1Ɠɔoɠɔ GALAGI wooi ɠaa mà: «Li, è geze zaamaɠiligi ɠeya ɓɔɠɔ ʋɛ, è gili zaama, kɛlɛ ɓɔɠɔ zo, è mina gba.»2Gè saamaɠiligi ɠeyani, eɠɛʋelei Ɠɔoɠɔ GALAGI boni la, gè gili zaama.3Naa ʋolu Ɠɔoɠɔ GALAGI ɓɔɛni pɔ̀ ná zeizu velesiɛi, é ɠɛ mà:4«Saamaɠiligi tɛi seɠe, è li ziɛ wolai Efelate ʋɔ bɛ, è dɔɔɠu miná kɔtu yeɠei taɠila su.»5Gè liini, gè dɔɔɠu ziɛ wolai Efelate ɠobaʋɛ, eɠɛʋelei Ɠɔoɠɔ GALAGI ma levei veeni la zèa.6Gola zuɠoozaai ma, Ɠɔoɠɔ GALAGI ɠɛni mà: «Wuzeɠe, è li ziɛ wolai Efelate ʋɔ bɛ, saamaɠiligi zeɠe ná, nii gè devei veeni è ya, ga è dɔɔɠu ná.»7Gè liini ziɛ wolai Efelate ʋɔ bɛ, gè ná zuveelɛ, gè saamaɠiligi zeɠe ʋɛ gè dɔɔɠuni ná. Kɛlɛ é ɠoloɠoloni niina, tosu la mɔ ɠɛni ba.8Ɠɔoɠɔ GALAGI ɓɔɛni pɔ̀, é ɠɛ mà:9«Ɠɔoɠɔ GALAGI wooi ɠaa: Zekana gè Zuda nuiti ta-wasogi ɠoloɠolosu da, ta Zeluzalɛme ná-waso golai.10Nuɓusɛi ɲɔu ɠa ga niiti, ti ɠɛlɛzu ga ti mina woilo gòoi ma, ti vɔɔnɛai ta-vaaɠaaɠalalai zu, ti ɠiliai gala kiligiti ba, ti ɗa ti lɛbi, ti ɗa nɔkɔ ti wu. Ta ɠɛɛzu ga saamaɠiligi nii ɠɛʋele, nii é la mɔ ʋani, tosu la ba.11Tama, eɠɛʋelei nu a ɗa saamaɠiligi ɠili la zaamaʋɛ, ʋele ɠana gè Izilayɛle ʋɛlɛyeɠeiti kpein gilini la, ta Zuda ʋɛlɛyeɠei pɛ,» Ɠɔoɠɔ GALAGI wooi ɠana, «gè tɔ̀ɠɔ ʋagɔi ʋɛɛ ti ʋa, ti ɠɛ ga nà-nuɓusɛiti, nà-lɛbiyai ma ungi, ta nà-kɔbu ansa ʋagɔi. Kɛlɛ ti la woiloni.»
Ziiɠaawanai lɔɔi
12«Li, è ɠɛ ti ma: ‹Ɠɔoɠɔ GALAGI, Izilayɛle ná-GALAGI wooi ɠaa: Pɔlɔ liɠii ɓɛtɛʋɛ ga dɔɔi ɗa zei su.› Ta è wooɠaaʋotena ga: ‹Naa ɠaaɠalagɛ, gi suɠwɛɛ ga pagɔ,›13naazu ɗa ɠɛɛzu ti ma: ‹Ɠɔoɠɔ GALAGI wooi ɠaa: Wɛlɛ, nà dɔɔi losu niima yooi zu nuɓusɛiti kpein da, é ti zo, ta masagiti pɛ ti zeini Davide ná-masa kpɔkpɔgi ɠa, naa ʋɛɛ zalaɠa ɠula nuiti ta GALA goo wo nuiti ba, ta nuiti kpein ti zeini Zeluzalɛme taazuʋɛ.14Nà ti pɛ doɠaloɠa ɓɔɠɔ ʋa, ɠɛɛɠɛi ta doun zunuiti pɛ,› » Ɠɔoɠɔ GALAGI wooi ɠana. « ‹Gè la ɓudɛa nu nɔpɛ maazu, maawɔinɠaa la pele leʋega tùɠɔ, gè ʋa ɓe ti undaaʋilisu.› »
À woilo, aisa ná ʋa leʋe
15À woilo, wo ɠida bu!À mina mɔ ɠɛ ga waso nua!Mazɔlɔɔ Ɠɔoɠɔ GALAGI ɠa ɓɔɛzu wo ʋɔ.16À unfemai ve Ɠɔoɠɔ GALAGI ʋɛ, wa-ƓALAGI,aisa é ʋa ʋa ga kpidii wo ʋɔ,wo-ɠɔɠɔiti ti ɗa ziɠa gizeiti ba, ʋɛ kpidii ʋɛɛzu ná.Wɔun, wa wozakalagi maaɓɔunsu,toɠa falibosu ga kpidi ɓɔii,ungo, toɠa falibosu ga tonaɓiingi suɓidia wolai.17Ni wo la ɠɛ woiloni,nà wɔlɔ dɔɔɠuzu wa-wasogi vaa zu,gàazuɗɛ ɓoigiti ta la,mazɔlɔɔ Ɠɔoɠɔ GALAGI ná-baala kpulugi ɠana ʋa liizu duɔlai zu.
GALA ná-keela wooié leʋeni masa pɛlɛyeɠei ma
18Ɠɛ masagi ma ta masa mama wolai:«À zei zooi ma!Mazɔlɔɔ wa-masa bɔɔlɔ golai loa,é ɠula wo unma.»19Daaɠuluga taa wolaiti tuɠɔ ti lɛkpɛma ʋelei nu yeezazuʋɛ yooi zu,nu nɔpɛ ge la ná, nii a daalao.Mazɔlɔɔ Zuda yooi zu nuɓusɛiti pɛ ti lia duɔlai zu,ɛsɛ pɛ dii vai ɠana duɔlai zu.20Ɠaazu wuzeɠe, è wɛlɛ è zili nuiti ba ti ʋaazu,ti zeɠe lɛkpɛmaʋɛ nu ɠɔʋɛzuʋɛ.Nuɓusɛiti ge ti ɠalivaani è ma, ta ɠɛɛzu ɠale?Togani ɓulu koi é ɠɛni ga ɗa-lɛbiyai, ta mini?21Leeni ɠa ɗa bo naazu,siɛgi zu niiti è ti maalɛlɛai ga wo ɠɛ ga bɔɔlamaiti,naati ti wuzeɠezu la è laalɔɠɔma,ti zeizu è unda?Taɓai la è zoga,eɠɛ anzanui nii é doun zɔlɔɔ koozuwanai laawu ɓaa?22Naazu ɗa ɠɛ ɓɔɠɔ ɠaazaɠasu, è ɗa ɠɛ ma:«Lee vaa zu nii ɠɛɛzu ga ze?»Tɔɔzei ɗa-vaaɠaaza golaiti mɔin ʋelei ʋa,naa ɠa é kɛɛzu ti ɗa-zeɠei lakɔlɔgiti tɛɛzu la ba,ti ʋu è ma, ti faa ɲɔi ɠɛ ga ɗe.23Etiyopi nui ɠa zoo nɛi é kɔlɔgi ma zii valibo ɓaa?Kɔii ɓalaa ɠa zoo é ma ʋɔnɛi valibo nɛi ɓaa?Zekana é la, wa zoo nɛi wo faa ʋagɔ ɠɛ ɓaa,wɔiti faa ɲɔu ɠɛɛ vai ɠubogai wo zu?24«Nà ɓalaagi, Ɠɔoɠɔ GALAGI, nà wo vazasu fiilɛi zu,é li ga woye eɠɛ daazaɠa fɔɔi.25Zeluzalɛme, wɛlɛ è unma ɠasɔi ɠana,è-niigi ɠana gè seiɗai è luɠɔ,»Ɠɔoɠɔ GALAGI wooi ɠana,«mazɔlɔɔ è yeemaa mà,è ɠaliva zɛɛ ɠalagiti ma.26Nà ɓalaa nà ɗa-zeɠei ɠulazu è ma,naa ɠa a kɛ ti è maaɲakai ɠa.27Gè è ɓala gooiti mɛni,gè ɗa-wɛɛnziɛ faiti kaa,ta ɗa-unfetala ɠoloɠologiti, gizeiti ma dɔɓɔiti su,ta ɗa-ɠɔzɔba vaiti!Maanɔɠɔ ɠa è ʋɛ, Zeluzalɛme,ɗa yɛsu ɲadetalai zu eyɛsu yeelɛ?»