1Ɠɔoɠɔ GALAGI, è lelebogɛ gola,gè ʋa tukpɔ laalɛ è wu.Anɛɛ naa ʋe, nà pɔ gè ɓɔɛ è ʋɔ ga ɗa-lukpɔɠaaleʋe faiti.Leeni vaa zu faa ɲɔu ɠɛ nuiti ti ɓɔɠɔ zɔlɔɔsu ta-ʋeleiti su?Leeni vaa zu GALA kwɛɛtala nuiti ti ta-eteai ziɛzu undaanɛɛi zu?2È ti ziinni, ti zape ziaa,ta liizu luɠɔma, ti ɗa kulanumai zɔlɔɔ.È-laaseigi ɠa ti-la yeenɔpɛ,kɛlɛ ɗa-vaa nɔpɛ ge la ti yiima.3Nɔ̀un nà, Ɠɔoɠɔ GALAGI, è kwɛ̀ɛ,ɗa pɛ̀tɛsu, è fɛ̀ɠɛlɛfɛɠɛlɛga,gè yiimazeɠea ga ɗe.Kɛlɛ tiya ya, ti ʋu yɛ eɠɛ baalagiti ti liizu ga tiye ti ʋaazuʋɛ,ti ʋu yɛ, ti ʋaa voloi luɠɔ.4Zooi ɠa yɛsu saa wɔlɔi ɠa eyɛsu yeelɛ?Dɔɓɔi ɠa yɛsu fɔɔvɔgi laawu eyɛsu yeelɛ?Dɔɓɔ zuaiti ta wɔniiti undaa ɠa ʋilisu zooi zutɔɔzei nuɓusɛi ná-ɲɔi maaʋele ma,ti ɗa ɠɛ ma: «É la zooga naa ɠwɛɛsu, nii seiɗai gi luɠɔ.»5Ɠɔoɠɔ GALAGI ɠɛ mà:«Ni ɗa ɓɔlɔzu ga kpizɛi siɛ kɔɠɔa nuiti polu,ɗa zoo lɔɔzu ɠale zeezuɠɔɠɔgi zu wa sooiti?Ni ɗa ɠisiɛzu ga ɗa kpaamaazu ʋagɔi zɔlɔɔzooi naa nɔ zu ʋɛ fai pɛ soloogai ná,ɗa kɛ ɠale ɗa ɠɛna Zuludɛn ma lɔɓɔ ɠaaɠiligi zu?6Mazɔlɔɔ anɛɛ è-ɠɛɛlointi ta ɗa-wolodai zu nuiti ta yaavai lɔɔzu è ma,ta nuiti gaalɛzu ba è laalɔɠɔma, è yeema zu.Ti ɠɛɛ ʋa kpɔɛ nɛɛnɛgiti bosu, mina la ti la pɛ.»
Ɠɔoɠɔ GALAGI ɠɛlɛ vaisei ʋɛlɛi ta ná-nuɓusɛiti ba
7«Gè yeeɓega sèi ʋɛlɛi ʋa,gè ɠɛlɛa nà-nuɓusɛiti ba ti ga nɔ̀nɔiti,nii nɛai bɛ̀, gè naa lɔa sili nuiti zeezu.8Mazɔlɔɔ nuɓusɛiti ti ga nɔ̀nɔ,naati ti ɠɛa bɛ̀ eɠɛ zalai é dɔɓɔi ʋa,é ɗa zikɔ dàalɔɠɔma,naa ɠa é kɛa ti la mɔ nɛɛni bɛ̀.9Nà-nuɓusɛiti ti ɠɛa ga wɔnii maaleɠai zupuainii wɔniiti ti zeɠezu adaʋɛ pɛ, ti ɗa ʋu ma?À li, wo dɔɓɔ zuaiti pɛ gaalɛ ba!À ʋa ga tiye daamii ɓɔgi zu!10Baala makɛ nu mɔinmɔin ge nà-leezɛn ɓelei zuɠoloɠologa,ti ɠɔɠɔlo su,ti kpele ʋapagi nii ɠɛa ga teʋebai zu naa ɠaalɛi.11Ti faliboga ga adaʋɛ naa ɠaalɛiɗai,é gɔlɔi laawu, iɲɔteʋeai na gàazu.Zooi zuɠaalɛiɗa ná pɛ,nu nɔpɛ ge la yiizoolɛzu ga ma vai.12Teʋebai zu, gaaɠoozazuʋɛti nu la zeini ná,toosu nuiti ti ʋaa,mazɔlɔɔ Ɠɔoɠɔ GALAGI boɠa zɔkpɔi maalega,nii é zooi ɠoloɠolosu ná pɛ,ziilɛi ge la nu ɠila kpalaa bɛ.13Ʋɛ ti moloi vazani ná,ɠaingiti ka ti ti leʋeni miná.Ti ɓɔlɔni wafuun nɔ, tɔnɔ ge la ɠɛɛni ba.Wa-molo leʋei ma lɔnɔgi ɠa wo yeelaave ga unfegi,Ɠɔoɠɔ GALAGI ná-ziiɠaawana wolai ma lɔnɔgi ɠana.»
Nii seiɲɔɠɔ ɲɔiti ti ʋaazu sɔlɔɔsu
14Ɠɔoɠɔ GALAGI wooi ɠaa: «Seiɲɔɠɔ ɲɔiti kpein ti laalɛɛzu zooi wu gè feeni nà-nuɓusɛiti zea, Izilayɛle nuiti, nà tiya ɓalaa ti lɔɔɠulazu ta-yooiti su, gè Zuda nuiti ɓalaa tɔɔɠula ti zaama.15Kɛlɛ gè ti lɔɔɠula ʋoluma, nà ti maawɔinɠa mɔnɔ ga niinɛ, gè ti ɠaaɠale ma ta-ʋoganiiti unda, ɛsɛ ge ɠɛ ná-zou zu.16Ni ta ɠaaɓaana, ti ziɛ ga nà-nuɓusɛiti kɛʋele, ti ɗa konai wo dàaseigi zu ga: ‹Gè ɠonaa Ɠɔoɠɔ GALAGI ma, nii é vulua,› eɠɛʋelei ti nà-nuɓusɛiti kalani da ga ti ɗa konai wo kɔɔɠɔ ganigi Ɓaale laaseigi zu, naazu ta zeizu zɔlɔɔ nà-nuɓusɛiti saama.17Anɛɛ naa ʋe, ni ma yooi ta a ɠɛna ná, é ɠɛlɛ, é la woiloni, naazu nà zooi naa lɔɔɠula ɲɛgɛlɛin, nà tɔɔɠula, gè zɛ ná undaaʋili,» Ɠɔoɠɔ GALAGI wooi ɠana.