1Ɠɔoɠɔ GALAGI ɓɔɛni pɔ̀, é ɠɛ mà:2«Li Zeluzalɛme, è ɓain ti woizu,è ɠɛ ma: ‹Ɠɔoɠɔ GALAGI wooi ɠaa:Kì ka ɗa-nɛɛbɛi zu è ɠɛai mà niinɛlai zu,ʋelei è gòla nɛɛni ʋɛ la, è maazo siɛgi zu bɛ̀,è ɠɛni pòlu teʋebai zu, zou vɔɔi zu.3Mazɔlɔɔ názu Izilayɛle veeni Ɠɔoɠɔ GALAGI ʋɛ,eɠɛ molo leʋeai ma mɔungi.Niiti kpein ti ɠɛni ta miizu, gi ɠɛni ʋilɛsu la,gaamago nɔ, maanɔɠɔi ɠa é ɠɛni zeizu ti ma,Ɠɔoɠɔ GALAGI wooi ɠana.› »4À woilo Ɠɔoɠɔ GALAGI laawooi ma, Zakɔɓe mavofodai,wɔiti kpein wo ga Izilayɛle ná-pɛlɛyeɠeiti!5Ɠɔoɠɔ GALAGI wooi ɠaa:«Leeni ɠa deɠɛmu wo-mɛmɛwolani ti kaani bà ga faaɠaazagi,ti maaɠoozazu bà, ti ʋilɛ gala kiligiti poluniiti ti ga wafuun ganiiti,tiya ɓalaa, ti ɠɛa ga wafuun nuiti?6Ti la gaazaɠa boni ga:‹Mini ɠa Ɠɔoɠɔ GALAGI ná,nii é ade ɠulani Ezipete yooi ʋa,é loni de luɠɔ teʋebai zu,zou vɔɔi zu, pɛtu golaiti ti ná,adaʋɛ kpɔɔle wɔin ta ziizoolɛi ná,nu nɔpɛ ge la ziɛzu ná, nu la zeini ná?›7Tama, gè loni wo luɠɔ, gè ʋa ga woye zou ʋagɔi zu,wo ʋa wɔnɔ zɔlɔɔ sulɔnɔ pagɔiti su.Kɛlɛ wo zeelini nɔ ná feya, wo zooi nii ɠɔzɔa,wo nà-zooi ɠɛa ga kɔzɔba yooi.8Zalaɠa ɠula nuiti ti la gaazaɠagi woni ga:‹Mini ɠa Ɠɔoɠɔ GALAGI ná?›Tɔgi laawooleʋe nuiti ti la kwɛ̀ɛ,nuɓusɛiti ta-ɠundiɠiiti ti ɓakaga dàalɔɠɔma.GALA goo wo nuiti ta ta-ɠeela wooiti boni Ɓaale laaseigi zu.Ti ʋoluzeiɗa zɛbɛsulala ɠalagiti ba.9Naa ɠa é ba, kpɔɛi lɔa ade yɔɠɔzu,»Ɠɔoɠɔ GALAGI wooi ɠana.«Kpɔɛi lɔa gi yɔɠɔzu gá wo-loun zunuiti ti-loun zunuiti.10À li, wo gaazaɠa bo Sipele ziɛ zaama yooiti su,wo faiti buuɓɛ Alaɓuiti pɔ bɛ Kedaal,wo pɛtɛ, ni faiti ta ɠɛɛzu miná, eɠɛʋelei é ɠɛɛzu la ʋɛ,11wo pɛtɛ, ni zii ta ná-gala maavaliboga.Tɔun naati ɓɔɠɔi mu ti la ga gala kitea!Tama, lɛbiyai ɠɛni nà-nuɓusɛiti bɛ, ga gè ɠɛ ti ʋɛ ga GALAGI.Kɛlɛ ti maavaliboga ga zɛbɛsulala ɠalagiti!12Geeɠɔlɔgiti, wo laavɔ ga naama vai,wo zasuɓali, wo ɠidaaʋili,»Ɠɔoɠɔ GALAGI wooi ɠana.13«Mazɔlɔɔ nà-nuɓusɛiti ti faaɠaazagi ma ʋɛɛda felegɔi ɠɛa,ti ɠɛlɛa bà, nɛ̀i gè ga zɛnvu su ɗɛungi,ti ziɛyeɠeiti bɔa ɓɔɠɔ ʋɛ, ziɛyeɠeiti ti ɓokulai,ti la zooga ziɛ zosu.»
Kɛlɛbai zulɔnɔgi
14«Izilayɛle ɠa ga duɔi geyaai, ɓaa sɔlɔɔgai pɛlɛi wu?Leeni vaa zu deɠɛmu, é ɠɛa ga nuɓusɛi zɔiti daamianigi?15Eɠɛ zalaiti ti zikɔzu, ti ɗa ɓain daalɔɠɔma.Ti ná-zooi valiboga, ti kɛ ga teʋebai zu.Ná-taa wolaiti ti ɠalaa, nu la mɔ zeini náti.16Anɛɛ Mɛmefise nuiti ta Taapanɛse nuiti ta ʋaazu,ti ɗa nɔungi ɓuye.17Leeni vaa zu deɠɛmu naa kpein ge ɠɛɛzu ga ɗe, Izilayɛle?È ɠɛlɛ vai laade Ɠɔoɠɔ GALAGI, ɗa-ƓALAGI ʋa,anɛɛ ni é ɠɛni loni è luɠɔ pele ʋagɔiti su?18Niizu, è li ungi ɠa ga leeni Ezipete yooi zu,è li è ziɛ wolai Nile ɗɛi ta ɓɔɔle?Toɠa leeni ʋaa è ma, è ʋa Asiili ʋelei zo,è li è ziɛ wolai Efelate ta ɓɔɔle?19Mazɔlɔɔ ɗa-vaa ɲɔi è kɛɛzu, naama zalai ɠa è sɔlɔɔsu,è ɓaka fai ɠa è ʋaazu maaɠoloi zɔlɔɔsu da.Suɠwɛɛ, è ka ga toɠa ga faa ɲɔu, gaawanaai,ga è ɠɛlɛ Ɠɔoɠɔ GALAGI ʋa, ɗa-ƓALAGI,è la unfema ɠila kpalaa fea bɛ̀,»Ɠɔoɠɔ GALAGI, Fai-Pɛ-Maliɠii wooi ɠana.
Zuda, wooɠɛɠilatala nui
20«Wɛlɛ, kaite è ɗa-unbawului ɠaleɠaleni,è ɗa-ɠaluiti suleʋeleʋe, è ɠɛ ma:‹Gè la mɔ pɔ gè ʋa ɠɛ ga duɔ!›Kɛlɛ gizeiti ma, gulu wolaiti bu,è ɗa nɔkɔ náti eɠɛ koloɠolo anzanui!21Gè è ziinni eɠɛ leezɛn ansaɠɔ pagɔi,ani ʋɔnɔgi nii ma zii wola ʋagai.È valibogɛ ɠale nɔ̀un tetema,è ɠɛ ga kpele ɲɔi, gaawaai la ʋani?22Anɛɛ ni ɗa ɓɔɠɔ maagbazu ga tɔbɔ kɛzɛi,anɛɛ ni ɗa sɛɠɛi wola ziɛzu ɓɔɠɔ ma,ɗa-vaaɠaaza golai ɠa yɛ è ʋa gàazu eɠɛ nɔɠɔi,»Maliɠii Ɠɔoɠɔ GALAGI wooi ɠana.23«Ɗa zoo ɠale è ɠɛ ma:‹Kaipa gè la dɛ ɓɔɠɔ ɠɔzɔni,gè la liini gè ʋa nɔkɔ Ɓaale wu!›È-ziɛ ʋelei ʋɛtɛ dɛɛ pɛtugi zu!Naa ɠwɛɛ, nii è kɛɛni!Eɠɛ ɲɔmɛ zaa ɓokpagi, è leʋeteʋesu adaʋɛ pɛ!24È ɠɛa eɠɛ dɔɓɔ zoovalegi, nii maaɠoloai teʋebaiti su.A ɓɔsɔna, é ɗa fiilɛi ɠugi zo.Ɓɛ ɠa a kpeteʋe pɛɛpolu wɔin ʋa?Ma zinɛiti ti gaiziɛzu, ti la ɓɔlɔa, ta ka, a ɓɔsɔna nɔ feya.25Dama, saʋalagi mina ɠula è-ɠɔɠɔi ʋa!Dama ga è-ɠɔdaʋɛ ná mina vɔ!Kɛlɛ ɗa ɠɛɛzu ma: ‹Wafuun kpɔlɔ ɠana!Wɛɛn ɠalagiti nɛɛʋɛ bɛ̀, tiya ɠa gè ʋilɛsu ti ʋolu.›26Eɠɛʋelei unma nui a ɗa unfe da, siɛgi zu ti sosu da,zekana Izilayɛle ʋɛlɛyeɠei unfeni la,tiya-o, ta-masagiti-yo, ta-ɠundiɠi wolaiti-yo,ta-zalaɠa ɠula nuiti-yo, ta ta-ƓALA goo wo nuiti-yo,27tɛiti ti ɠɛɛzu gului ma: ‹Ɗa ga kɛ̀ɛ,›ti ɠɛ kɔtui ma: ‹Ɗa ɠa è sɔ̀lɔɔni!›Ti ʋoluavega bà, ti la wɛlɛzu gàazu.Kɛlɛ maanɔɠɔ voloi, ta ɗa ɠɛ mà:‹Wuzeɠe, è gi ɠizo!›28Kɛlɛ, mini ɠa deɠɛmu ɗa-ɠalagiti ti ná,è ti ɓɛtɛni ɓɔɠɔ ʋɛ?Ti wuzeɠena deɠɛmu, ni ta zoo ti è ɠizo, siɛgi zu maanɔɠɔi è zoga da!Mazɔlɔɔ, ee, Zuda, ɗa-laai liegiti ti è yeema, ta tie ta galagiti ti è yeema!»
Zuda yeema ná-GALAGI ma
29«Leeni vaa zu wo kpɔɛi laalɛɛzu bù?Wo pɛ wo wuzeɠea dàalɔɠɔma,»Ɠɔoɠɔ GALAGI wooi ɠana.30«Gè wo loɠani, kɛlɛ naa la faa ʋaani,wo la ɠi sɔlɔɔni naa ma.Wo wa-ƓALA goo wo nuiti paani ga boɠa zɔkpɔi,eɠɛ zalai é faa ɠoloɠologi ɠɛɛzu.31Niizu nuɓusɛiti, à wɛlɛ nii Ɠɔoɠɔ GALAGI bosu:Nà Izilayɛle ʋɛ ga zooi é ga teʋebai ɓaa, kpidi yooi?Leeni vaa zu nà-nuɓusɛiti ti ɠɛɛzu ma:‹Gá ziɛziɛsu ʋɛ ná nɛai gi ʋɛ, gi la wɔinni faa ʋa ɠɛ ade yɔɠɔzu›?32Anzalopoi ɠa yeema nɛi ná-balai ma?Ɓaa anzalopoi maazogai, naa ɠa yeema nɛi ná-saamaɠiligi ma, fɛlɛai ga pagɔ?Ɓa-o, kɛlɛ wɔun wa, nà-nuɓusɛiti, wo yeema mà, kaite, ma voloiti gaa la luga.33Ee, eɠɛʋelei è zoogai la wɛɛnziɛgi la!Anɛɛ anzanui nii gola ɲɔuɗai, ɗa zoo è kalagi ve zea!34È yɛga su, maawɔin nuiti ti la ga sɔba nui,ti-ma ɲamai zeelia ɗa-zeɠei lakɔlɔgaʋɛti,è la ti zoni, ti ʋa ɗa ɗa-ʋɛlɛla ɓusɛ!Kɛlɛ naa pɛ su,35ɗa ɠɛɛzu ma:‹Ungo, nɔ̀un, peelalazu la bà!Dàaʋɛ da, ná-ziiɠaawanai ɠa ʋaazu ɓudɛzu màazu!›Deɠɛmu, nɔ̀un, nà ʋaazu è lukpɔzu,tɔɔzei ɗa ɠisiɛzu ga è la faaɠaaza nɔpɛ kɛɛni!36É la ɓaani è ma ga è è-nɛɛɲɔɠɔi valibosu la!Tama Ezipete ɠa ʋaazu è unfesu, eɠɛʋelei Asiili è unfeni da.37Miná ɓalaagi, ɗa ɠula ná, è-yeeiti daai è unma ga unfegi.Mazɔlɔɔ Ɠɔoɠɔ GALAGI ɠɛlɛa naati ba,niiti è ɓɔɠɔ ɠalivaazu ti ma,è la undaanɛ zɔlɔɔga ti ya.»