Read Zɔɓe 13

Zɔɓe13tod_pbt

¹«Ungo, gaamazu, naati kpein, gè ti ɠaani ga nà ɓɔɠɔi gàazuʋɛ.Gè ti mɛnini ga nà ɓɔɠɔi gòiyeɠeiti, gè ti ɠaaɠa ga pagɔ.²Nii wo kwɛɛ, gè naa ɠwɛɛ nà ɓalaa,gè la kula bu wo ʋɛ ga tago ɓalaa.

³«Kɛlɛ Zɛbɛi-Pɛ-Maliɠii ɠa gè wɔinni gè ɓɔɛ pɔ,GALA ɓɔɠɔi ɠakalaʋɛ ɠa gè pɔ gè ɓɔɠɔ maalobo ná.⁴Wɔun wa, bɔ̀ɔlaiti, zɛɛi ɠa wo kpɛtɛzu,wo kpein wa ga zɛɛ zale ɠula nuiti.⁵A la vizɔ wo ma, wo maaɠɛ kpɔ suɠila!Wa la ɠɛ ga ɠima nuiti.⁶Nà wo maanɛɛnɛzu, à woilo nà-kpaazaɠa wooi ma,wo ɠida tùkpɔ wooiti bu.⁷Wa ɠisiɛzu ga GALA ka wo botii ɠɛɛzu bɛ ga faa maaʋegai?Wa maalobosu ga kazemazu vaiti ɓaa?⁸Wa pɔ wo lo GALA polu?Wa pɔ wo daalukpɔi lo bɛ?⁹Ni a ɠɛna é wo vɛɠɛlɛfɛɠɛlɛ, toɠa ɠɛ nɛi ga faa ʋagɔ wo ʋɛ?Nu la GALA yaava, eɠɛʋelei nu a nui yaava la.¹⁰Gaamazu, toɠa zeliiti to wo ma,ni topolu ɠa wo kɛɛzu dɔɔɠuzu.¹¹Wo la luazu GALA ná-maayikii ʋa ɓaa?Maaluai é bosu, naa la wo zasuɓalizu ɓaa?¹²Kalagi niiti wo lɛɛzu ti ma kenein kenein, ta-ɠulanumai wola lɔiʋɛ eɠɛ zuʋui,wa-wooɠaaʋotegiti ta ga aniiti ti ɓɛtɛai ga penɛi.

¹³«À maaɠɛ dɛɛ kpɔ, wo ɓe bà! Nà ɠa gè pɔ gè ɓɔɛ!Nii a ɠɛ ga ze, naa ɠɛ ga ze.¹⁴Nà ziiɠulakoozui ɠɛɛzu,gè ɠikula zɛ̀nvui zu.¹⁵GALA ge pàa, ni naa ɠa é pɔ, kito nɔpɛ ge la mɔ bɛ̀.Kɛlɛ tɔun gaazu, nà sìɛ ʋelei maalobo.¹⁶Tɔun vɔlɔ, naama ɠɛʋelei mu ka zoo é kìzo.Mazɔlɔɔ woovele nu nɔpɛ ge la lɔɔzu zɔlɔɔga tɔun pɔ bɛ.¹⁷À woilo naa ma fɔɔn, nii gè ʋaazu bosu.À ɠida bu, gòoiti poluʋɛ lɔ wo woizu ga pagɔ.¹⁸Mazɔlɔɔ kɛ̀ʋele ɓɛtɛʋɛ ga gè ɓɔɠɔ maalobo.Gè kwɛɛ ga nà-gaamai ʋe.¹⁹Ɓɛ ɠa é wɔinni é sàkpe názu?Kɛ̀ʋele ɓɛtɛʋɛ, ni gè la ʋeeni, gè maaɠɛ kpɔ ta gè za.

²⁰«Nà-GALAGI, faa felegɔ nɔ ɠa gè ɠɛ è kɛ bɛ̀,nà zoo naazu gè ɠula kɛlɛma è ʋɛ.²¹Mɔunpa, è-yeei é wuizu mà gola, naa zeɠe màazu,mina mɔ ɓe maalua ɠasɔi ʋa, é ʋa gàalua.²²Naa ʋolu, ɓɔɛ pɔ̀, nà è wooɠaaʋote,ɓaa mu nà ɓɔɛ, è gòoɠaaʋote.²³Faaɠaaza golai, dielegɔ ɠa gè kɛai, ta kotoi?Nà-kotoiti dɛɛ ga ze, ta nà-tɔ koloɠologiti.²⁴Leeni vaa zu è ɠaazulɔɔɠuzu bà,è ɗa pɛ̀tɛ ga è zili nu?²⁵Ɗa pɔ è daai ɲiikpi, nii é ɓalizu?Ɗa pɔ è ʋilɛ daa vɔɔi ʋolu, è kpɛ?²⁶Mazɔlɔɔ ɗa tùkpɔɠaaleʋezu ga woo wanaiti,è ɗa nà-nu niinɛlai ma vaaɠaaza golai ma ɠasɔiti da ùnma.²⁷È kɔ̀ɠɔ felegɔiti pɛ gilia ga kɔlui,è ɠaazulo bà kpaan sìɛ ʋeleiti pɛ su,è ɗa kɔ̀ɠɔʋo gaiziɛ.²⁸Nuɓusɛi zu ɠa lulusu, eɠɛ gului duulai,eɠɛ seɠei ɓaɠaɓaɠai miizu.»

Zɔɓe 13 / tod_pbt

Zɔɓe13tod_pbt