Zelemi4tod_pbt

1«Izilayɛle, ni ɗa ɠalena ma ʋolu,»Ɠɔoɠɔ GALAGI wooi ɠana,«ni ɗa ʋa ʋolu pɔ̀,ni ɗa ɠɛlɛ ɗa-ɠɔzɔba ɠɔɔɠɔ ganigiti ba,è mina ɗa ga leʋeteʋe,2ni ɗa konai wo ga:‹Gè ɠonaa Ɠɔoɠɔ GALAGI ma, nii é vulua,›ni ɗa kɛɛna, è ziɛ ga gaamai, sɔledai zu, ta telebodai,zii ɠiligiti ti ɠilagilagiti ta tuyai loo ɓɔɠɔ ʋɛ, Ɠɔoɠɔ GALAGI lɔɠɔi zu,ti naa ɠɛ ga ta-ɓɔɠɔ maamusɛi.»3Mazɔlɔɔ Ɠɔoɠɔ GALAGI wooi ɠaaZuda nuiti ma ta Zeluzalɛme ma:«À kpala niinɛi ma wozai wo,à ɓe ani zuwui vazasu kpolo ɠaingiti saama.4À ɓɔɠɔ ɲade Ɠɔoɠɔ GALAGI ʋɛ,à valibo wo-yiimaʋɛ,Zuda nuiti ta Zeluzalɛme zei wo nuiti.Mazɔlɔɔ ni naa laade,nà-ziiɠaawanai ɠa yeizu eɠɛ abui, è galai wo,nu nɔpɛ ge la zooga é ʋa paa,tɔɔzei wo-ziɛ ʋele ɲɔiti ba.»

Toomai é ʋaazué zeɠe ga lɛkpɛma ʋelei nu ɠɔʋɛzuʋɛ

5«À zeze ga nii Zuda yooi pɛ su,wo bo, é mɛni Zeluzalɛme ná pɛ:‹À bo! Wo puʋugi vɛ zooi zu ná pɛ!À kpeei loo, wo wooɠula la gola, wo ɠɛ ma:À ɠaalɛ ba, ade li taa wolaiti su, siɠigi ti ma!›6À poogi ɠaalɔ Siyɔn letema ʋelei,à ʋela, à mina lo pa!Mazɔlɔɔ nà ʋaazu ga maanɔɠɔi,é zeɠe lɛkpɛmaʋɛ nu ɠɔʋɛzu ʋelei,ta kidaaʋili faa zuɠoloɠolo golai.»
7Zalai vologa ná-ada maalɔɔɠuai,zɔi é ziiti suɠoloɠolo su, é ʋilɛni pelei ma,é ɠulaa seizuʋɛ ga é wa-yooi ɠoloɠolo,ga é wa-laa wolaiti koloɠolo, é ti zuɲakai yɛ.8Naa ɠa é ba, à saa wɔlɔ wo seɠei loo ɠɔba,à gɔlɔi wo, wo ɓɔɠɔ maawɔin!Mazɔlɔɔ, Ɠɔoɠɔ GALAGI ná-ziiɠaawanai la zeɠezu ade maala.
9«Naama volo ná, masagi iɲɔ ka leʋe,kundiɠiiti ɓalaa, zalaɠa ɠula nuiti ta ɓala,GALA goo wo nuiti daa ɠa vɔ,»Ɠɔoɠɔ GALAGI wooi ɠana.10Gè ɠɛni ma: «Ee, Maliɠii Ɠɔoɠɔ GALAGI,è niima nuɓusɛiti yaavaa, ta Zeluzalɛme!È ɠɛ ma: ‹Wa ziilɛigi zɔlɔɔ!›Tama boɠa zɔkpɔi ɠa é laani gi-ɠɔdaʋɛ.»

Ti zili nuiti ti ɠulazu adaʋɛ pɛ

11Názu Maliɠii ɠa ɠɛ nuɓusɛiti ta Zeluzalɛme ma:«Fiilɛ ɓadii ɠa zeɠezu teʋebai zu ada ɠaaɠoozagiti,é ʋa, é ʋu nà-nuɓusɛiti ma.Fiilɛ go la de, nii nu a zoo nɔ é molo ɠaavɛɛ la.12Toɠa ga fiilɛi nii sɛbɛi wɔɔlɔai gola,é ʋaazu, é zeɠe miná nà-devei zu.Niizu nà ɠa gè tukpɔi laalɛɛzu ti wu.»
13Sili nui ʋɛtɛ, é lɛɛzu eɠɛ tonaɓiingiti!Ná-kɔɔɠɔ wotoloiti kɛɛʋɛ eɠɛ tɔngɔlɔ fiilɛi,ná-sooiti feɠagɛ ɓɔɠɔ ma, é leʋe koɠɛiti ba!Gi maanɔɠɔa, gi ɠoloɠologa!
14Zeluzalɛme, yii maagba, è ná-faa ɲɔiti kpeteʋe ba, ɗa ɠizo.Siɛgi ɓɛgele ɠa è kɛɛzu zeini kisiɛ ɲɔi zu?15Woilo wooi naa ma, é zeɠezu Dan yooi zu,toɠa maanɔɠɔi ma vai wosu.Toɠa wosu, é zeɠe Efelayime ɠizeiti ma:16«À bo nuɓusɛiti kpein ma, wo Zeluzalɛme loo ɠisu:‹Nu ɲɔiti ta ga maaɓuɠa, ta ʋaazu,ti zeɠe zooi ná zu, ʋɛ ná maaɠoozaai.Ta kpeei loozu Zuda laa wolaiti daalɔɠɔma.17Ti latigɛ Zeluzalɛme ma, eɠɛ kpalagi makɛ nuiti,mazɔlɔɔ nà ɠa ti wuzeɠeai dàalɔɠɔma,› »Ɠɔoɠɔ GALAGI wooi ɠana.18«Naa kpein ka ɠɛɛzu ga ɗe, Zeluzalɛme,tɔɔzei è-ziɛ ʋeleiti ba, ta ɗa-ɠɛɛwotiiti.Ɗa-nu ɲɔulai ma ɠulanumai ɠana,anɛɛ ni gaawanaʋɛ, toɠa yeizueyɛsu é lo è-yii ʋa.»

Zelemi yiiɠoloɠolo faié lo zooi ná-maanɔɠɔi ʋa

19Ee, kòozuʋɛ ɠa tàɓazu!Nà laaʋoesu ga taɓai.Zìi ɠa doɠazu gola.Gè la zooga gè ʋa maaɠɛ kpɔ.Gè puʋugi wooi mɛnini, ta kɔɔɠɔ ɓeei.20Toɠa wosu ga: «Faa zuɠoloɠologi! Faa zuɠoloɠologi!»Mazɔlɔɔ zooi ɠoloɠologa ɲɛgɛlɛin.Gaamago nɔ, nà-pɛlɛiti ti ɠoloɠologa,sèizuʋɛti gaaʋala ba.21Nà yɛsu kɔɔɠɔ ʋoogiti kaazu,gè ɗa puʋu gooi mɛni eyɛsu yeelɛ?
22Ɠɔoɠɔ GALAGI ɠɛ ma: «Ungo, ɠi ge la nà-nuɓusɛiti ma, ti la kwɛ̀ɛ.Ta ga ɠimalala lointi.Ti ʋalagɛ ɠigi ma.Ɠigi ɠa ti ma nɔ ga ta ɠɛna faa ɲɔi ɠɛa.Kɛlɛ ti la faa ʋagɔi ɠɛɛ ʋelei ɠwɛɛ.»
23Gè wɛlɛa eteai ʋa,wɛlɛ, kɛʋele ɠila ge la ba, suɲakai ʋe.Gè wɛlɛa geeɠɔlɔgi ʋa,ná-wozakalagiti ti loa ya.24Gè wɛlɛa gizeiti ba,wɛlɛ, ti ɲiikpiga,gize goiti kpein ta balizu.25Gè wɛlɛ, gè pɛtɛ ga nuɓusɛi ɲɛɛlɛa,ta wɔniiti kpein ti ʋelaa.26Gè wɛlɛ, gè pɛtɛ ga zooi é ɠɛni ga gulu ɓelei,é ɠɛa ga teʋebai suvɔai.Taa wolaiti ti pɛ ti woloa Ɠɔoɠɔ GALAGI luɠɔ,tɔɔzei ná-ziiɠaawana wolai ʋa.
27Mazɔlɔɔ Ɠɔoɠɔ GALAGI wooi ɠaa:«Eteai pɛ ge ɠoloɠologa,kɛlɛ gè la koloɠolosu mɛtu.28Naa maaʋele ma, eteai ɠa ɠɛ gaazuɗɛʋui zu,geeɠɔlɔgi é maazuʋɛ, su ɠa ɓidi,mazɔlɔɔ gè boga.Gè deveʋɛ fɔɔn, gè la ɠalega ma ʋo su.»

Ziizoolɛi

29Soo ɓulugiti ta mɛɛn ʋili nuiti maalugi mɛnigai ma,taai pɛ ge ʋelani, ti ɗa lɔ dɔɓɔi zu,ti ɗa lɛ fasa wolaiti ma.Taai pɛ suwoga, nu nɔpɛ ge la mɔ ná.30Zeluzalɛme, taa wolai è ɠoloɠologa, leeni ɠa è kɛɛzu?Ɗa ɓɔɠɔ maaɠilizu ga seɠe ɓɔigi,è zanu balaiti dɔ yeeiti ba,è ani lɛigi ziɛ è ɠaazu ɠɔpoluʋɛ.Ɗa ɓɔɠɔ ʋasu wafuun nɔ.Ɗa-wɛɛinti ti è wɔinzeɠea,ti wɔinʋɛ ga ti è ʋaa.31Mazɔlɔɔ nà kpala gooiti mɛnisu,eɠɛ anzanui doun zɔlɔɔ koozuwanai ba,eɠɛ koozuʋili kpeeiti, doun zɔlɔɔda mɔungi zu.Kpee wooiti be Siyɔn anzanu loin toozu.Toɠa zikɔzu, é ɗa yeeiti tɛ geezu, é ɠɛ ma:«Màanɔɠɔa, nà ga za nu ʋaa nuiti zea!»
expand_more
Search