Read Zɔɓe 10

Zɔɓe10tod_pbt

¹«Zɛnvui wɔinzeɠea mà,gè la mɔ kpàla gooiti dɔɔɠuzu,ziiɓɔlɔi é zìimaʋɛ laavegai,nà naa ɠulazu kɛlɛma.²Gè ɠɛ GALA ma: ‹Mina pèelala,dɛɛ lɛɛ ga ze, leeni vaa zu, è sàkpesu!›³È yiima vai ɠa ga è kpɔ̀lɔ,è ɗa-ɓɛtɛanii ʋɛlɛʋili, nii è-yeei kpɛtɛai?Faa ʋagɔ ɠana nɛi ɓaa, è nu ɲɔiti ta-vaazeikpasuiti maalobo?⁴Kpusɛi ma ɠaazuɠɛzɛiti nɔ ɠa ti è ʋa ɓaa?Ɗa-wozaɠaai ɠa ga nuɓusɛiti ta-wozaɠaai ɠɛʋele nɔ ɓaa?⁵È-zii ma voloiti su ɠa ɓuɠazu ga nuɓusɛiti tɔnɔi ɠɛʋele ɓaa,ɗa-ɠonagiti ti ɠɛ ga nui nɔnɔiti kɛʋele,⁶ga è ʋa nà-faaɠaazagiti gaiziɛ ʋolu,ga è nà-kotoiti kula kɛlɛma?⁷Anɛɛ naa ʋe, è kwɛni ga gè la ga sɔba nu.Nu nɔpɛ ge la ná, nii a kùla è ya.

⁸«Ɗa ɠa è kpɛ̀tɛni, è-yeeiti ti kpùun ʋɔɔma ɲɛgɛlɛin,tama, ɗa ɠa è kòloɠolosu niina!⁹Nà è maanɛɛnɛzu, ɠizɛ su ga è kpɛ̀tɛni eɠɛ penɛi ɠɛʋele.Ɗa pɔ niizu è gàaɠale ma fufiligi zu?¹⁰È kpɛ̀tɛni dèe ɠoozu,eɠɛʋelei nu nɔnɔi ɠaaɲiizu la pɔlɔ liɠii zu.¹¹È màaɠiliʋɛ ga kɔlɔgi ta ma zuai,è fɛ̀lɛʋɛ ga kàeiti ta ɲàtaiti.¹²Ɗa ɠa è zɛnvui vea bɛ̀, è ɗa-wooɠɛɠiladai ɠula kɛlɛma,è ɓaa vai màazu, naa ɠa é nà-fiilɛi makɛga.

¹³«Kɛlɛ wɛlɛ nii è makɛni è-yiimaʋɛ,gè naa ɠwɛɛga niizu, nii è ɠɛni ɠigaiziɛzu.¹⁴Ni nà koto ɠɛɛna, ɗa pɛtɛsu,è la sòsu ga sɔbalala nu nà-faaɠaazagiti faa zu.¹⁵Ni nà ga sɔba nu, maanɔɠɔ ɠa tùɠɔ!Ni peelalazu la bà, anɛɛ naa ʋe, gè la zooga gè ʋa nɔ̀ungi wuzeɠe,nɛ̀igi unfegi ta nimizai kula ɠɛai ga ze.¹⁶Kɛlɛ nà nɔ̀ungi wuzeɠena nɔ feya, ɗa ɠa è kpɛ̀ɛzu eɠɛ zalai,ɗa dòɠazu mɔnɔ ga ɗa-laavɔɔ vaiti.¹⁷Ɗa sòpele niinɛi ɠaiziɛzu nɔ kenein,ta nɔ ɠa é ɓɔsu ɗa-yiiɠaawanai ʋa dàalɔɠɔma.Kɔɔʋɛbɛi ɗa ɓɔɠɔ maavalibo sò fai ma.

¹⁸«Leeni vaa zu è kùlani dèe ɠoozu?Nà la za ná, nu ɠaazu nɔpɛ ge la ɓena la mà.¹⁹Nà la ɠula nɔ dèe ɠoozu, gè sakpa nɔ kabayeɠei zu,nà la ɠɛ eɠɛ naati, niiti ti la etea ɠaani.²⁰Sìi ma voloiti maa la ʋɛlɛni niina ɓaa?È ɓe bà deɠɛmu!È zeɠe kòba, gè ɓɔɠɔ lago iɲɔdɔ,²¹aisa gè ʋa li, gè la mɔ ɠalesu ma ʋolu,kpidi yooi zu, kpidi ɓɔii zu,²²zooi ná zu, ʋɛ geelaalaosuʋɛ ná ga kpidii,ʋɛ kpidi ɓɔii zeini ná faazupui pɛ unda,ʋɛ wozakalagi ɠɛai ná eɠɛ kuai.»

Zɔɓe 10 / tod_pbt

Zɔɓe10tod_pbt