gi yɔɠɔzu,eɠɛ nui nii é bɔɔla nu vului maalobosu.²²Sìi ma voloi ɠana ɓe,nà ga li ga pelei naa, nii gè la mɔ ɠalega ma la pɛ.»

Zɔɓe 16 / tod_pbt

Zɔɓe Elifaze wooɠaaʋote fai

Zɔɓe16tod_pbt