1Fai bogai Amɔn nuiti ta-vaa zu. Ɠɔoɠɔ GALAGI wooi ɠaa:«Zunu loun la Izilayɛle ʋɛ ɓaa?Pogani zeɠe nu la bɛ ɓaa?Leeni vaa zu galagi Milikɔme Gade yooi zeɠezu ga poganii,ná-nuɓusɛiti ti zei ma laaiti su?2Naa ɠa é ba, foloi tanigaa ta ʋaazu,nà kɔɔɠɔ ɓeei ʋili Amɔn nuiti ta-laa wolai Laɓa zu,»Ɠɔoɠɔ GALAGI wooi ɠana.«Ná valibo, puuzuʋɛ ɠoloɠolo,taaiti ti logai ba, naati pɛ ta ɠala.Naazu Izilayɛle ɠa zei naati unda,niiti ti zeini tɔun unda.»Ɠɔoɠɔ GALAGI ɠa é boga.3«À wɔlɔ, Ɠɛsɛɓon nuiti, mazɔlɔɔ Ayi taai ɠoloɠologa!Laɓa laaiti, à ɓɔɠɔ maalolibo!À saa wɔlɔ wo seɠei loo ɠɔba, wo saa wɔlɔi wo,wo ɗa ziɛziɛ siɠigi wu.Mazɔlɔɔ galagi Milikɔme ɠana li duɔlai zu,ta zalaɠa ɠula nuiti, ta ná-kundiɠi wolaiti.4Leeni vaa zu è ɓɔɠɔ maamusɛzuga ɗa-nɛmɛiti ma vaa?Ɗa-nɛmɛi ɠa na ɠoloɠolo, gaazulɛɛ anzalopoi,ɗɛi è ɠalivaani ɗa-naavoloi ma,è ɗa ɠɛ ma: ‹Ɓɛ ɠa a zoo é laalɛ bù?›5Nà ʋaazu è ʋɔ ga maalua vai,»Ɠɔoɠɔ GALAGI, Fai-Pɛ-Maliɠii wooi ɠana,«é zeɠe è-maaɠoolii pɛ su.Wo pɛ wa ɓɛ, wo ɠilagilagi li ga letegi nɔ,nu nɔpɛ ge la pela nuiti gaalɛa ba.6Naa ʋoluma, nà Amɔn nuiti ta-vai valibo,gè ʋa ʋolu ga ta-nuiti ti duɔlai zu,»Ɠɔoɠɔ GALAGI wooi ɠana.
GALA gooi Edɔme yooi laalɔɠɔma
7Fai bogai Edɔme yooi ná-faa zu.Ɠɔoɠɔ GALAGI, Fai-Pɛ-Maliɠii wooi ɠaa:«Ɠima nui la mɔ Teman ɓaa?Ná-tɛnɛbo nuiti ti ʋalaga ɠigi ma ɓaa?Ta-ɠimalai ɠoloɠologa?8À ɠale ma, à ʋela, Dedan nuiti,à zei pugiti su,mazɔlɔɔ gè ʋaa ga faa zuɠoloɠologi wo ʋɔ,Ezawu mavofodaiti,gè wuzeɠea wo laalɔɠɔma, ma yee zeelia.9Ni leezɛn ɠula nuiti ta ʋaana è ʋɔ bɛ,kɛni ma ɠɔpɔ gilagila nɔ ɠa ta zɛ ná.Ni unma nuiti ta ʋaana, ti ɠula è viliba kuai,ta faa zuɠoloɠolo gola ɠɛ eɠɛʋelei ti pɔ la.10Mazɔlɔɔ nà ɠa gè wo maaɓezeɠelesu,Ezawu mavofodaiti,gè wo-lɔɔɠuzuʋɛti kula kɛlɛzu,wo la mɔ zooga wo ʋa lɔɔɠu.Toɠa ɠɛ ga nimizai wo-mavofodai ʋɛ.Wo-ɠɛɛleaiti, wo-zeiɲɔɠɔiti, ta la ɠɛa ná, é ʋa ɠɛ ma:11‹Zeɠe ɗa-ʋodointi kòba, nà ti ɠula su,ɗa-ʋoanzaiti ta ɠito bà, nà ɠaaɓa ti ma.› »12Mazɔlɔɔ Ɠɔoɠɔ GALAGI wooi ɠaa: «Zɔiti ti la ɠɛni ʋeelalani ga ti ʋa ɓɔɔle ga nà-ziiɠaawana ɗaawɔi, naati ta ɓɔɔle la nɔ. Ɗɔun ɗa, Edɔme, ɗa ɠɛɛzu ɗa zosu ga zɔi sɔ ge la ba? É la ɠɛa ɠana ɲɛgɛlɛin, ɗa ɠa è maanɛai è ɓɔɔle ga ziawɔi tɛi.13Nà naama ɠonai wosu ɓɔɠɔ ma, ɗa-laa wolai Ɓosela ɠaaɠaalɛi, ɓaaɠula ma, é ɠoloɠolo, nu a ɠɛna foovoo loa, é ná ɠɛ ga poogi. Maaɠoolii zu laa wolaiti pɛ gaa ɠa ʋala ti ʋa eyɛsu ɠɔ,» Ɠɔoɠɔ GALAGI wooi ɠana.14Gè woo niinɛ mɛnigɛ,é zeɠe Ɠɔoɠɔ GALAGI ʋɔ bɛ,keelai leʋegɛ zii ɠiligiti saama, é ɠɛ ma:«À ɠaalɛ ba, wo ʋa Edɔme laalɔɠɔma!À li, wo laalɛ bu!»15«Mazɔlɔɔ wɛlɛ, Edɔme, nà è ɠaalɔizu ziiti saama,ɠaazu unfe ge la è ʋɛ nuɓusɛiti saama.16Maaluai è bosu ta ɗa-wasogi è ɠakaga,ɗɛi è-laazuʋɛ ga fasa yeɠeiti su,è zeini gizeiti unmaʋɛ.Anɛɛ ni ɗa è-laɠagi losu gaaɠooza ga koɠɛi nɔnɔi ɠɛʋele,nà è volo ná ʋa,»Ɠɔoɠɔ GALAGI wooi ɠana.17«Edɔme ɠa ɠɛ ga adaʋɛ nu iɲɔ ga leʋe ná ʋa.Nii kpein a ɠɛ leʋesu náʋɛ, kɔɔlɛ ɓooi ɗa yei ga tiye,ti ɗa foei vɛ ga ziiɠoloɠologi, ta ɠɛna koloɠolo pelei ɠaa.18Eɠɛ faa zuɠoloɠologi é ɠɛɛni Sɔdɔme ta Gomɔɔl,ta maaɠoolii ma laaiti su,» Ɠɔoɠɔ GALAGI ɠɛ ma,«nu nɔpɛ ge la mɔ zeiɗa ná,nuɓusɛ nɔpɛ ge la mɔ zeizeiga ná.19Wɛlɛ eɠɛ zalai é lɛɛzu,é ɠula Zuludɛn lɔɓɔ wolai zu,é ʋa adaʋɛ laalɔɠɔma, ʋɛ ná la ʋalasu,nà ʋaazu, gè ti pɛ kpale ná, gaazulooma la ɠila nɔ laawu.Zɔi gè yiimazeɠeai la, gè naa zei Edɔme unda.Mazɔlɔɔ ɓɛ ɠa é ga kɛ̀ʋele?Ɓɛ ɠa ná-poluvaawo kuye mà?Baala makɛ nui ɓɛ ɠa a lo dàalɔɠɔma?20À woilo dɛɛ faazeikpasui manii Ɠɔoɠɔ GALAGI kpɛtɛai Edɔme nuiti daalɔɠɔma,ta kisu vaiti é ti ɓɛtɛai Teman nuiti daalɔɠɔma.Gaamazu ta li ga tiye eɠɛ togani goa nɔ,ta ti-zeizuʋɛ ɠoloɠolo.21Ti loo lugi ɠa zooi ɓali,ma ɓee wooi mɛnini Seeli Kpoloɗɛi ʋɔ bɛ.22Wɛlɛ, kɛɛʋɛ eɠɛ koɠɛi,é lɛɛzu, é ɗa ɠoʋe Ɓosela maazu.Naama volo ná, Edɔme ɠɔɔɠɔ nu ɠɛzɛiti zii ɠa zɛlɛeɠɛ anzanui doun zɔlɔɔ koozuwanai ba.
GALA gooi Damase laalɔɠɔma
23Fai bogai Damase ná-faa zu. Ɠamate ta Aalapade ti lɔa unfegi zu,mazɔlɔɔ ti woo ɲɔu mɛniga.Ti-yii ɠa zoolɛzueɠɛ kpoloɗɛi é ɲiikpisu, é la zooga losu kpɛ.24Damase nuiti ti iɲɔ ge leʋea,ti ʋoluazoga ga ti ʋela,ti zasu ɠana ɓali,dualuagi ta taɓai ti zogaeɠɛ anzanui é doin zɔlɔɔsu.25Kɛɛʋɛ ɠale ti ɠɛlɛai ba,taa wolai tɔna, tɔɠɔɠulaai gola,taai nii é ɠɛni ga nà-koozunɛ ungi!26Ná-buzeɠe niinɛgiti kpein ta loo bu taazuʋɛ koi yɔɠɔzuʋɛti,ná-kɔɔɠɔ nuiti pɛ undaa ɠa ʋili naama volo ná,»Ɠɔoɠɔ GALAGI, Fai-Pɛ-Maliɠii wooi ɠana.27«Nà abui lo Damase ziɠigiti ba,toɠa masagi Ɓɛne-Ɠadade ná-masa pɛlɛiti gala.»
GALA gooi Alaɓe mavofodaiti daalɔɠɔma
28Fai bogai Kedaal Alaɓuiti ta-vaa zu, ta Ɠasɔɔl masadaiti,niiti Ɓaɓilɔne masagi Neɓukadenɛzaal vɔnini ti ma.Ɠɔoɠɔ GALAGI wooi ɠaa:«À wuzeɠe, wo li Kedaal laalɔɠɔma,wo ti pɛ suɠoloɠolo folo ɠulazu ʋele nuiti pɔ bɛ.29Ti ta-zeɠe ɠotaiti kula ti ya, ta ta-logani ɓulugiti,ta ti-lɔɔɠuzuʋɛti, ta ta-zɔɔlaiti pɛ.Ti li ga ta-ɲɔmɛiti,ti ɗa kpee loo ti ma ga:‹Maalua vaa ʋe mini-o-mini!›30Ɠasɔɔl nuiti, à ʋela, wo li mini-o-mini,wo zei pu zeɠeiti su,»Ɠɔoɠɔ GALAGI wooi ɠana.«Mazɔlɔɔ Ɓaɓilɔne masagi Neɓukadenɛzaal deve woga wo laalɔɠɔma,é kisiɛa wogɛ wo laalɔɠɔma.31À wuzeɠe! À li niima nuɓusɛiti daalɔɠɔma,ti zeini kpɛ, maaɠili la ti ma,»Ɠɔoɠɔ GALAGI wooi ɠana.«Kpo ge la ta-ʋɛlɛiti da, sɔɠɔ ge la su,ti zeini yɛ.32Ti zili nuiti ta li ga ta-ɲɔmɛiti,ta-logani ɓulu golaiti ta ɠɛ ga kɔɔzoganii.Nà niima nuɓusɛiti fazasu mini-o-mini,tɛiti kpein ti ti-ɓakalagiti bosu.Nà ʋa ga ti ɠoloɠolo fai, é zeɠe adaʋɛ pɛ,»Ɠɔoɠɔ GALAGI wooi ɠana.33«Ɠasɔɔl laai ɠa ɠɛ ga koʋeiti daamiizuʋɛ eyɛsu ɠɔ,nu nɔpɛ ge la mɔ zeiɗa ná pɛ,nuɓusɛ nɔpɛ ge la ná ɠɛa ga zeizeisu.»
GALA gooi Elame laalɔɠɔma
34Wɛlɛ keela wooi ʋa GALA goo wo nui Zelemi sɔlɔɔni Ɠɔoɠɔ GALAGI ya, é lo Elame nuiti ba, Zuda masagi Sedesiyase ná-masadai lɔɔzei ziɛgi zu:35«Ɠɔoɠɔ GALAGI, Fai-Pɛ-Maliɠii wooi ɠaa:‹Nà Elame ná-mɛɛin ɠalezu ga,ná-kɔɔɠɔ zɔɔlai ɓiigi ma zobogi.36Nà seɠe ga fiilɛi ʋepema naanigɔi pɛ, geeɠɔlɔgi wu,gè ʋaa la Elame.Gè ti vaza adaʋɛ pɛ.Elame ɠɔɔʋelai ɠa ɠɛ zooi pɛ su, kula ba la ba.37Nà Elame nuiti ziilaave ga dualuagi ti zili nuiti tuɠɔ,niiti ti pɔ ga ti ti ʋaa.Nà maanɔɠɔi leʋe ti ma, nà-ziiɠaawana wolai zu,›Ɠɔoɠɔ GALAGI wooi ɠana.‹Nà boɠa zɔkpɔi ʋilɛ ti ʋolu,eyɛsu gè ɓe ti ma.38Nà nà-masa kpɔkpɔgi zei Elame nuiti saama,gè masagi ta kundiɠi wolaiti undaaʋili,›Ɠɔoɠɔ GALAGI wooi ɠana.39‹Kɛlɛ naa ʋoluma, Elame nuiti ti ga duɔiti,nà ʋa ga tiye ʋolu,›Ɠɔoɠɔ GALAGI wooi ɠana.»