1Ɠɔoɠɔ GALAGI ɠɛni mà: «Kokolo gola ɠila seɠe, è sɛʋɛi ɠɛ ma, gaaɠula ga: ‹Toosui maaɓuɠaa, kɔɔzoganii maa la ɠoozani›.»2Gè kokologi lɛɛni ga zeele felegɔ, nu a la ti la, zalaɠa ɠula nui Ilii ta Yebelekiya ná-doun zunui Zakali.3Gè ʋilɛni ànzai ʋolu, GALA goo wo anzanui, é kogi zeɠeni, é doun zunu zɔlɔɔni. Ɠɔoɠɔ GALAGI ɠɛni mà: «Toli ga Maɠɛle-Salale-Ɠase-Baze (nii poluʋɛ ga «toosui maaɓuɠaa, kɔɔzoganii maa la ɠoozani»).4Mazɔlɔɔ aisa doungoi ʋa zoo ɠɛɛzu ‹Dèe› ɓaa ‹Kɛ̀ɛ›, Damase naavoloiti pɛ ta li Asiili masagi ʋɔ bɛ, ta kɔɔzoganiiti ti zosu Samali.»5Ɠɔoɠɔ GALAGI ɓɔɛni pɔ̀ mɔnɔ, é ɠɛ mà:6«Tɔɔzei niima nuɓusɛiti ti Silowe ɗɛi ʋɛlɛʋilini,nii é yeizu vaa,ti ɠoozunɛ masa felegɔiti ta-vaa zu,Lesin ta Lemalia ná-doun zunui,7naa maaʋele ma, wɛlɛ Maliɠii ɠa ʋaazu ga ziɛ wolai ti laalɔɠɔma, ti ɠeɠaaɓaai,Asiili masagi ta ná-lɛbiyai pɛ,toɠa wuzeɠe, é ɠula daazuʋɛ,toɠa li, é ɓudɛ kwɛgiti pɛ maazu,8toɠa ɠaaʋote Zuda yooi ma,é zɛɓɛ, é ʋooʋa ma, é lɛ, é so kɔbu.Ee, Emanuwɛle, koʋegi zuviegai ɠa ɗa-yooi pɛ sulaave!»9Nuɓusɛiti, à zɔngɔi wo, kɛlɛ fɔnigi ɠa wo wo ma!À woilo, wo pɛ, wɔi wo ɠoozama zooi ɠa,à ɠɛʋele ɓɛtɛ kɔɔɠɔ vai ma, kɛlɛ fɔnigi ɠa wo wo ma!À ɠɛʋele ɓɛtɛ kɔɔɠɔ vai ma, kɛlɛ fɔnigi ɠa wo wo ma!10À faazeikpasuiti kɛ, ti pɛ ta ɠoloɠolo!À ɓɔɠɔ ɠa, wo zoloo faiti ma, faa nɔpɛ ge la ɠula su,mazɔlɔɔ GALA ka gi ʋa.
Ɠɔoɠɔ GALAGI ɠa maanɛai é lɛbi
11Mazɔlɔɔ Ɠɔoɠɔ GALAGI wooi ɠaa mà,siɛgi zu é sòni da ga zeei,é tɛ̀nɛni ga gè mina ʋokɔɠɔ niima nuɓusɛiti siɛ ʋelei ma, é ɠɛ mà:12«À mina naati pɛ daasei pɛɛ ga yaavai,nii pɛgi niima nuɓusɛiti ti daasei pɛɛzu ga yaavai.À mina lua naa ʋa, nii ti luazu ba,à mina inɛinɛ ba pa.13À Ɠɔoɠɔ GALAGI, Fai-Pɛ-Maliɠii ɠwɛɛ ga ɲadegɛ,tɔ ɠa wo maanɛai wo unfe ma,tɔ ɠa wo maanɛai wo lua ba.14Toɠa ga seizu ɲadegai,kɛlɛ toɠa ɠɛɛzu ɓalaa ga kɔɠɔziɠa ɠɔtui,fasai nii é ga ɓunɛ ma anii Izilayɛle masada zeizu felegɔiti bɛ,é ɠɛ ga tumɔi ta balii Zeluzalɛme laaʋeaiti bɛ.15Ma mɔinmɔin kɔɠɔi ɠa ziɠa ba,ta loo, ti ɠaleɠale,ta ɠɔ ga balii, é ti zo.»
Maaɓɔun geeɠɛɠalai
16Zeele wooi makɛ,poogi ʋɛɛ tɔgi nii ʋa,naati bɛ niiti ti ga nà-kaladopoiti.17Kìtogɛ Ɠɔoɠɔ GALAGI ʋa,niizu dɛ, é ʋoluavegɛ Zakɔɓe mavofodaiti ba,nà-kitogi pɛ ka ga tɔun.18Giya ɠaa, gá dointi Ɠɔoɠɔ GALAGI ti veai zèa,gá ga poogiti ta laavɔ aniiti Izilayɛle zaamaƓɔoɠɔ GALAGI, Fai-Pɛ-Maliɠii ya,nii é zeini Siyɔn gizei ma.19Siɛgi zu ta ɠɛna la wo ma:«À li, wo gɔvɛ laawooleʋe nuiti gaazaɠa, ta niiti gɔvɛiti ti ʋelela ʋele vaiti bosu ti ma,ti woo ɠaayeizu ti ɗa ɓɔɛ laa wu!Nuɓusɛiti maa la nɛɛni ti ʋa ta-ɠalagiti ta gɔvɛiti gaazaɠafulu nuiti ta-vaa zu ɓaa?»20wa ti wooɠaaʋote ga:«Ɠɔoɠɔ GALAGI ná-tɔgiti ta ná-deveiti ka maanɛai ga nu ɠale ma ti ma.Nui nii é la ɓɔɛni ɠana,é la geelaalaosu wozakalagi ɠaa.»
Kpidi wolai é nuiti kpɔlɔzu
21Toɠa leʋe zooi zu, kpɔlɔi ta pului ma.Siɛgi zu koozu ɲakai ɠɛɛzu de,toɠa yiiɠaawana niina,é ná-masagi ɠoto, é ná-GALAGI ɠoto,toɠa ɠaaʋote niina geeɠɔlɔgi ma.22Naa ʋolu é wɛlɛ zooi ʋɔ pelei,wɛlɛ kidaaʋiligi, kpidii, ta koozuʋiligi sosu la ná,naa ɠa liizu ga nu kpidi ɓɔi wolai zu.
Kpidii zeɠe ná, wozakalagi ʋa
23Kɛlɛ kpidii la yɛga ɠɔ naama yooi zu,ʋɛ koozuʋiligi ná niizu.Ni, siɛgi niiti ti leʋegai,GALA ge Zaɓulɔn yooi ta Nɛfɛtali yooiti dɔɔni ɓaaɠulamai zu,yeeɠɛɠalaiti ti ʋaazu, toɠa kpoloɗɛi ma ʋelei zu ɠɛ ga lɛbiyai,é li Zuludɛn ziɛ ʋoluʋelei yooi,é zeeli Galilé yooi zu, ʋɛ zii ɠiligiti ti zeini ná.