Zelemi48tod_pbt

GALA gooi Moaɓe yooi laalɔɠɔma

1Fai bogai Moaɓe yooi ná-faa zu. Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa:«Neɓo nuiti maa ɠa nɔɠɔzu,mazɔlɔɔ ta-laai ɠoloɠologa!Kiliyatayime unfega, ti soga!Taa wolai unfega, sasuɓali.2Moaɓe yooi ɠaazu unfegi ɠulaa ba, é ɓega.Ti ɠɛni kisiɛ ɲɔiti bosu Ɠɛsɛɓon taai laalɔɠɔma:‹Ade li, de daaseigi ɠaaʋa, é ɠula ziiti saama!›Wa ɓalaagi, Mademen nuiti, wo ɠoloɠologɛ na,kɔɔi ʋilɛga wo ʋolu.3Kpee wooi ɠa ɠulazu Ɠɔlɔnayime taa wolai zu,ti suɠoloɠologa, ti suɓezeɠele.4Moaɓe ɠoloɠologa!Ná-doungoiti ta kpeei wola loozu.5Ta lɛɛzu ga kpeei loa nu lɛɛzuʋɛ Luɠite.Nu yeizuʋɛ é zeɠe Ɠɔlɔnayime,kidaaʋili kpeei ɠa loozu,tɔɔzei faa zuɠoloɠologi ʋa.6À ʋela, wo wo-yɛnvui magala!À ɓizɛ eɠɛ dɔɓɔ zoovalegi é teʋebai maaɓudɛzu.7Moaɓe, è ʋoluzeini ɗa-ɓɛtɛi ʋa,ta è-ɓɔɠɔ zɛbɛi.Naa ɠa é ba, ɗa zosu.Galagi Kemɔse ɠa liizu duɔlai zu,ta ná-zalaɠa ɠula nuiti, ta ná-kundiɠi wolaiti.8Faa zuɠoloɠolo nui ɠa lɔ taai ɠilagilagi pɛ su,é la ɓudɛa taa ɠila kpalaa maazu.Undaaʋiligi ɠa ɠɛ pɛtugi zu, nɛmɛi zuɠoloɠolo,naa ɠa Ɠɔoɠɔ GALAGI boni.9À kɔtu ziɠigi lo, é ɠɛ ga Moaɓe ná-kizɛsui,mazɔlɔɔ koloɠolo fai ɠa ga gaama vaa.Ná-taaiti ta ɠoloɠolosu,nuɓusɛ la mɔ ɠɛa ná.10Naama nui voovooʋɛ, zɔi é la Ɠɔoɠɔ GALAGI ná-botii ɠɛɛzu ga yii pɛ.Naama nui voovooʋɛ, zɔi é Ɠɔoɠɔ GALAGI ná-boɠa zɔkpɔi ʋalasu ɲamai ma.
11«Kaipa Moaɓe ma loungo ziɛ su ziilɛini.É la liini duɔla zu.É ɠɛni looɠosu eɠɛ dɔɔi buuʋɛai, nu la tatini,é ʋa kula ma liɠii zu, é ʋa pu taɠili su.Ná-nɛɛi yɛgɛ ba,maku mɔungi la valiboni.12«Naa ɠa é ba, foloi tanigaa ta ʋaazu, yeei nà nuiti teʋe da ma, ti kula ʋuuliɠi zu, ta puuliɠiiti suwo, niiti é ti zu, ti zɛba ti ma liɠiiti golowolo,» Ɠɔoɠɔ GALAGI wooi ɠana.13«Moaɓe iɲɔ ka leʋe ná-galagi Kemɔse ʋa, eɠɛʋelei Izilayɛle masadai iɲɔteʋeni la Ɓetɛle ɠalagi ʋa, nii ti wola laani da.14Moaɓe nuiti, wa zoo ɠale ɠɛɛzu ma:‹Gá ga salaʋusu ɠɛzɛiti,zunuiti ti ɓɛtɛai kɔɔɠɔ vai ma›?15Moaɓe ɠoloɠolo nui ʋaa, é laalɛ ná-taaiti bu,buzeɠe niinɛgiti wo-ɠigi ti ʋa,toɠa liizu ga naati sua ʋaazuʋɛ.»Masa golai wooi ɠana, nii daa ga Ɠɔoɠɔ GALAGI, Fai-Pɛ-Maliɠii.16«Maanɔɠɔi maaɓuɠaa, toɠa na zeeli Moaɓe ma,ná-nimizai ɠana ʋa ga gaazuvilɛ wolai.17À li, wo ɗa zealuʋɔ,wɔiti kpein wo maaɠoolii zu,wɔiti wo ná-tɔɠɔɠulagi ɠwɛɛ,wa ɠɛ ma: ‹Zobodai nii ɠoloɠologɛ ɠale,zobogi lɛbiya wolai ɠɛa ba?›18Diɓon nuɓusɛi, ʋilɛ,è zeɠe geezuʋɛ ɗa-lɛbiyai zu,zei kpɔɔle wɔin zu.Mazɔlɔɔ Moaɓe ɠoloɠolo nui ɠana lɛ,é laalɛ è wu, ɗa-laaiti siɠigi ti ma, é ti wolo.19Alowɛɛl nui, lo pelei zu, è ɗa maaɓɔungi wo.Pela nuiti gaazaɠa, ta niiti ti ʋoolaai ti ʋa,ga leeni ɠa kɛai?20‹Moaɓe unfega, mazɔlɔɔ é lokaga.À zɔngɔ, wo ɓain!À daazeeli ziɛ wolai Aalanɔn laaʋɛ,ga Moaɓe woloa.›21«Ɠɔoɠɔ GALAGI ná-tukpɔi laalɛ gize nɛmɛi ɠaa yooi wu, ta ma laaiti: Wolon, ta Yasa, naa ʋɛɛ Mefaate ʋa,22ta Diɓon, ta Neɓo, é ʋɛɛ Ɓɛte-Diɓelatayime ʋa,23ta Kiliyatayime, ta Ɓɛte-Gamuul, naa ʋɛɛ Ɓɛte-Meyon ʋa,24ta Keliyɔte, ta Ɓosela, é ʋɛɛ Moaɓe yooi zu laaiti pɛ ba, ti maaɠoozani, ɓaa ti maaɓuɠani.25Moaɓe zuɲɛgi ɠulaa su, zee ɠalea,»Ɠɔoɠɔ GALAGI wooi ɠana.26«À dɔɔi lo Moaɓe la, mazɔlɔɔ é ɠɛni kaazu ga tɔ ɠa é zeini Ɠɔoɠɔ GALAGI unda! Toɠa ɓɔɠɔ maaɠɔsu ná-unpiligi zu, tɔ ɓalaagi toɠa ɠɛ ga ɲɛɛɠulasu ani ɛsɛ pɛ zea.27Moaɓe, ɠizɛ su ʋelei è ɠɛni ɲɛɛɠulazu la Izilayɛle zu. È ɠɛni kaazu ga unma nu ɠa è sogai, mazɔlɔɔ è ɓɔɛ laa ɠilagila é ʋilɛ ba, è ɓena ungi ɲiikpi ga ɲɛɛɠulasui.28Moaɓe nuiti, à ɠula taai ʋa,wo zei fasa ɠizeiti su.À ʋokɔɠɔ poopogi ma,a ɗa laɠagi lo fasai zɛlɛsuʋɛ ná laaʋaliai.
29«Gi Moaɓe ná-waso fai mɛnigɛ,wasogɛ da ge leʋe,ná-ɓɔɠɔwɔɔlɔ ɠigi, ta ná-gaazumaanɛɛi,ta ná-ɓɔɠɔvaalɛsui, ta ná-kibɔɔlɔmai.30Gè kwɛɛ ga pagɔ, faa ʋooʋamai, é ɓakimaalɛ,kɛlɛ nii é kɛɛzu, gaa la ba,»Ɠɔoɠɔ GALAGI wooi ɠana.31«Naa ɠa é ba, nà wɔlɔzu Moaɓe ʋɛ,gè kpee loo Moaɓe pɛ faa zu.Kpalagi ɠa wosu Kiil-Ɠelɛse nuiti faa zu.32Nà wɔlɔzu Siɓima leezɛn ɓelei ma,é leʋe Yazɛɛl ʋa,è-ma ɓekegiti ti ɠɛni ɓudɛzu Kpoloɗɛ Wanai maazu,ti ɗa zeeli Yazɛɛl ɓoloɗɛi ma,kɛlɛ faa zuɠoloɠolo nui ʋaa,é ʋili è-ma waai ma, ta è ɓɛtɛ vai.33Ti ɠoozunɛ, ti ɠɛ wuulee,naa ɓega Moaɓe gulu ɓeleiti su,ta ma yooi ɠa ná pɛ.Dɔɔ la mɔ dɔɔ makɛ ɲakaiti su,nu la mɔ ta ziɠazu,koozunɛ woo wolai naa ɓega.34Ɠɛsɛɓon nuiti ta ɓɔɠɔ maalolibosu,ti-wooi ɠa mɛnisu Eleyalé.Nu ɠa ti woomɛnisu Yaɠase,é zo Sowaal eyɛsu Ɠɔlɔnayime ta Egelate-Selisia.Mazɔlɔɔ Nimelime ɠɔtuɗɛi ɓalaa la mɔ yeizu.35Nà naati kula Moaɓe yooi ʋa,niiti ti gala zalaɠai ɠulazu zalaɠa ɠula adaʋɛti,ti ansansegiti gala ta-ɠalagiti bɛ,»Ɠɔoɠɔ GALAGI wooi ɠana.36«Naa ɠa é ba, zìi ɠa ɓalizu kòozu eɠɛ koolei, é lo Moaɓe ʋa,zìi ɠa ɓalizu kòozu eɠɛ koolei, é lo Kiil-Ɠelɛse nuiti ba,tɔɔzei tɔnɔgi ti gaalɛɛni ba, é ʋua ya.37Mazɔlɔɔ ti tɔungiti pɛ kpuyega,ti-ɓɛlɛiti bogɛ.Ti pɔlɔpalɛi lɔa ti-yeeiti pɛ ma,ti saa wɔlɔ wo seɠeiti too ɠɔba.38Moaɓe ʋɛlɛiti ma viilɛ zosuʋɛti, ta ada wolaiti pɛ,saa vai nɔ ɠa ti ma ná pɛ,tɔɔzei gè Moaɓe woloa eɠɛ pɔlɔ liɠii nu ɓɛdɛ la mɔ ba,»Ɠɔoɠɔ GALAGI wooi ɠana.39«Pɛtɛ é vɔa, à ɓain ma!Moaɓe ʋoluazoga, é unfega,é ɠɛ ga ɲɛɛɠulasu anii,ɛsɛ ge ɗa lua ba maaɠoolii kpein su.»
40Mazɔlɔɔ Ɠɔoɠɔ GALAGI wooi ɠaa:«Wɛlɛ, Moaɓe zili nui ɠa ɠoʋesu eɠɛ koɠɛi,é ɗa ɠoʋe Moaɓe maazu.41Keliyɔte zoga, kɔɔɓɔ seizuʋɛti ti zeɠea.Naama volo ná, Moaɓe ɠɔɔɠɔ nu ɠɛzɛiti zii ɠa zɛlɛeɠɛ anzanui doun zɔlɔɔ koozuwanai ba.42Moaɓe ɠana ma zuwu ɠaaleʋea,é la mɔ ga zii nɔpɛ,mazɔlɔɔ é ɠɛni kaazu gatɔ ɠa é zeini Ɠɔoɠɔ GALAGI unda.43Dualuagi, zeɠei, ta tumɔi,naati ka ti wo maaɓɔunsu, Moaɓe nuiti,»Ɠɔoɠɔ GALAGI wooi ɠana.44«Zɔi a ʋela dualuagi ʋa,naa ɠa loo zeɠei zu,zɔi a ɠaaɓa, é ɠula zeɠei zu,naa ɠa ʋili tumɔi zu.Mazɔlɔɔ nà ʋaazu ga maaɠolo ɠonagi pɔ,ungo, nà ʋaazu la Moaɓe ʋɔ,»Ɠɔoɠɔ GALAGI wooi ɠana.45«Pela nuiti suvikɛi a ɓena,ta looɠosu ɠaiziɛ Ɠɛsɛɓon ná-niinigi wu.Kɛlɛ abui ɓeɓega taazuʋɛ,é zeɠe masagi Siɠon ná-masa pɛlɛi wu,abuzogi ta ɠulaʋɛ ga é li é zɔngɔ wo nu wolai niiti ta-yooi ɠala,é zo kwɛpelemaʋɛ é zeeli zou zaamaʋɛ.46Maanɔɠɔi ɠa è ʋɛ, Moaɓe!Galagi Kemɔse ná-nuɓusɛiti, wo undaaʋiliga!Mazɔlɔɔ è-loun zunuiti ti lia duɔlai zu,è-loun anzanuiti ti ɠɛ ga duɔiti.47Kɛlɛ foloi ta, nà ʋa ʋolu ga Moaɓe nuiti, ti ɠula duɔlai zu,»Ɠɔoɠɔ GALAGI wooi ɠana.Tukpɔɠaaleʋe vai bogai é lo Moaɓe yooi ʋa, ʋɛ ɠa kwɛgai ná.
expand_more
Search